” مکہ کمپیوٹر“ بن کر بھی آئے تھے ۔ گزشتہ دنوں روڈ ایکسیڈنٹ میں ان کا انتقال ہوگیا ہے آپ ان کے لیے اور ان کے والدین کے لیے دعا فرما دیجیے ۔ (مدنی گلدستہ دکھاکر سوال کیا گیا)

جواب: اِنَّا لِلّٰهِ وَ اِنَّاۤ اِلَیْهِ رٰجِعُوْنَ ^۔ اللہ پاک فرحان کے درجے بلند فرمائے ، ان کے والدین کو صبر دے اور ان کو والدین کے لیے ذخیرہ کرے ۔ اولاد کا غم  ہمیشہ باقی رہتا ہے اگرچہ کچھ کم ہوجاتا ہے مگر  اس کی کوئی چیز نظر آتی ہے تو  پھر غم تازہ ہوجاتا ہے لیکن ان کو صبر کرنا چاہىے ۔ اگر ىہ بچہ ہجرى سن کے حساب سے ساڑھے گىارہ سال کا تھا تو اسے نابالغ ہى کہىں گے اور نابالغ بچہ فوت ہوجائے تو وہ اپنے والدین کے لىے ذخىرہ بنتا، شفاعت کرنے والا ہوتا ^([1])اور جنت مىں لے جانے والا ہوتا ہے  اور یہی بچہ اپنے والدین کو جہنم سے بچاتا اور ان کے لیے جہنم سے رکاوٹ بن جاتا ہے ۔ ^([2]) بلکہ ىوں سمجھیے کہ نابالغ بچے کا دنىا سے جانا  والدىن کے حق مىں بہت بڑى نعمت ہوتا ہے لہٰذا صبر کریں کیونکہ صبر کے بغىر کوئی چارہ  نہىں ۔

صبراول صدمے پر ہے

صبر اول صدمے پر ہوتا ہے یہ نہیں کہ جو کچھ واویلاکرنا تھا وہ کرنے کے بعد کہیں: اب کیا کریں صبر ہی کیا ہے ۔ تو یہ صبر نہیں ہے ۔ جب کبھی کوئی صدمہ آئے تو بندہ اسی وقت صبر کرے اور خاموش رہے کوئی بے صبری والا جملہ زبان سے نہ نکالے یہ صبر ہے ورنہ تھوڑے عرصے بعد تو صبر آہی جاتا ہے ۔ حدىثِ پاک مىں ہے : صبر اول صدمے پر ہوتا ہے بعد مىں تو صبر آ ہى جاتا ہے ۔ ^([3])صبر کىجئے اور اللہ پاک کى رضا پر راضى رہىے ، آپ کا بىٹا گیارہ سال چھ مہینے  کا تھا مىدانِ کربلا مىں تو حضرتِ سَیِّدُنا على اصغر رَضِیَ اللّٰہُ  عَنْہُ صرف چھ مہىنے کے تھے اور جس انداز مىں ان کى شہادت ہوئى وہ کتنا دردناک حادثہ ہے کہ شدتِ پىاس سے زبان اور حلق سوکھ گئے تھے اور اسى حلق پر ظالموں نے تىر چلاىا اور امام عالی مقام حضرتِ سَیِّدُنا امام حسىن رَضِیَ اللّٰہُ  عَنْہُ کى گود میں آپ رَضِیَ اللّٰہُ  عَنْہُ نے دم توڑا اورجامِ شہادت نوش فرماىا ۔ ^([4]) وہ صدمہ کتنا بڑا ہوگا کہ حضرتِ سَیِّدُنا امام حسین رَضِیَ اللّٰہُ  عَنْہُ خود بھى تىن دن کى بھوک اور پىاس میں مبتلا ہیں اور جوان بىٹے حضرتِ سَیِّدُنا على اکبر رَضِیَ اللّٰہُ  عَنْہُ شہىد ہوچکے ہیں، پھر پاک بیبیوں کا  صدمہ الگ تو ان صدموں کے مقابلے مىں ہمارا صدمہ بہت کم ہے بلکہ ىوں کہہ سکتے ہىں کہ ہمارا صدمہ تو کچھ بھى نہىں ہے لہٰذا  ہمیں بھی ہر چھوٹے بڑے صدمے پر صبر ہی کرنا چاہیے ۔ بخارى شرىف کی حدیث ہے : اللہ پاک فرماتا ہے جب مىں اپنے مومن بندے سے اس کى کوئى دنىوى  پسندىدہ چىز لے لوں پھر وہ صبر کرے تو مىرے پاس اس کى جزا جنت کے سوا کچھ نہىں ۔ ^([5])فتح الباری میں اس حدیث پاک کی یہ شرح کی گئی ہے کہ کسی شخص کے  ماں باپ، بھائى بہن، بىوى اور اولاد مىں سے کوئى اىسا انسان فوت ہوجائے جس سے وہ محبت کرتا ہو، اور اس کے فوت ہونے پر صبر کرے تو اللہ پاک اسے  جنت عطا فرمائے گا ۔ ^([6])

بارش روکنے کے لیے جانوروں پر ظلم کرنا کیسا؟

سُوال: بعض علاقوں میں یہ ماحول ہے کہ جب ان کی فصل تیار ہو اور اچانک بارش یا طوفان کی پیشن گوئی ہوجائے تو یہ لوگ اپنے جانوروں کو زمین میں گاڑ دیتے ہیں کیونکہ ان لوگوں کا خیال ہے کہ ”اگر ہم ان بے زبانوں پر ظلم کریں گے تو اللہ پاک کی رحمت یعنی بارش رک جائے گی“ ان کی اس سوچ کو کس طرح ختم کیا جائے ؟ ( سردار آباد فیصل آباد سے سوال)

جواب:بے زبان جانوروں کو اس طرح زمین میں گاڑدینا بہت بڑا ظلم، گناہ، حرام اور جہنم میں لے جانے والا کام ہے ۔ بارش تو اللہ پاک کی رحمت ہے مگر جب ایسی طوفانی بارش ہو کہ تباہی مچ جائے تو ایسی بارش رحمت تو نہ ہوئی بلکہ زحمت ہوئی اور ظلم کرنے سے زحمت میں اضافہ ہوگا ، نہ کہ کمی آئے گی؟ اور اگر اتفاق سے یہ زحمت رک گئی تو بھی امتحان ہے کیونکہ وہ یہ سمجھیں گے ہم نے جانوروں پر ظلم کیا ہے تب ہی یہ رک گئی ہے ۔ بہرحال ان لوگوں پر توبہ کرنا فرض ہے اور آیندہ اس ظلم سے بچنا بھی ضروری ہے ۔

کشتی میں سوار ہونے کی دعا

سُوال:ماہی گیر جب سمندر میں کام کے لیے جائیں تو کونسی دعا پڑھیں؟ (ایک ماہی گیر اسلامی بھائی کا سوال)

جواب:ایک قرآنی آیت کشتی میں سوار ہونے کی دعا ہے وہ پڑھ لی جائے ، وہ دعا یہ ہے :( بِسْمِ اللّٰهِ مَجْرٖؔىهَا وَ مُرْسٰىهَاؕ-اِنَّ رَبِّیْ لَغَفُوْرٌ رَّحِیْمٌ(۴۱))(پ۱۲، ھود:۴۱)ترجمۂ کنز الایمان:اللہ کے نام پر اس کا چلنا اور اس کا ٹھہرنا، بے شک میرا رب ضرور بخشنے والا مہربان ہے ۔