عبادت کا شوق پیدا کرنے کے طریقے

سُوال : کیا عبادت کا شوق پیدا کیا جاسکتا ہے؟

جواب : جی ہاں! عبادت کا شوق پیدا کیا جاسکتا ہے۔ عبادت کا شوق پیدا کرنے کے لئے عبادت کے فضائل پڑھیں۔ اسی طرح عبادت گزاروں کی صحبت میں رہیں ، کیونکہ جس کی صحبت میں رہیں گے اس کا اثر پڑے گا ، کھلاڑیوں کے ساتھ رہیں گے تو کھیلنے کا شوق بڑھے گا ، ایکٹروں کی سَنگت ہوگی تو ایکٹنگ کا جوش پیدا ہوگا ، نعت خوانوں کے ساتھ رہیں گے تو پیارے آقا صَلَّی اللّٰہُ عَلَیْہِ وَاٰلِہٖ وَ سَلَّم کی ثنا خوانی کریں گے ، قاریوں کے ساتھ رہیں گے تو تلاوت کرنے والے بنیں گے ، علما کی صحبت میں رہیں گے تو علم دین حاصل کرنے کا جذبہ پیدا ہوگا اور  عبادت گزاروں کی صحبت میں رہیں گے تو عبادت کا شوق پیدا ہوگا۔ البتہ یہ دیکھنا ضروری ہے کہ عبادت گزار کا عقیدہ اور عمل دونوں دُرُست ہوں ، بلکہ عقیدہ اور عمل تو ہر جگہ دُرُست ہونا ضروری ہے۔ اگر کوئی مخلص ، نیک اور عاشقِ رسول بندہ مل جائے تو اُس کی صحبت دونوں جہاں کے لئے سعادت ہے ، کیونکہ اس کی صحبت سے عبادت کا شوق پیدا ہوجائے گا۔ اگر کوئی ایسا بندہ نہیں ملتاتو ایسی کتابیں پڑھیں جن سے عبادت کا شوق پیدا ہو ، جیسے احیاءالعلوم ، ^([1]) منہاج العابدین ، ^([2]) فیضانِ سنّت (جلد اول) ^([3]) اور  نیکی کی دعوت^([4]) وغیرہ۔ ان کے عِلاوہ مکتبۃ المدینہ کی اور  بہت ساری کتابیں ہیں جن میں  عبادات کاایسا تذکرہ اور فضائل موجود ہیں جنہیں پڑھ کر آدمی کے مُنہ میں پانی آجائے۔ ان کتابوں کو پڑھنے سے اِنْ شَآءَ اللّٰہ دل میں عبادت کرنے کا جذبہ بڑھے گا۔

خون کی چھینٹ لگے کپڑے میں نماز کا مسئلہ

سُوال : میں مرغی کے گوشت کا کام کرتا ہوں۔ اگر خون کی چھینٹ میرے کپڑے یا جسم پر آجائے  تو کیا میرا نماز پڑھنا جائز ہے یا ناجائز ہے؟

جواب : مرغی یا بکری کو ذبح کرتے وقت جو خون نکلتا ہے وہ ناپاک ہوتا ہے۔ ^([5]) اگر کپڑے یا جسم پر اتنا خون لگ گیا جس کی شریعت میں ممانعت ہے  تو نماز نہیں ہوگی^([6]) اور اگر معمولی سی چھینٹ پڑی جو نماز نہ ہونے والی حد تک نہیں ہے تو نماز ہوجائے گی۔ لیکن اس کو دھو کر  یا دوسرا پاک کپڑا پہن کر نماز لوٹانا (یعنی  دوبارہ پڑھنا) سنّت ہے۔ ^([7])اس کی کچھ تفصیل مکتبۃ المدینہ کے رسالے “ کپڑے پاک کر نے کا طر یقہ “ ^([8])میں مل جائے گی۔ مزید تفصیل کے لئے بہار ِ شریعت^([9]) کے دوسرے حصّے کا مطالعہ فرمائیں۔

اوپر والے باتھ روم  کا پانی نیچے والے گھر میں ٹپکے تو کیا  کیا جائے؟

سُوال : فلیٹوں میں بسا اوقات یہ Problem  ہوتی ہےکہ اوپر کی منزل والے باتھ روم کے فرش سے پانی رستا ہوا نیچے والے گھر کی چھت سے ٹپکنا شروع ہوجاتا ہے ۔ اس پانی کا کیا حکم ہوگا؟ (SMS کے ذریعے سُوال)

جواب : پانی کے بارے میں جب تک ناپاک ہونے کی یقینی معلومات نہ ہو اُسے ناپاک نہیں کہہ سکتے۔ ^([10]) جس کا باتھ روم ہے اس پر لازم ہے کہ اس کوبنائے اور نیچے کی منزل میں رہنے والوں کو جو تکلیف ہوئی ان سے معذرت بھی کرے۔ اس سے محبت بڑھے گی اور تعلقات بھی اچھے رہیں گے۔ اگر یوں کہیں گے کہ “ پانی آپ کے گھر میں گررہا ہے ، ہم کیا کریں! خود ہی سنبھالو۔ “ تو اس سے لڑائی بھی ہوگی اوراس طرح کہنا  دُرُست بھی نہیں ہوگا ، کیونکہ نیچے والے کو آپ کی وجہ سے تکلیف ہورہی ہےاور یہ تکلیف آپ ہی دُور کریں