۱؎  ظاہر یہ ہے کہ بعض صحابہ نے یہ جواب دیا اور بعض نے عرض کیا  اﷲ ورسولہ اعلم! یا یہ کوئی دوسرا واقعہ ہے لہذا یہ حدیث اس کے خلاف نہیں کہ صحابہ نے اﷲ و رسولہ اعلم کہا۔حج اکبر کے بہت سے معانی ہیں:(۱) بقر عید کا دن حج اکبر ہے کیونکہ اکثر ارکان حج اسی دن میں ہوتے ہیں،رب تعالٰی فرماتاہے:" وَ اَذٰنٌ مِّنَ اللہِ وَرَسُوۡلِہٖٓ اِلَی النَّاسِ یَوْمَ الْحَجِّ الۡاَکْبَرِ"۔یہ اعلان بقرعید کے دن منٰی میں ہوا۔(۲) یا نویں عید کا دن حج اکبر کا دن ہے کہ اسی دن قیام عرفات ہے جو حج کا رکن اعلٰی ہے(۳) یا صرف حضور انور صلی اللہ علیہ و سلم کا حج حج اکبر تھا کہ رسول اکبر نے حج فرمایا تھا اور حسن اتفاق سے اس دن یہود،نصاریٰ مجوسی وغیرہ کی چھ عیدیں جمع ہوگئیں تھیں (۴) یا جب نویں بقر عید جمعہ کوواقع ہو کہ اس کا ثواب ستر^۷۰ حج کے برابر ہے یہ زیادہ مشہور ہے اور حضورا نور صلی اللہ علیہ و سلم کا حج بھی جمعہ ہی کا ہوا تھا(۵)یا ہر حج اکبر ہے اور عمرہ حج اصغر غرضکہ اس کے بہت معانی ہیں(مرقات،لمعات،اشعہ)

۲؎ یعنی جیسے مکہ معظمہ میں ان حج کی تاریخوں میں احرام کی حالت میں گناہ کرنا حرام کہ اس گناہ میں حرم شریف،مبارک تاریخ اور احرام کی بے حرمتی تین جرم اور شامل ہوجاتے ہیں،ایسے ہی کسی مسلمان بھائی کا ناحق خون کرنا،مال مارنا،بے آبروئی کرنا بہت سے جرموں کا مجموعہ ہے کہ اس میں اس مظلوم بندہ کی حق تلفی بھی رب تعالٰی کی قانونی شکنی اور میرے مخالفت ہے مجھے اپنی امت بہت عزیز ہے،اسے ستانے والا مجھے کب پیارا ہوسکتا ہے۔

۳؎ یعنی خود کشی نہ کرے کہ یہ اپنی جان پرظلم و زیادتی ہے یا دوسرے مسلمانوں پرظلم نہ کرے کہ یہ درحقیقت اپنے پر ظلم ہے،رب تعالٰی فرماتاہے:"لَا تَقْتُلُوۡۤا اَنۡفُسَکُمْ"یعنی اپنے کو قتل نہ کرو یعنی بعض بعض کو قتل نہ کرے۔لا یَجنِی صیغہ تو نفی کا ہے مگر بمعنی نہی ہے،جیسے"لَا یَمَسُّہٗۤ اِلَّا الْمُطَہَّرُوۡنَ"یا جیسے رحمہ اﷲ یا غفرلہ کہ سب خبریں بمعنی انشاء ہیں۔

۴؎ یہ جملہ یا تو نہی ہے تو معنے یہ ہیں کہ ماں باپ اولاد پر ظلم نہ کریں کہ ان کا حق نہ دیں،انہیں تعلیم وغیرہ سے محروم رکھیں اور اولاد ماں باپ پرظلم نہ کرے کہ ان کا ادائے حق خدمت نہ کرے یا بمعنی نفی یعنی ماں باپ کے جرم میں اولاد گرفتار نہ ہوگی اور اولاد کے جرم میں ماں باپ کو پکڑ نہ ہوگی اپنی کرنی،اپنی بھرنی"اَلَّا تَزِرُ وَازِرَۃٌ وِّزْرَ اُخْرٰی"اہل جاہلیت باپ کا بدلہ اولاد سے اور اولاد کا بدلہ ماں باپ سے لیتے تھے اسی سے ممانعت ہے۔

۵؎ شیطان کو پوجنے سے مراد بت پرستی ہے اور اس میں غیبی خبر ہے،ان شاءاﷲ مکہ معظمہ میں تا قیامت شرک و بت پرستی نہ ہوگی۔مرقات نے فرمایا کہ علانیہ نہ ہوگی کوئی خفیۃً وہاں جاکر چھپ کر بت پرستی کرے تو اس کی بدنصیبی ہے،غرضکہ یہ جگہ شرک سے محفوظ ہے۔

۶؎ یعنی مکہ معظمہ میں مسلمان گناہ،لڑائی،چوری،غیبت جھوٹ وغیرہ کرلیا کریں گے اور شیطان اس پر خوش ہوجایا کرے گا کہ میں ان سے کفر تو نہ کراسکا یہ غنیمت ہے یا سارے مسلمانوں سے روئے سخن ہے کہ مؤمن کے گناہوں سے شیطان راضی ہے اور کافر کے کفر سے راضی اسی لیے جھوٹ،خیانت دوسرے گناہ مسلمانوں میں زیادہ ہیں دوسری قوموں میں کم کہ شیطان کفار سے جب کفر کرالیتا ہے تو پھر دوسرے گناہ کرانے کی کوشش نہیں کرتا مگر جب مسلمانوں سے کفر نہیں کراسکتا تو ان سے دوسرے گناہ کرانے کی بہت کوشش کرتا ہے،ہمیشہ چور بھرے گھر میں جاتا ہے جس میں ہو ہی کچھ نہیں وہاں چور لے گا کیا۔حضرت علی رضی اللہ تعالٰی عنہ فرماتے ہیں کہ جس