صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد

 (۱۱)ہم عمراسلامی بھائیوں کوپکارنا

          خدائے رحمنعَزَّوَجَل کا فرمانِ عالیشان ہے :

اِنَّمَا الْمُؤْمِنُوْنَ اِخْوَةٌ (پ۲۶، الحجرات : ۱۰)

ترجمۂ کنز الایمان :  مسلمان مسلمان بھائی ہیں ۔

          میٹھے میٹھے اسلامی بھائیو!دنیا کے کسی بھی کونے میں رہنے والا مسلمان چاہے اس سے ہماری کوئی واقفیت یا رشتے داری نہ ہو لیکن مسلمان ہونے کے باعث وہ ہمارا اسلامی بھائی ہے لہٰذا اسے پُکارتے اور اس کا تذکرہ کرتے ہوئے اس کے نام کے ساتھ ’’بھائی‘‘ کہنا مناسب ہے جیسا کہ احمد رضا بھائی، حسن بھائی وغیرہ ۔  اَلْحَمْدُللّٰہعَزَّوَجَل دعوتِ اسلامی کے مدنی ماحول میں یہی طریقۂ کار رائج ہے  ۔ ناواقف مسلمان کو بھائی کہنا صرف نوکِ زبان تک ہی محدودنہیں ہونا چاہیے بلکہ کوشش کرکے اپنے دل میں بھی اس کے لئے بھائی چارے کے جذبات اجاگر کرنا اور اس کے خوشی وغم کو اپنا خوشی وغم سمجھنا چاہیے  ۔

صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد

بلاضرورت دو تین نام ملا کر نہ رکھیں

          پاک وہند کے بعض علاقوں میں والد کے نام کو بیٹے کے نام کا حصہ بنایا جاتا ہے جیسے محمد عارِف جُنید ، ایسے عُرْف پر عمل کرنے میں حرج نہیں لیکن غیر ضروری طور پر دویا تین ناموں پر مشتمل ایک نام نہ رکھا جائے ، اعلیٰ حضرت رحمۃُ اللّٰہ تعالٰی علیہ  لکھتے ہیں : دودوتین تین ناموں پرمشتمل نام رکھنا جیسے محمدعلی حسین اس کابھی رَواجِ سَلَف (یعنی بزرگوں میں رواج)کبھی نہ تھا سادے ایک لفظ کے نام ہوتے تھے ۔ وَاﷲُتعالٰی اَعْلَمُ  ۔ (فتاویٰ رضویہ ، ۲۴ / ۶۶۹)

صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد

نام رکھنے میں مذکر اور مونث کا بھی خیال رکھیں

          بعض اوقات لڑکے کانام لڑکیوں والا اور لڑکی کا نام لڑکوں والا رکھ دیا جاتا ہے ، نام ایسا ہو جسے سُنتے ہی معلوم ہوجائے کہ یہ لڑکی کا نام ہے یا لڑکے کا!مثلاً لڑکی کے لئے خدیجہ اور لڑکے کے لئے قاسِم نام رکھاجائے  ۔

صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد

غیر مسلموں کے لئے مخصوص نام نہ رکھئے

          اعلیٰ حضرت رحمۃُ اللّٰہ تعالٰی علیہلکھتے ہیں :  مسلمان کو ممانعت ہے کہ کافروں کے نام رکھے ’’کَمَا صَرَّحُوْا بِہِ فِی التَّسَمِّی بِیُوْحَنّا‘‘ وغیرہ (جیسا کہ یُوحَنَّا نام رکھنے کے متعلق فقہاء نے تصریح فرمائی ہے ۔ ت)(فتاویٰ رضویہ، ۲۳ / ۲۶۰)ایک اور جگہ نَقْل کرتے ہیں : ناموں کی ایک قسم کفار سیمُخْتَصّ ہے جیسے جِرْجِس، پطْرُس اور یُوْحَنّا وغیرہ لہٰذا اِس نَوع(یعنی قِسم) کے نام مسلمانوں کے لئے رکھنے جائز نہیں کیونکہ اس میں کفار سے مشابہت پائی جاتی ہے ۔ و اللّٰہ تعالٰی اعلم(ت)(فتاوی رضویہ، ۲۴ / ۶۶۳)

صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد

بُرے نام کا اثر

          امیر المومنین حضرتِ سیِّدُنا عمررضی اللّٰہ تعالٰی عنہ نے ایک شخص سے اس کانام دریافت فرمایا : کہنے لگا : میرانام جَمْرَہ (چنگاری)ہے ، فرمایا  : کس کا بیٹا؟ کہا : اِبنِ شِہَاب(آتش پارہ )کا، فرمایا : کن لوگوں میں سے ہے ؟ کہا  : حُرَقَہ (سوزش)میں سے ، فرمایا : تیرا وطن کہاں ہے ؟کہا  : حَرَّۃُ النَّار (آگ کی تپش) میں ، فرمایا : اس کے کس مقام پر ؟کہا : ذَاتِ لَظٰی (شعلہ وار)میں ، فرمایا : اپنے گھر والوں کی خبر لے سب جل گئے ، تو ویسا ہی ہوا جیسا حضرتِ سیِّدُنا عمر فاروق رضی اللّٰہ تعالٰی عنہ نے فرمایا تھا (یعنی اس نے  سارا کنبہ جلا ہواپایا) ۔ ( مؤطا امام مالک، کتاب الاستئذان، باب مایکرہ من الاسماء، ۲ / ۴۵۴، حدیث  : ۱۸۷۱)

صَلُّوا عَلَی الْحَبِیب !                                                                             صلَّی اللّٰہُ تعالٰی علٰی محمَّد