اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہِ الرَّحْمٰنِ الرَّ حِیْم ^ط

مَدَنی قَلم کی انوکھی حِکایت ^([1])

شیطان لاکھ سُستی دِلائے یہ رِسالہ(۲۰صَفحات) مکمل پڑھ لیجیے اِنْ  شَآءَ اللّٰہ  معلومات کا اَنمول خزانہ  ہاتھ آئے  گا۔

دُرُود شریف کی فضیلت

فرمانِ مصطفےٰ   صَلَّی اللّٰہُ عَلَیْہِ وَاٰلہٖ وَسَلَّم    : جو مجھ پر ایک دِن میں ایک ہزار(1000) بار دُرُودِ پاک پڑھے گا وہ اس وقت تک نہیں مَرے گا جب تک جنَّت میں اپنا مقام نہ دیکھ لے۔ ^([2])

صَلُّوْا عَلَی الْحَبِیْب!                                                                                               صَلَّی اللّٰہُ عَلٰی مُحَمَّد

مَدَنی قلم کی انوکھی حکایت

سُوال:کوئی ایسی حکایت بیان فرما دیجیے جس میں دَربارِ رِسالت سے ملنے والے تحفے کا ذِکر ہو۔ ^([3])

جواب:مشہور مُفَسِّر مفتی احمد یار خان   رَحْمَۃُ اللہِ عَلَیْہ   اِرشاد فرماتے ہیں : مجھے مدینۂ منورہ   زَادَہَا اللّٰہُ شَرَفًاوَّتَعْظِیْماً      میں دکان پر ایک قیمتی قلم بڑا پسند آیا ، میرے دِل میں خواہش پیدا ہوئی کاش! میرے پاس یہ قلم ہوتا ، مگر مہنگا ہونے کی وجہ سےمیں خرید نہ سکا اور چُپ چاپ لوٹ آیا ، لیکن دِل میں بار بار خیال آتا رہا کہ بارگاہِ رِسالت سے اِجازت ملی تو حاضری کی سعادت حاصِل ہوئی ، اگر اسی بارگاہ سے وہ قلم بھی عطا ہو جائے تو کرم بالائے کرم ہو گا۔ غالباً اسی دِن یا اگلے دِن ظہر کی نماز مسجدِنبوی شریف   عَلٰی صَاحِبِہَا الصَّلٰوۃُ وَالسَّلَام   میں ادا کر کے فارغ ہوئے تو ایک صاحب ملاقات کے لیے آئے اور یہ کہتے ہوئے اپنی جیب میں ہاتھ ڈالا کہ میں آپ کے لیے تحفہ لایا ہوں ، ہاتھ باہر نکال کر وہ تحفہ میرے سامنے رکھ دیا ،  اب جو میں نے نظر اُٹھائی تو

سامنے وہی مَدَنی قلم تھا حالانکہ میں نے کسی سے بھی اِس کا  تَذکرہ نہیں کیا تھا۔ مجھے یقین ہو گیا کہ بارگاہِ رسالت میں میری عرض سُن لی گئی ہے جبھی تو مجھے میری خواہش کے مُطابق چیز مل گئی۔ اِس کے بعد مفتی صاحب نے فرمایا : اب میں نے اس “ مَدَنی قلم “ کو صِرف تفسیر لکھنے کے لیے خاص کر لیا ہے۔ ^([4])اِس قلم کو “ مَدَنی قلم “ کہنا میرا اِضافہ ہے۔

مانگیں گے مانگے جائیں گے مُنھ مانگی پائیں گے

                                                                                                                                                                                              سرکار میں نہ ’’لَا‘‘ ہے نہ حاجت ’’اگر‘‘ کی ہے (حدائقِ  بخشش)

”غلام رَسُول“ نام رکھنا کیسا؟

سُوال: اگر کوئی کہے : “ غلام رَسُول “ نام رکھنا جائز نہیں کیونکہ ہم رَسُول کے اُمَّتی ہیں ، کیا ایسا کہنا جائز ہے؟

جواب: “ غلام رَسُول “ نام رکھنا جائز ہے۔ آقا اور غلام کا دور بہت پُرانا ہے پہلے کے دور میں غلام بکتے تھے اور سرکار    صَلَّی اللّٰہُ عَلَیْہِ وَاٰلہٖ وَسَلَّم   کے دور میں بکتے تھے ، آپ صَلَّی اللّٰہُ عَلَیْہِ وَاٰلِہٖ وَ سَلَّم کے وِصالِ ظاہری کے بعد بھی بکتے رہے نیز قرآنِ پاک میں بھی غلاموں کا ذِکر ہے ، اس کے علاوہ بھی کئی جگہ  غلام  اور  کنیزوں کا ذِکر ملے گا۔ بہرحال یہ کیسے ممکن ہے کہ عام آدمی کا تو غلام ہو مگر مصطفےٰ کریم   صَلَّی اللّٰہُ عَلَیْہِ وَاٰلہٖ وَسَلَّم    کا غلام نہ ہو سکتا ہو۔

رَسُوْلُ اللہ   صَلَّی اللّٰہُ عَلَیْہِ وَاٰلہٖ وَسَلَّم   کے غلام کی شان(حکایت)

حضرتِ سَیِّدُنا سفینہ   رَضِیَ اللّٰہُ  عَنْہُ   صحابئ رَسُول ہیں ، ایک مَرتبہ اپنے قافلے سے بِچھڑ کر جنگل میں اکیلے رہ گئے اور اپنے ساتھیوں کو تلاش کرنے لگے کہ اچانک ان کے سامنے شیر آ گیا ، ان کو شیر سے کیا ڈر لگنا تھا  شیر خود نبی کے اس غلام کو دیکھ کر کانپ اُٹھا!حضرتِ سَیِّدُناسفینہ   رَضِیَ اللّٰہُ  عَنْہُ  نے شیر کو مخاطَب کرکے کہا : “ یَا اَبَا الْحَارِث اَنَا مَوْلٰی رَسُوْلِ اللہ یعنی اے ابوالحارث! تم جانتے ہو میں کون ہوں؟ میں رَسُوْلُ اللہ کا غلام ہوں۔ “ اَبُوالحارِث شیر کی کنیت ہےان کی یہ بات سُن کر شیر دُم ہلاتا ہوا چلا ، یہ اس کی طرف سے اِشارہ تھا کہ آپ میرے پیچھے پیچھے چلیں ، آپ   رَضِیَ اللّٰہُ  عَنْہُ   اس کے پیچھے ہولیے تو اس نے آپ کو بِچھڑے ہوئے ساتھیوں سے ملا دیا۔ ⁽²⁾

ان کے جو غُلام ہو گئے                     خَلق کے اِمام ہو گئے

کنیت کسے کہتے ہیں؟