جشن ولادت منانے کے26منفرد طریقے
اللہ تعالیٰ کے دنوں میں سب سے  زیادہ قابل تعظیم حضورتاجدارِ ختم نبوت صلَّی اللہ علیہ واٰلہٖ وسلَّم کا یوم وِلادت ہے………… کیونکہ اِسی کے سبب سارے دنوں کو برکت ملی  اور اللہ تعالیٰ کے دنوں کو یاد رکھنے کا حکم قرآن کریم  نے دیا۔ (پ13،ابراہیم:5) …………نیز رحمت الٰہی ملنے پر خوشی کرنے کا حکم قرآن کریم نے دیا………… (پ11،یونس58)اور اسی قرآن حکیم نے  حضور نبی پاک  صلَّی اللہ علیہ واٰلہٖ وسلَّم کو سارے جہانوں کے لیے رحمت قرار دیا۔ 
(پ17،الانبیاء:107)
معلوم ہوا کہ حضور نبی کریم صلَّی اللہ علیہ واٰلہٖ وسلَّم کے دنیا میں تشریف لانے کی خوشی منانا قرآن پاک کے حکم پر عمل کرنا ہے…………اور ہر پیرشریف کو روزہ رکھ کر اپنا یومِ ولادت خودحضور نبی اکرم صلَّی اللہ علیہ واٰلہٖ وسلَّم منایا کرتے تھے۔(صحیح مسلم، حدیث:198)  
جشن ولادت سے مرادوہ مبارک اجتماع ہے جس میں  حضور تاجدارِ دوجہان صلَّی اللہ علیہ واٰلہٖ وسلَّم کے فضائل،معجزات، خصلتیں، حالات اورحیات  مبارکہ کے مختلف پہلوؤں کو بیان کیا جائے۔(سبل الہدی  و الرشاد، 1/363)
جشن میلاد النبی صلَّی اللہ علیہ واٰلہٖ وسلَّم کے جائز ہونے  کو بڑے بڑے علما اوراِماموں (امت کےرہنماؤں)نے  بیان کیا…………،بلکہ بعض نے خاص اسی موضوع پر کتابیں بھی لکھیں ………… جن میں علامہ ابن جوزی حنبلی………… ، امام سیوطی شافعی…………،حافظ ابن کثیرحنبلی …………،امام ابن حجر مکی …………،شارح بخاری امام احمد قسطلانی …………،حافظ الحدیث علامہ سخاوی………… ،شیخ عبدالحق محدث دہلوی …………،شاہ ولی اللہ محدث دہلوی…………اورامام احمد رضا خان حنفی رحمہم اللہ  تعالیٰ جیسے جلیل القدر علماواکابرشامل ہیں۔
 ہم اہلسنت وجماعت کے نزدیک  میلاد پاک کی محفل افضل ترین مستحب اور اعلیٰ ترین نیک کاموں میں سے ہے جبکہ اس میں کوئی غیر شرعی بات شامل نہ ہو۔آئیے! میلاد منانے اور سیرت  اپنانے کے لیے اس  بابرکت مہینے میں  درج ذیل  اعمال کا اہتمام کریں اور جشن ولادت کو مزید بامقصد بنائیں : 
(1)پانچ وقت باجماعت نماز کا اہتمام کریں،قضا نماز اور اپنے ذمہ لازم زکوٰۃ اور لوگوں کے قرضے ادا کریں۔
(2)ظاہری وباطنی گناہوں سے سچی توبہ کریں………… اور اپنے ماتحتوں خاص طورپر اپنی اولاد………… اور شاگردوں کو گناہوں سے باز رکھیں۔
(3)مسلمان مرد اپنے چہرے کو پیارے آقا صلَّی اللہ علیہ واٰلہٖ وسلَّم کی پیاری سنت داڑھی سے سجائیں………… اور خواتین خود کو شرعی پردے سے سنواریں۔
(4)ماہِ میلادمیں روزانہ قرآن کریم  کی کم از کم تین آیات مبارکہ ترجمہ وتفسیر کے ساتھ پڑھیں(ترجمہ کنزالایمان یا کنزالعرفان سے اور تفسیر خزائن العرفان،نورالعرفان اورصراط الجنان سے)۔
(5)پورا مہینہ  روزانہ کم ازکم 313بار دُرود شریف پڑھیں۔………… امیراہلسنت حضرت علامہ  مولانا  محمد الیاس عطار قادری مُدَّ ظِلُّہُ العالی    نے  اس بار عاشقان رسول کو ماہ ربیع الاول میں 12ارب درود شریف  پڑھنے کا ہدف دیا ہے۔
(6)حضورتاجدار ختم نبوت صلَّی اللہ علیہ واٰلہٖ وسلَّم  کی احادیث مبارکہ………… اور سنتوں پر مشتمل کتب کا مطالعہ کریں………… جیسے ریاض الصالحین، انوار الحدیث ،فیضانِ سنت، بہارشریعت  حصہ 16،سنتیں اور آداب۔
(7)اس بابرکت مہینے میں ”سیرت مصطفی صلی اللہ علیہ وسلم “(از علامہ عبدالمصطفی اعظمی) …………،شفاء شریف مترجم(ازقاضی عیاض مالکی) …………،”صبح بہاراں“(از امیراہلسنت مولانا الیاس عطار قادری)…………، ”آب کوثر “یا ”البرہان“(از مفتی محمد امین صاحب) …………، ”آخری نبی صلَّی اللہ علیہ واٰلہٖ وسلَّم  کی پیاری سیرت“ (ازالمدینۃ العلمیۃ)میں سے کسی ایک کتاب کا ضرور مطالعہ کریں۔ 
(8)حضورامام الانبیاءصلَّی اللہ علیہ واٰلہٖ وسلَّمکےحسن وجمال…………،فضائلو خصائص …………، رفعت وشان…………،کمالات ومعجزات………… نیز محبت وعشق رسول پر مبنی مستند علمائے اہلسنت  کے بیانات سنیں۔
 (9)کوئی مدرسہ قائم کریں………… یا اہلسنت کے کسی ایسے مدرسوں وجامعات کے ساتھ تعاون کریں جو اچھی کارکردگی کے ساتھ ہمارے بچوں کو حافظ وعالم  ومفتی بنانے میں مصروف ہے۔
(10)اپنے ایک بیٹے یا ایک بیٹی کو عالم دین بنانے کی نیت کریں………… اور اس پر جلد عملی اقدام بھی کریں۔
(11)کسی غریب بالخصوص سید زادے کے گھرایک دو مہینوں کا راشن ڈالوادیں…………  اور وقتا فوقتا ایسے لوگوں کی مدد کر کے دعائیں لیں………… خاص کر موجودہ ملکی حالات اور مہنگائی کے دور  میں ایسے صدقات کی کثرت کیجیے۔ 
(12)ممکن ہو تو کسی ہال/بینکویٹ میں غربا کے لیے پُرتکلف وعظیم الشان دعوت (لنگرمیلاد) کا اہتمام کریں………… مگر یہ ظاہر نہ کریں کہ صرف غریبوں کو بلایا گیا ہے۔
(13)کسی مقروض  مسلمان کاسارا یا کچھ قرض ادا کردیں………… ، محلے کے دکان دار سے رابطہ کریں، کسی غریب کا کھاتہ کلیئر کروادیں۔
(14)کسی نادار وغریب امتی کو کوئی چھوٹا موٹا کاروبار شروع کروادیں…………، کسی  کو ملازمت دلوادیں …………اورکسی کی جائز سفارش کردیں ۔
(15)کسی مریض کا اپنے مال سے علاج کروادیں………… اورہوسکے تو اُس کے علاج کا سارا خرچ اپنے ذمے لے لیں۔
(16)جلوس میلاد اور محافل کو غیرشرعی اور غیر اخلاقی باتوں سے پاک رکھیں………… یاد رہے کہ  نامحرم مردوں عورتوں کا اختلاط ………، بدنگاہی ………،میوزک وگانے باجے………، آس پڑوس اور لوگوں کو تکلیف پہنچانے والا انتہائی بلند آواز ایکوساؤنڈ  ……… اور  بجلی چوری وغیرہ  کے کام غیرشرعی ،ناجائز اور گناہ  ہیں۔ 
(17)آڈیو/ویڈیو بیانات یا نعتیں ضرور سنیں ………… مگر اُس کی اونچی آواز سے اہل محلہ ………… ،پڑوسیوں یا ………… کسی مریض کو تکلیف  نہ پہنچائیں۔
(18)میلاد کی محفلوں میں وقت کی پابندی کا خاص خیال رکھیں ………… اور بڑی راتوں کے علاوہ محافل کا دورانیہ زیادہ سے زیادہ دو گھنٹے  بہت  ہے ۔
(19)محافل یا جلوس  میں  …………یا اِن کی تیاری کے دوران باجماعت نمازوں کا لازمی خیال رکھیں …………سچامیلادی نماز کبھی نہیں چھوڑتا۔
(20)عیدمیلاد النبی صلَّی اللہ علیہ واٰلہٖ وسلَّم کی خوشی میں گھروں،محلوں  اور مسجدوں  میں چراغاں  کریں ………… مگر چوری کی بجلی ، سٹرکوں پر رکاوٹوں اور لوگوں کو کسی قسم کی تکلیف دینے سے بچیں۔
(21)گھروں میں  خواتین کی محفل میلاد منعقد کریں تو  کسی سنی صحیح العقیدہ عالمہ یا مُبلِّغہ خاتون کا بیان ضرور رکھوائیں ………… جس میں حضوراکرم صلَّی اللہ علیہ واٰلہٖ وسلَّم کے فضائل، سیرت اور حسن اخلاق کو بیان کیا جائے۔ اور اس  محفل میں لاؤڈ اسپیکر کا استعمال ہرگز نہ کریں کہ عورتوں  کے نغمہ کی آواز غیر محرم تک پہنچے گی جو کہ جائز نہیں ۔
(22) ہوسکے تو سارے گھر والے جمع ہوکر 12دن تک روزانہ 25 منٹ گھرمیں  محفل میلاد  کا اہتمام کریں ………… جس میں تلاوت و نعت اور 12منٹ کا بیان ہو ………… اس میں حضور نبی کریم صلَّی اللہ علیہ واٰلہٖ وسلَّم کی سیرت کا کوئی گوشہ بیان کیا جائے یا ایک دو معجزات بیان کیے جائیں۔  
(23)میوزک اورآج کل بجائے جانے والے دَف کے ساتھ حمد ونعت یامنقبت وقوالی سننا، سنانا گناہ ہے۔ …………لہٰذا اس سے  بچیں، حضور رحمتِ عالم صلَّی اللہ علیہ واٰلہٖ وسلَّم نے ارشادفرمایا: میں تما م جہانوں کے لیے رحمت وہدایت بن کر آیا ہوں تاکہ بتوں کو مٹادوں، آلات میوزک کو توڑدوں اورزمانہ جاہلیت  کی باتوں کو ختم کردوں۔(معجم کبیر،حدیث:7759)
(24)نامحرم مردوں اور عورتوں کا اختلاط حرام ہے ………… لہٰذاجن محافل میں یہ  اور دیگرگناہ ہوں وہاں  ہرگز نہ جائیں………… نیز اپنے گھر کی خواتین کو جلوس میں شرکت یا جلوس دیکھنے جانے کی اجازت نہ دیں۔
(25)ماہِ میلاد بلکہ سارا سال حمد وثنا اور نعتیں سُنیں مگر زیادہ توجہ خوش عقیدہ مستند علمائے کرام اور معتمد مبلغین اسلام کے بیانات پر دیں ………… تاکہ ہمارے عقائد واعمال پختہ ہوں اور ان میں پائی جانے والی غلطیاں دُور ہوں ۔
(26)نعت خوانی کرنے والوں کو چاہیے کہ محافل میں ثناخوانی کے ساتھ ساتھ مستند علمائے اہلسنت اور مبلغین اسلام کے بیانات  بھی سنیں تاکہ انہیں بھی عقیدے اور عمل کی پختگی نصیب ہو۔چار پانچ جگہ وقت دینے کے بجائے ایک دو جگہ وقت دیں اور کسی ایک محفل میں مکمل بیان سنیں۔ 
مسلمانوں سے فریاد:عید میلاد النبی صلَّی اللہ علیہ واٰلہٖ وسلَّم کے موقع پرجشن وِلادت منائیں اور حضور رحمت للعالمین صلَّی اللہ علیہ واٰلہٖ وسلَّم کی آمد کے مقصد کو پیش نظر رکھیں، سیرت مبارکہ کا مطالعہ کریں اورآپ کی سنتوں کو اپنائیں ۔
نوٹ :یہ تحریر اپنی معروضات کے ساتھ ساتھ مختلف کتب ورسائل اورمضامین سے اخذ شدہ مفاہیم کی روشنی میں مرتب کی گئی ہے۔ اللہ کریم ہمیں شریعت کے دائرے میں رہتے ہوئے میلاد منانے اور سیرت مصطفی صلَّی اللہ علیہ واٰلہٖ وسلَّم  اپنانے کی توفیق عطا فرمائے۔ 
اٰمین بجاہِ  محمد خاتم النبیین صلَّی اللہ علیہ واٰلہٖ وسلَّم