فَبِمَا  رَحْمَةٍ  مِّنَ  اللّٰهِ  لِنْتَ  لَهُمْۚ-وَ  لَوْ  كُنْتَ  فَظًّا  غَلِیْظَ  الْقَلْبِ  لَا  نْفَضُّوْا  مِنْ  حَوْلِكَ۪

ترجمۂ کنز الایمان : توکیسی کچھ  اللہ  کی مہربانی ہے کہ اے محبوب تم ان کے لئے نرم دل ہو ئے اور اگر تندمزاج سخت دل ہوتے تو وہ ضرور تمہارے گرد سے پریشان ہوجاتے ۔

         اس آیتِ کریمہ سے اندازہ لگائیے کہ اگر ہم اسلامی بھائیوں کے ساتھ بدسُلُوکی و بداَخْلاقی ، بات بات پر ان کی تَضْحِیک وتَذْلِیل کریں ، مشورہ لیں اور نہ ہی حوصلہ افزائی کریں تو ماتحت اسلامی بھائی کس طرح مدنی کاموں کو دُھن کے ساتھ کر سکے گا ۔   

        سیدی اعلیٰ حضرت، عظیم البرکت، مجددِ دین و ملّت، پروانۂ شمعِ رِسالت ، عاشقِ ماہِ نبوت، باعثِ خیرو برکت الحاج، الحافظ، القاری ، الشاہ امام احمد رضا خان  عَلَیْہِ رَحْمَۃُ الرَّحْمٰن’’حدائقِ بخشش‘‘ شریف میں کیا خوب فرماتے ہیں ۔

دُشمنوں کی آنکھ میں بھی پُھول تم

دوستوں کی بھی نظر میں خار ہم

ہَلْکِی پُھلْکِی عِبادت

        رحمت والے آقا، مکے مدینے والے مصطفی، سب کے حاجت روا و مُشکل کُشا صَلَّی  اللہ  تَعَالٰی عَلَیْہِ وَاٰلِہٖ وَسَلَّمَ کا فرمانِ دِلکُشا ہے : ’’ کیا میں تُمہیں آسان ترین اورجِسْم کے لئے ہلکی پھلکی عِبادت نہ بتاؤں ؟وہ ہے ’’خاموشی اورحُسْنِ خُلْق۔‘‘( الصمت لابن ابی دنیا، الحدیث۲۷، ج۷، ص۴۷)

اللّٰہ عَزَّ وَجَلَّ کا محبوب بندہ

        ایک روایت میں یوں ہے کہ سرکار صَلَّی  اللہ  تَعَالٰی عَلَیْہِ وَاٰلِہٖ وَسَلَّمَ کی بارگاہ میں عرض کی گئی کہ یارسول  اللہ  عَزَّ وَجَلَّ و صَلَّی  اللہ  تَعَالٰی عَلَیْہِ وَاٰلِہٖ وَسَلَّمَ   بندوں میں  اللہ  تَعَالٰی  کو سب سے زیادہ محبوب کو ن ہے؟ ارشاد فرمایا’’جو اَخْلاق میں سب سے اچھّے ہوں ‘‘۔ (صحیح ابن حبان، الحدیث۴۸۶، ج۱، ص۳۵۲)   

دُعائے مُصطفٰی  صَلَّی  اللہ  تَعَالٰی عَلَیْہِ وَاٰلِہٖ وَسَلَّمَ

        رحمتِ عالم، نبی ٔ مکَرّم، حبیبِ ربِّ اکرم عَزَّ وَجَلَّ و صَلَّی  اللہ  تَعَالٰی عَلَیْہِ وَاٰلِہٖ وَسَلَّمَ  ْیہ دُعا فرمایاکرتے۔’’ اَللّٰھُمَّ اِنِّیْ اَعُوْذُ بِکَ مِنَ الشِّقَاقِ وَالنِّفَاقِ وَ سُوٓئِ الْاَخْلَاقِ ترجمہ : اے اللّٰہ  عَزَّ وَجَلَّ میں تیری پناہ مانگتا ہوں مُنافَرت (لوگوں سے نفرت کرنا)، مُنافقت سے اور بُرے اخلاق سے ۔‘‘(سنن ابی داؤد کتاب الوتر، باب فی الاستعاذۃ، الحدیث۱۵۴۶، ج۲، ص۱۳۰)

ساری بھلائیاں اور ساری بُرائیاں

        اِن آیات و احادیث کی وضاحت سے اندازہ لگائیے کہ ساری کی ساری بھلائیاں حُسنِ اخلاق میں اور ساری کی ساری بُرائیاں بد اَخْلاقی میں پوشیدہ ہیں ۔ جس طرح حُسْنِ اَخْلاق کے ذریعے لوگوں کے دلوں میں محبت پیدا ہوتی اورعزت ملتی ہے اِسی طرح بد اَخْلاقی لوگوں کی نظر سے گراتی اور بے عزّت کراتی ہے ۔ اب جو (نادان) ذمہ دار ماتحت کی نظروں میں گر جائے تووہ بھلا کِس طرح تقسیم کاری کے بھرپور مدنی نتائج حاصل کر سکے گا ۔لِہٰذا نگران و ذمہ دار کو ہر اُس عادت سے اِجتنا ب کرناچاہیئے کہ جس سے اُس کے ماتحت اسلامی بھائیوں میں مُنافَرت (مُ۔نا۔فَ۔رَت) یعنی نفرت پھیلے اور وہ دُور بھاگیں یا اُس کی بات محض منصب اور دُنیوی اَغْراض ومقاصِد کے حُصُول کے لئے مانیں ۔اگر ایسا ہوا تو ہم ’’دعوتِ اسلامی‘‘ کے مدنی کاموں کی رُوحانی برکات سے محروم اور اِستقامت کھو سکتے ہیں ۔

         اے کاش! ہمیں فرائض و واجبات و سُنَن ومُستحبات کے ساتھ ساتھ حُسنِ اخلاق کی برکات اورزبان کا زبر دست قُفلِ مدینہ نصیب ہوجائے ۔ہم سَنجیدہ اور باوقار بن کر اسلامی بھائیوں میں مدنی کاموں کی تقسیم اور اِس کے تقاضوں کو بجالائیں تو دعوتِ اسلامی کے مدنی کاموں کی ترقیوں کی وہ مدنی بہاریں دیکھنا نصیب ہوں گی کہ ہماری آنکھیں ٹھنڈی ہو جائیں گی ۔اِنْ شَآءَ اللّٰہ  عَزَّ وَجَلَّ

رَفتار کا، گُفتار کا، کِردار کا دے دے

       ہر عُضْو کا دے مجھ کو خُدا قُفلِ مدینہ  ( عَزَّ وَجَلَّ )

(ارمُغانِ مدینہ از امیرِ اہلسُنّت دَامَتْ بَرَکاتُہُمُ الْعَالِیَہ )

تقسیم کاری کاعمل حُسنِ اَخْلاق کے بِغیر کامل نہ ہوگا

         تقسیم کاری کے عمل کو کامیابی سے ہمکنار کرنے کا ایک تقاضا یہ بھی ہے کہ جِسے مدنی کام سُِپرد کیا جارہا ہے اُس کو نہ صرف اُس مدنی کام بلکہ اُس تقسیم کرنے والے سے بھی پیار اور محبت ہو اور یقیناً یہ حُسنِ اخلاق کے بِغیر ممکن نہیں ۔آہ !کاش!  ایسا کرم ہو کہ ہمیں خُلقِ عظیم سے حصّہ نصیب ہو جائے۔   

ترا خُلق سب سے اعلیٰ          تِرا حُسن سب سے پیارا

فِداتجھ پہ سب زمانہ          مدنی مدینے والے  (  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ )

اے حبیب ربِّ باری        ہے گُنہ کا بوجھ بھاری

تُمہِیں حشر میں چُھڑانا       مدنی مدینے والے   (  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ )

میں اگرچہ ہوں کمینہ        تِرا ہوں شہہِ مدینہ

مجھے سینے سے لگانا           مدنی مدینے والے    (  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ )

 یہ مریض مر رہا ہے          تِرے ہاتھ میں شفاء ہے