مُفَسِّرِشَہِیرحکیمُ الْاُمَّت حضر  ت ِ مفتی احمد یار خان علیہ رحمۃُ الحنّان اِس حدیثِ پاک کے تحت لکھتے ہیں  : یعنی حضور اَنْوَر صلی اللّٰہ تعالٰی علیہ واٰلہٖ وسلم انسانوں کے ، جانوروں کے بلکہ شہروں بستیوں کے بُرے نام بدل کر اچھے نام رکھ دیتے تھے ، چنانچہ ایک شخص کا نام تھا ’’اَسْوَد(یعنی کالا)‘‘ حضور انور صلی اللّٰہ تعالٰی علیہ واٰلہٖ وسلمنے اس کا نام اَبْیَض (یعنی سفید)رکھا ، مدینہ منورہ کا نام یَثْرِب(ویرانہ ، خار زار) تھا حضور انورصلی اللّٰہ تعالٰی علیہ واٰلہٖ وسلم نے اس کا نام مدینہ(جمع ہونے کی جگہ)، طَیِّبَہ(بہتر مٹی والا شہر، آفات سے محفوظ شہر)، اَ بْطَح(کشادہ جگہ جہاں سے سیلاب کا پانی گزرتا ہو)، بَطْحَہ(کشادہ زمین )  وغیرہ رکھے  ۔ کفار کے لئے برعکس عمل تھا چنانچہ ’’اَ بُوالْحَکَم‘‘ (دانائی والا) نام تھا حضور صلی اللّٰہ تعالٰی علیہ واٰلہٖ وسلمنے ’’ابوجَہل ‘‘(جہالت والا)رکھا ۔ (مراٰۃ المناجیح، ۶ / ۴۲۰)

صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد

وہ بعض نام جو سرکارِ مدینہ صَلَّی اللّٰہ تَعَالٰی عَلَیْہِ و سَلَّمنے تبدیل فرما دیئے

{۱}ایک صحابی بارگاہِ رسالت میں حاضر ہوئے جن کے چہرے پر زخم کا نشان تھا، رسولِ ثَقَلَین، سلطانِ کونَین صَلَّی اللّٰہ تَعَالٰی عَلَیْہِ و اٰلِہٖ و سَلَّم نے ان سے نام پوچھا ۔  انہوں نے عَرْض کی : مُنْذِرْ(ڈرانے و الا) ۔ فرمایا :  تم  اَشَج(زخمی پیشانی والا) ہو ۔  (اسدالغابۃ، ۲ / ۸۹، رقم : ۱۲۹۷)

{۲}حضرتِ سیِّدُنابَشِیْر بِن خَصَاصِیَّہ رضی اللّٰہ تعالٰی عنہ  کا نام ’’زَحْم‘‘  (رکاوٹ ڈالنے والا)تھا، بَشِیْر (خوشخبری دینے والا) نام رکھا ۔ (اسدالغابۃ، ۱ / ۲۸۹، رقم : ۴۵۵)

{۳}حضرتِ سیِّدُناسِرَاج رضی اللّٰہ تعالٰی عنہ  کا نام فَتْح(کامیابی)تھا، بدل کر سِراج (چراغ)رکھا ۔  (الاستیعاب، ۲ / ۲۴۲، رقم : ۱۱۳۶)

{۴}ایک صحابی کا نام پہلے ’’اَسْوَد(کالے رنگ والا)‘‘تھا، بدل کر اَبْیَضْ (گورے رنگ والا) رکھا ۔ (جمع الجوامع، مسند سہل بن سعد، ۱۴ / ۴۳۹، حدیث : ۱۱۳۴۳)

{۵}حضرتِ سیِّدُنااَبُوالْیَمَان بِشْر یابَشِیر بِن عَقْرَبَہ جُہَنِیِّ رضی اللّٰہ تعالٰی عنہما  اپنے والد کے ساتھ نبی کریم صَلَّی اللّٰہ تَعَالٰی عَلَیْہِ و اٰلِہٖ و سَلَّم کی خدمت میں حاضر ہوئے ، نام پوچھا تو عَرْض کی : بَحِیْر(عِلْم ، مال میں زیادتی والا) ۔ فرمایا : نہیں بلکہ تمہارا نام بشیر(خوشخبری دینے والا) ہے  ۔ (الاصابۃ، ۱ / ۴۳۴، رقم : ۶۷۱)

{۶}حضرتِ سیِّدُنااَبُوعِصَام بَشِیْرحَارِثِی کَعْبِیرضی اللّٰہ تعالٰی عنہ کا نام  اَکْبَر(سب سے بڑا) تھا ۔  آپ صلَّی اللّٰہ تعالٰی علیہ واٰلہٖ وسلَّم نے ارشاد فرمایا :  تم بَشِیْر(خوشخبری دینے والا) ہو ۔  (اسد الغابۃ، ۱ / ۲۸۸، رقم : ۴۵۴)

{۷}حضرتِ سیِّدُنابَکْر بِن جَبَلہ رضی اللّٰہ تعالٰی عنہ کا نام پہلے عَبْد عَمْرو(عمرو کا بندہ)  تھا، رسولِ اکرم، نُورِ مُجَسَّم صَلَّی اللّٰہ تَعَالٰی عَلَیْہِ و اٰلِہٖ و سَلَّم نے آپ کا نامبَکْر رکھا ۔ (جمع الجوامع، مسندبکربن جبلۃ الکلبی ، ۱۴ / ۱۵۵)

{۸} حضرتِ سیِّدُنابَکْر بِن حَبِیْب حَنَفِی رضی اللّٰہ تعالٰی عنہ کا پہلا نام بَرْبَرْ(فضول باتیں کرنے والا )  تھا، نبی کریم صَلَّی اللّٰہ تَعَالٰی عَلَیْہِ و اٰلِہٖ و سَلَّم نے آپ کانام بَرْبَرْ سے بدل کربَکْر رکھا ۔ (الاصابۃ، ۱ / ۴۵۳، رقم : ۷۲۶)

{۹}حضرتِ سیِّدُناحَبِیْب بن حَبِیْب بِن مَرْوَان  رضی اللّٰہ تعالٰی عنہ بطورِ وفد نبی کریم صَلَّی اللّٰہ تَعَالٰی عَلَیْہِ و اٰلِہٖ و سَلَّم کی خدمت میں حاضر ہوئے ، آپ صلَّی اللّٰہ تعالٰی علیہ واٰلہٖ وسلَّم نے ان کا نام دریافت فرمایا، انہوں نے بتایا : بَغِیْض (قابل نفرت)حضور صَلَّی اللّٰہ تَعَالٰی عَلَیْہِ و اٰلِہٖ و سَلَّم نے فرمایا :  تم حَبِیْب (قابل محبت، دوست) ہو ۔  اس کے بعد ان کوحَبِیْب کہا جاتا تھا ۔ (اسدالغابۃ، ۱ / ۳۰۰، رقم : ۴۸۱)

{۱۰}حضرتِ سیِّدُناذُؤَیْب بِن شَعْثَنْ / شعثم تَمِیْمِی عَنْبَرِیْ  رضی اللّٰہ تعالٰی عنہ  نبی کریم صَلَّی اللّٰہ تَعَالٰی عَلَیْہِ و اٰلِہٖ و سَلَّم کی خدمت میں حاضر ہوئے تو آپ نے ان کا نام پوچھا :  انہوں نے عَرْض کی :  اَ لْکُلَاح ۔ (تُرش رُو) نبی اکرم، نورِ مُجَسَّم  صَلَّی اللّٰہ تَعَالٰی عَلَیْہِ و اٰلِہٖ و سَلَّم نے فرمایا :  تمہارا نام ’’ذُؤَیْب‘‘ (بالوں والا)ہے ۔ ان کے لمبے لمبے گیسو تھے  ۔ (اسدالغابۃ، ۲ / ۲۱۸، رقم$&'); container.innerHTML = innerHTML; }