سُوال: کنیت کا کیا مَطلب ہے؟

جواب: اصل نام کے علاوہ وہ نام جس سے پہلے اَبُو ، اِبن ، اُم یا  بِنت وغیرہ موجود ہو اس کو “  کنیت “ کہا جاتا ہے^([1]) جیسے اِبنِ ہشام ، اُمِّ ہانی ، بنتِ حوّا۔  کنیت کبھی باپ کی نسبت سے رکھی جاتی ہے کبھی بیٹے یا بیٹی کی  نسبت سے رکھی جاتی ہے۔  

پڑوسیوں کے حقوق

سُوال: جس طرح ہمیں اپنے والدین اور بہن بھائیوں کا خیال رکھنا چاہیے کیا اس طرح پڑوسیوں کا بھی خیال رکھنا چاہیے؟  کیا پڑوسیوں کے بھی حقوق ہوتے ہیں؟ (UK کے ایک اسلامی بھائی کا سُوال)

جواب:جس طرح ماں باپ کے حقوق ہیں اسی طرح بہن بھائی ، اَولاد اور اَولاد کی ماں کے بھی حقوق ہیں ، یوں ہی پڑوسیوں کے بھی حقوق ہیں۔ پڑوسیوں کی تین قسمیں ہیں : (1)پڑوسی بھی ہے اور رِشتہ دار بھی ، اس کے ساتھ حقِ پڑوس بھی وابستہ ہے اور حقِ رِشتہ داری بھی تو اس سے صِلۂ رحمی بھی کرنی ہو گی اور اگر مسلمان ہے تو حقِ اِسلام کا پاس بھی رکھنا ہو گا۔ (2) صرف پڑوسی ہے اور مسلمان ہے تو اس کے ساتھ دو حق وابستہ ہیں ایک حقِ اِسلام اور دوسرا حقِ پڑوس۔ (3) اگر غیر مسلم ہے تو صرف حقِ پڑوس ہے۔ ⁽²⁾

صحیح بخاری اور مُسلم میں حضرتِ سَیِّدُنا ابوہریرہ   رَضِیَ اللّٰہُ  عَنْہُ   سے رِوایت ہے کہ رَسُوْلُ اللہ   صَلَّی اللّٰہُ عَلَیْہِ وَاٰلہٖ وَسَلَّم   نے اِرشاد فرمایا : خُدا کی قسم وہ مؤمن نہیں ، خُدا کی قسم وہ مؤمن نہیں ، خُدا کی قسم وہ مؤمن نہیں!عرض کی گئی : یَارَسُوْلَ اللہ   صَلَّی اللّٰہُ عَلَیْہِ وَاٰلہٖ وَسَلَّم   کون(مومن نہیں)؟فرمایا : وہ شخص جس کے پڑوسی اس کی آفتوں سے محفوظ نہ ہوں یعنی وہ شخص جو اپنے پڑوسیوں کو تکلیف دیتا ہے۔ ⁽³⁾میر ے آقا   صَلَّی اللّٰہُ عَلَیْہِ وَاٰلہٖ وَسَلَّم   نے تین بار قسم اِرشاد فرمائی اور تاکیداً فرمایا کہ وہ مؤمن  نہیں ہے۔ اِس کا مَطلب ہے جو شخص پڑوسیوں کو تکلیف دے اور وہ اس سے محفوظ نہ ہوں تو یہ شخص کامل اِیمان والا نہیں ہے۔ ^([2])آج کل اپنے پڑوسیوں کو طرح طرح سے تنگ کیا جاتا ہے ، کبھی ڈسٹ بن سے کچرے کی تھیلی اُٹھاکر چپکے سے اس کے دَروازے کے آگے رکھ کر بھاگ جاتے ہیں ، کبھی اس کے دَروازے کے آگے پانی بہا کر تکلیف دیتے ہیں ، اگر چند منزلہ عمارت ہے تو آرام  کے وقت میز کُرسیاں گھسیٹ کر آرام میں خَلل ڈالتے ہیں یا بچے زور زور سے شور شرابا کرتے ہوئے کھیلیں گے ، چیزیں پھینکیں گے تو دِیگر گھر والے انہیں روکیں گے نہیں اور دوسری منزل والے کی آنکھ کھل جائے گی ، کبھی اس بے چارے کا پانی بند کر دیں گے تو کبھی بارش کے پانی کا رُخ اس کی طرف کر دیں گے ، کوئی چیز جھاڑیں گے تو دھول اس بے چارے کے گھر میں جانے دیں گے ، نہ جانے پڑوسیوں کو کیسی کیسی تکلیفیں دیں گے اور جب وہ بے چارہ فریاد لے کر آئے گا تو اس کی کوئی شِنوائی بھی نہیں ہو گی۔ غور کر لیجیے! پڑوسی کو تکلیف دینے کی کتنی بڑی خرابی اور بَدنصیبی ہے۔

صحیح مُسلم میں حضرتِ سَیِّدُنا اَنَس   رَضِیَ اللّٰہُ  عَنْہُ   سے رِوایت ہے کہ رَسُوْلُ اللہ   صَلَّی اللّٰہُ عَلَیْہِ وَاٰلہٖ وَسَلَّم   نے فرمایا : وہ جنَّت میں نہیں جائے گا جس کا پڑوسی اس کی آفتوں سے امن میں نہیں۔ ⁽²⁾یعنی جو پڑوسیوں کو تکلیف دیتا ہےاور اس کے پڑوسی اس سے امن میں نہیں ہوتے وہ جنَّت میں نہیں جائے گا۔

یاد رَکھیے!اِس طرح کی اَحادیثِ مُبارَکہ کا مَطلب یہ ہوتا ہے کہ اگر خاتمہ اِیمان پر ہوا تو سزا پانے کے بعد جنَّت میں جائے گا۔ ⁽³⁾اگر اللہپاک چاہے تو بے حِساب بخش دے یہ اس کی رَحمت ہے ، تاہم یہ وعیدیں  معمولی نہیں ہیں۔

 اگر پڑوسی کو ستایا اور اس کی بَددُعا لگ گئی اور اس  کی وجہ سے اِیمان بَرباد ہوگیا تو کبھی بھی جنَّت میں داخلہ نہیں ملے گا بلکہ ہمیشہ جہنم میں رہے گا۔ ہم بُرے خاتمے سے اللہپاک کی پناہ مانگتے ہیں۔ اپنا ذہن بنا لیجیے کہ کبھی بھی پڑوسی کو تکلیف نہیں دینی حتّٰی کہ اگر وہ تکلیف پہنچائے تب بھی صبر ہی کرنا ہے اِسی میں عافیت ہے۔

پڑوسیوں کو تکلیف دینا گوارا   نہ کیا (حکایت)

سُوال:پڑوسیوں کے حقوق کے مُعاملے میں پہلے کے لوگوں  کا کیا طرزِ عمل تھا؟ ^([3])