شہزادیٔ اسلام مالکہ دارُ السَّلام

حضرت فاطمۃ الزہرا  رَضِیَ اللہُ تَعَالٰی عَنْہَا کا نکاح

گوشِ دل سے  مومنو! سن لو ذرا                          ہے  یہ قصہ فاطمہ کے  عقد کا!

پندرہ سالہ نبی کی لاڈلی                                               اور تھی بائیس سال عمر علی

عقد کا پیغام حیدر نے  دیا                                            مصطفی  نے     مَرْحَبًا   اَھْلًا   کہا

پیر کا دن سترہ ماہ رجب                                             دوسرا سن ہجرت شاہ عرب

پھر مدینہ میں ہوا اعلان عام                             ظہر کے  وقت آئیں سارے  خاص وعام

اس خبر سے  شور برپا ہوگیا                               کوچہ و بازار میں غل سا مچا

آج ہے  مولیٰ کی دختر کا نکاح                            آج ہے  اس نیک اختر کا نکاح

آج ہے  اس پاک وسچی کا نکاح                           آج ہے  بے  ماں کی بچی کا نکاح

خیر سے  جب وقت آیا ظہر کا                            مسجد نبوی میں مجمع ہوگیا

ایک جانب ہیں ابوبکر و عمر                              اک طرف عثمان بھی ہیں جلوہ گر

ہر طرف اصحاب اور انصار ہیں                                     درمیان میں احمدِ مختار ہیں

سامنے  نوشہ علی مرتضیٰ                                              حیدر   کرار     شاہِ       لَا   فَتٰی

آج گویا عرش آیا ہے  اتر                                            یاکہ قدسی آگئے  ہیں فرش پر

جمع جب یہ سارا مجمع ہوگیا                               سیدُ الکونین نے  خطبہ پڑھا

جب ہوئے  خطبے  سے  فارغ مصطفی                      عقد زہرا کا علی سے  کردیا

چار سو مثقال چاندی مہر تھا                              وزن جس کا ڈیڑھ سو تولہ ہوا

بعد میں خرمے  لٹائے  لَا کلام                                  ماسوا اس کے  نہ تھا کوئی طعام

ان کے  حق میں پھر دعائے  خیر کی                  اور ہر اک نے  مبارکباد دی

گھرسے  رخصت جس گھڑی زہرا ہوئیں                     والدہ کی یاد میں رونے  لگیں

دی تسلی احمد مختار نے                                             اور فرمایا شہِ ابرار نے

فاطمہ ہر طرح سے  بالا ہو تم                                    میکہ و سسرال میں اعلیٰ ہو تم

باپ تیرا ہے  امامُ الانبیاء                            اور شوہر اولیاء کے  پیشوا

ماہِ ذی الحجہ میں جب رخصت ہوئی               تب علی کے  گھر میں اک دعوت ہوئی

جس میں تھیں دس سیر جو کی رو ٹیاں              کچھ پنیر اور تھوڑے  خرمے  بیگماں

اس ضیافت کا ولیمہ نام ہے                           اور یہ دعوت سنت اسلام ہے

سب کو ان کی راہ چلنا چاہئے                                     اور بُری رسموں سے  بچنا چاہئے

جہیز

فاطمہ زہرا کا جس دن عقد تھا                                  سن لو ان کے  ساتھ کیا کیا نقد تھا

ایک چادر سترہ پیوند کی                                          مصطفی نے  اپنی دختر کو جو دی

ایک توشک جس کا چمڑے  کا غلاف              ایک تکیہ ایک ایسا ہی لحاف

جس کے  اندر اون نہ ریشم روئی                               بلکہ اس میں چھال خرمے  کی بھری

ایک چکی پیسنے  کے  واسطے                                         ایک مشکیزہ تھا پانی کے  لئے

ایک لکڑی کا پیالہ ساتھ میں                                    نقرئی کنگن کی جوڑی ہاتھ میں

اور گلے  میں ہار ہاتھی دانت کا                                   ایک جوڑا بھی کھڑاؤں کا دیا