سرکارِ دو جہاں   صَلَّی اللہُ تَعَالٰی عَلَیْہِ وَاٰلِہٖ وَسَلَّمنے جب اس جہانِ فانی سے  پردہ فرمایا تو اس وقت اللہ عَزَّ وَجَلَّ کی معرفت رکھنے والے ہزاروں   صحابۂ کرام عَلَیْہِمُ الرِّضْوَان موجود تھے،   انہیں   اللہ عَزَّ وَجَلَّ کی جانب سے  علمِ فقہ کی دولت کے علاوہ اس کی رضا بھی حاصل تھی مگر ان میں سے  دس سے  کچھ زائد افراد کے علاوہ کسینے فتویٰ دینے کی کوشش میں   نفس کو تھکایا نہ منصبِ قضا سنبھالا۔ چنانچہ اس کے متعلق بعض صحابۂ کرام عَلَیْہِمُ الرِّضْوَان کے اقوال ذیل میں   مذکور ہیں  :

            حضرت سیِّدُنا ابن عمر رَضِیَ اللہُ تَعَالٰی عَنْہُمَا سے  جب فتویٰ پوچھا جاتا تو آپ فرمایا کرتے:  ’’امیر کے پاس جاؤ جس کی گردن میں   لوگوں   کے امور کے ہار ڈالے گئے ہیں   اور اسے  بھی اسی کی گردن میں   ڈال دو۔  ‘‘  

            حضرت سیِّدُنا انس رَضِیَ اللہُ تَعَالٰی عَنْہ اور دیگر کئی صحابۂ کرام عَلَیْہِمُ الرِّضْوَان اور تابعین عظام رَحِمَہُمُ اللہُ السَّلَام سے  ایسے  ہی اقوال مروی ہیں  ۔ چنانچہ حضرت سیِّدُنا ابنِ مسعود رَضِیَ اللہُ تَعَالٰی عَنْہ  فرمایا کرتے تھے کہ جو شخص لوگوں   کے پوچھے گئے ہر فتویٰ کا جواب دیتا ہے یقیناً مجنوں   ہے۔  ^([1]) حضرت سیِّدُنا ابنِ عمر رَضِیَ اللہُ تَعَالٰی عَنْہُمَا سے  دس سوال پوچھے جاتے تو وہ صرف ایک سوال کا جواب دیتے اور نو کا جواب نہ دیتے۔  ^([2])

            حضرت سیِّدُنا ابنِ عباس رَضِیَ اللہُ تَعَالٰی عَنْہُمَا سے  اس کے برعکس مروی ہے ان سے  دس سوال پوچھے جاتے تو وہ نو کا جواب دیتے اور ایک کا جواب نہ دیتے۔ اسی طرح بعض فقہائے کرام رَحِمَہُمُ اللہُ السَّلَام ایسے  تھے جن کا قول  (لَاۤ اَدْرِیْ)   ’’یعنی میں   نہیں   جانتا ‘‘  ان کے قول  (اَدْرِیْ)  ’’یعنی میں   جانتا ہوں   ‘‘  سے  زیادہ ہوتا۔ حضرت سیِّدُنا سفیان ثوری،   حضرت سیِّدُنا مالک بن اَنس،   حضرت سیِّدُنا احمد بن حنبل،   حضرت سیِّدُنا فضیل بن عیاض اور حضرت سیِّدُنا بشر بن حارث رَحِمَہُمُ اللہُ الْوَارِث بھی انہی فقہائے کرام رَحِمَہُمُ اللہُ السَّلَام میں   سے  ہیں  ۔ یہ سب اپنی مجالس میں   بیٹھا کرتے تو بعض سوالوں   کا جواب دیتے اور بعض کا نہ دیتے یعنی ہر پوچھی گئی بات کا جواب نہ دیتے۔  ^([3])

            حضرت سیِّدُنا عبد الرحمٰن بن ابی لیلیٰ عَلَیْہِ رَحمَۃُاللہِ الْاَعْلٰی فرماتے ہیں   کہ میں  نے مسجد ِ نبوی میں  120 صحابۂ کرام عَلَیْہِمُ الرِّضْوَان کو پایا مگر ہر ایک کی کیفیت یہ تھی کہ اگر ان سے  کوئی حدیثِ پاک یا فتویٰ پوچھا جاتا تو وہ چاہتا کہ اس کے بجائے کوئی دوسرا صحابی ہی اس کا جواب دے۔  ^([4]) اور ایک روایت میں   ہے کہ ان میں   سے  کسی سے  کوئی سوال کیا جاتا  تو وہ اسے  دوسرے صحابی کے سامنے پیش کر دیتا اور وہ آگے کسی تیسرے صحابی کے سامنے پیش کر دیتا یہاں   تک کہ وہ سوال لوٹ کر واپس پہلے صحابی کے پاس آ جاتا۔  ^([5])

فتویٰ کون دے؟

            رسولِ بے مثال،   محبوبِ ربِّ ذو الجلال صَلَّی اللہُ تَعَالٰی عَلَیْہِ وَاٰلِہٖ وَسَلَّم کا فرمانِ ہدایت نشان ہے: ’’تین بندوں   کے علاوہ کوئی شخص فتویٰ نہ دے: یعنی  (۱) …اَمِیْر  (۲) … یا مَاْمُور  (۳) … یا مُتَکَلِّف۔ ‘‘  ^([6])

حدیثِ پاک کی شرح: 

            حدیث ِ پاک کی شرح میں   ہے کہ ’’اَمِیْر ‘‘   (حکمران)   سے  مراد وہ شخص ہے جس کا تعلق علمِ فتویٰ اور علمِ احکام سے  ہوتا ہے،   کیونکہ اُمرا  (حکمرانوں  )  سے  ہی مسائل پوچھے جاتے ہیں   اور وہی شرعی راہنمائی بھی کرتے ہیں  ۔ ’’مَاْمُور ‘‘  وہ ہوتا ہے جسے  امیر  (حکمران)  ایسا کرنے کا حکم دے،   لہٰذا وہ اس کا نائب ہوتا ہے اور امیر  (حکمران)  کے رعیت کے دیگر معاملات میں   مشغول ہونے کی وجہ سے  اس معاملے میں   اس کی معاونت کرتا ہے۔ جبکہ ’’مُتَکَلِّف‘‘  سے  مراد وہ شخص ہے جو زمانہ ماضی کے قصے کہانیاں   سناتا ہے،   کیونکہ ان کی اس موجودہ زمانے میں   کوئی ضرورت نہیں   اور نہ ہی ایسے  علوم کا حصول مستحب ہے۔ بعض اوقات وہ ماضی کے واقعات میں   کمی بیشی کے علاوہ انہیں   حقیقت کے برعکس بھی بیان کر دیتا ہے۔ جس کی وجہ سے  قصہ گوئی کو مکروہ کہا گیا ہے کیونکہ قصہ گو کو ’’مُتَکَلِّف ‘‘  یعنی جان بوجھ کر تکلف میں   پڑنے والا کہا جاتا ہے۔

            ایک حدیثِ پاک میں   اسی قسم کے مفہوم کی تاویل کچھ یوں   مروی ہے کہ ’’تین افراد کے علاوہ لوگوں   کے سامنے کوئی کلام نہیں   کرتا:  (۱) … امیر  (۲) … مامور اور  (۳) … مرائی۔ ‘‘  ^([7])

             (صاحبِ کتاب حضرت سیِّدُنا شیخ ابو طالب مکی عَلَیْہِ رَحمَۃُاللہِ الْقَوِی فرماتے ہیں   کہ)  یہاں’’اَمِیْر ‘‘  سے  مراد وہ شخص ہے  جو لوگوں   کے جھگڑوں   وغیرہ کے مسائل میں   شریعت کے مطابق فیصلہ کرتا ہے جیسا کہ مذکور ہوا اور ’’مَاْمُور ‘‘  سے  مراد وہ شخص ہے جو اللہ عَزَّ وَجَلَّ کی معرفت رکھنے والا اور دنیا میں   زاہدانہ زندگی بسر کرنے والا ہو،   ایمان و یقین اور قرآنی علوم کی باتیں   کرتا ہو،   اللہ عَزَّ وَجَلَّ کے حکم کے مطابق لوگوں   کو دینی کاموں   کی ترغیب دلاتا ہو۔ یہ اجازت اللہ عَزَّ وَجَلَّ کے اس فرمانِ عالیشان سے  ثابت ہے:

وَ  اِذْ  اَخَذَ  اللّٰهُ  مِیْثَاقَ  الَّذِیْنَ  اُوْتُوا  الْكِتٰبَ  لَتُبَیِّنُنَّهٗ  لِلنَّاسِ   وَ  لَا  تَكْتُمُوْنَهٗ٘   (پ۴،   اٰل عمران:  ۱۸۷)  

تر جمعہ ٔ کنز الایمان: اور یاد کرو جب اللہنے عہد لیا ان سے  جنہیں   کتاب عطا ہوئی کہ تم ضرور اسے  لوگوں   سے  بیان کر دینا اور نہ چھپانا۔