آبروئے مومناں  احمد رضا خاں  قادری    

آبروئے مومناں  احمد رضا خاں  قادری
رہنمائے گمرہاں  احمد رضا خاں  قادری

علم میں  بحرِ رَواں  احمد رضا خاں  قادری
دِین میں  گوہر فشاں  احمد رضا خاں  قادری

علم کے ہیں  گلستاں  احمد رضا خاں  قادری
باغِ دِیں  کے گل فشاں  احمد رضا خاں  قادری

حق شناس و حق نما و نائبِ شمس الضحیٰ
وارثِ پیغمبراں  احمد رضا خاں  قادری

باغِ دِیں  میں  نغمہ خوان وخوش بیاں  شیریں  زباں
طوطیِ شکر فشاں  احمد رضا خاں  قادری

چشمِ اِیماں  سے اگر دیکھو تو ہیں  ایماں  کی جان
جانِ جاں  رُوحِ رَواں  احمد رضا خاں  قادری

تیرا علم و فضل و شان و شوکت و جاہ و حشم
شش جہت پر ہے عیاں  احمد رضا خاں  قادری

ہے عرب کے عالموں  کا مَدح خواں  سارا جہاں
اور وہ تیرے مَدح خواں  احمد رضا خاں  قادری

تم سے گلزارِ شریعت میں  کھلے خوش رنگ پھول
باغِ دیں  میں  گُلْفِشاں  احمد رضا خاں  قادری

روز اَفزوں  حشر تک یارب ترقی پر رہے
لہلہاتا بوستاں  احمد رضا خاں  قادری

صدقۂ    شاہِ   عرب	ی وماً	فیوماً     ہو   بلند
تیری عزت کا نشاں  احمد رضا خاں  قادری

دِین کا دشمن ہو یا ہو دوست سب کے واسطے
ہے تیری حق گو زباں  احمد رضا خاں  قادری

تیرے صدقہ میں  خدا چاہے تو پائیں  گے غلام
کل وہاں  باغِ جناں  احمد رضا خاں  قادری

حق تعالیٰ نے کیے بے حد کمالات و علوم
تیرے سینہ میں  نہاں  احمد رضا خاں  قادری

سیف اَعدا کے لیے مومن کے حق میں  ہے سپر
آپ کی حق گو زباں  احمد رضا خاں  قادری

اہلسنّت کے سروں  پر دائما رکھے خدا
تجھ کو با اَمن و اَماں  احمد رضا خاں  قادری

عالمانِ مکہ و طیبہ نے لی تجھ سے سند
ہیں  وہ تیرے قدر داں  احمد رضا خاں  قادری

کیا ستا سکتے ہیں  تجھ کو تیرے اَعدا مرشدا
حق ہے تجھ پر مہرباں  احمد رضا خاں  قادری

پڑ گیا ہے پشت پر اَعدا کی اب کیا جائے گا
تیرے کوڑے کا نشاں  احمد رضا خاں  قادری

دیکھ  کر  جلوہ    ا َشِدَّاءُ	عَلَی   الْکُفَّار   کا
ہر عدو ہے بے زباں  احمد رضا خاں  قادری

چیر کر بدمذہبوں  کے دل میں  گزری وار پار
تیرے نیزے کی سناں  احمد رضا خاں  قادری

آ چلی تھی شیخِ نجدی کے بیاباں  میں  بہار
بھیج دی تو نے خزاں  احمد رضا خاں  قادری

فتح دی حق نے تجھے اَعدائے دیں  پر دائما
تجھ پہ ہے حق مہرباں  احمد رضا خاں  قادری

حق اسے کہتے ہیں  دیکھو رَد نہ کوئی کرسکا
تیرا فتوائے اَذاں  احمد رضا خاں  قادری

کیا  (1)   ستاتے تجھ کو اَعدا تھی یہ حکمت خلق کا
ہو رہا تھا اِمتحاں  احمد رضا خاں  قادری

دعویٔ اَعدا حقیقت میں  کسوٹی تھا کہ ہوں
دوست اور دشمن عیاں  احمد رضا خاں  قادری

تھے	وصی   احمد   محدث(2)     ر َحْمَۃُ   اللّٰہِ   عَلَیْہ 
آپ کے اِک رُتبہ داں  احمد رضا خاں  قادری

خاندان پاک برکاتیہ کا چشم و چراغ
کہتے تھے نوری میاں(3)   احمد رضا خاں  قادری

شاہ پیلی بھیت کے حضرت محمد شیر(4)   خان
تھے تمہارے مَدح خواں  احمد رضا خاں  قادری

رامپوری صابری چشتی میاں  ناصر(5)  ولی
جانتے تھے تیری شاں  احمد رضا خاں  قادری

حاضر و غائب ترے حق میں  دعاؤں  کے لیے
عمر بھر کھولی زباں  احمد رضا خاں  قادری

آپ کا حامد ہے حامد سید کونین کا
ہے وہ تیری عز و شاں  احمد رضا خاں  قادری

مُحْیِ سنت اور مجدد اس صدی کے آپ ہیں
اے اِمامِ مفتیاں  احمد رضا خاں  قادری

یاد رکھیں  گے قیامت تک غلامانِ رسول
تیرے جلسوں  کا سماں  احمد رضا خاں  قادری

اے میرے اچھے کے اچھے مجھ کو بھی اچھا بنا
صدقۂ اچھے میاں  احمد رضا خاں  قادری

صدقۂ سرکار(6)  جیلانی پھلیں  پھولیں  مدام
مصطفیٰ حامد میاں(7)   احمد رضا خاں  قادری

دے مبارکباد ان کو قادری رضوی جمیلؔ
جن کے مرشد ہیں  میاں  احمد رضا خاں  قادری


1  مقدمۂ بدایوں کی طرف اِشارہ ہے کہ جو بعض حاسدین مفسدین نے علمی مباحث سے تھک کر حق سے منہ موڑ کر اہل حق پر جھوٹا دعوی کیا تھا         بِحَمْدِہٖ تَعَالٰی  وہاں بھی منافقین رُوسیاہ ہی ہوئے۔ ا َلْحَقُّ یَعْلُوْوَلَایُعْلٰی ۔
2 محدث سورتی پیلی بھیتی ر َحْمَۃُ اللّٰہِ عَلَیْہ ۔۱۲
3  حضور پر نور شاہ سید ابو الحسین احمد نوری مارہروی ر َضِیَ اللّٰہُ تَعَالٰی عَنْہ  ۔۱۲
4  حضرت قبلہ شاہ محمد شیر میاںصاحب نقشبندی مجددی  رَحْمَۃُ اللّٰہِ تَعَالٰی عَلَیْہ  پیلی بھیتی اعلیٰ حضرت قبلہ  رَضِیَ اللّٰہُ تَعَالٰی عَنْہ   کی بہت تعریف فرماتے اور صد ہا دعاؤں سے یاد کرتے ۔
5 صوفی مولانا شاہ محمد شفیع صاحب ناصر ابن حضرت خواجہ طفیل علی شاہ صاحب چشتی صابری  رَحْمَۃُ اللّٰہِ عَلَیْہِمَا  متوطن رامپورضلع سہارنپورہر مجلس میں جہاں کہیں ہوتے اعلیٰ حضرت ر َحِمَہُ اللّٰہ  کے لیے دعائیں کرتے اور فرماتے کہ مولانا احمد رضا خاں صاحب دین کے ستون ہیں۔ ۱۲
6  اس مصرعہ کو دو مرتبہ پڑھو: پہلی بار لفظ سرکار کو بغیر اضافت پڑھو کہ جیلانی میاں صاحب کے لیے دعا ہوجائے۔ اور دوسری مرتبہ لفظ سرکار کو اضافت سے پڑھو کہ حضور سیدناغوث اعظم ر َضِیَ اللّٰہُ تَعَالٰی عَنْہ  مراد ہوں ۔ ۱۲
7    حضرت مولانا مولوی محمد مصطفیٰ رضا خان صاحب مُدَّظِلُّہ اعلیٰ حضرت قبلہ ر َضِیَ اللّٰہُ تَعَالٰی عَنْہ  کے چھوٹے صاحبزادے ہیں اور حضرت قبلہ مولانا مولوی مفتی حامد رضا خان صاحب  دَامَتْ بَرَکَاتُہُمْ  بڑے صاحبزادے ہیں اور حضرت جیلانی میاں صاحب قبلہ ان کے فرزند یعنی اعلیٰ حضرت قبلہ ر َضِیَ اللّٰہُ عَنْہ  کے پوتے ہیں،  اللّٰہ تعالٰی  ان کے گلزار کو سر سبز و شاداب رکھے۔۱۲