اپنے پہلے سوال کا مطمئن کُن جواب سن کر وہ غیرمسلم خاموش ہو گیا۔ مُبَلِّغِ اِسْلَام کا اندازِ تبلیغ اسکے دِل میں گھر کر چکا تھا ،  اسکی دِلی کَیْفِیَّت چہرے سے عیاں تھی۔ پھر کتاب ستیارتھ پرکاش آگئی ،  جسکے تیسرے باب ( تعلیم ) پندرہویں ہیڈنگ میں یہ عبارت مَوجُود تھی : اَگنی ہوتر ( یعنی پوجا) صُبْح شام دو۲ ہی وَقْت کرے ۔ اسی طرح چوتھے باب ( خانہ داری ) ہیڈنگ نمبر 63 میں یہ عبارت مَوجُود تھی : سندھیا ( ہندوؤں کی صُبْح وشام کی عِبَادَت) دو۲ ہی وَقْت کرنا چاہے ۔ یہ عبارت سن اور دیکھ کر اسے دوسرے سوال کا جواب بھی مل چکا تھا۔ اب وہ اِسْلَام سے مزید قریب ہو رہا تھا ، لِہٰذا اس نے مِعْرَاج والے سوال کا جواب چاہا تو مُبَلِّغِ اِسْلَام ،  عاشِقِ خیر الاَنام اعلیٰ حضرت رَحْمَۃُ اللّٰہ ِتَعَالٰی عَلَیْہ کی زبانِ مبارک سے عِلْم و حِکْمَت کے پھول جھڑنے لگے اور اَلْفَاظ کچھ یوں ترتیب پائے : مِعْرَاج والے سوال کے جواب کو یوں سمجھنا چاہے ! ایک بادشاہ اپنے ملک کے اِنْتِظام کیلئے ایک نائب مُقَرَّر کرتا ہے ،  وہ صوبہ دار یانائب بادشاہ کے حَسْبِ منشا خدمات اَنْجَام دیتا ہے ، بادشاہ اس کی کارگزاریوں سے خوش ہو کر اپنے پاس بلاتا ہے اور اِنعام و خِلْعَتِ فاخِرَہ ( یعنی باعِثِ فَخْر لِباس) عَطا فرماتا ہے نہ یہ کہ اسے بُلا کر مُعَطَّل کر دیتا ہے اور اپنے پاس روک لیتا ہے ۔ یہ د لنشین کلام سن کر وہ غیر مسلم بے ساختہ پُکار اٹھا: آپ نے مجھے خوب مُطْمَئِن کر دیا ،  مجھے میرے سب سوالوں کا جواب مل گیا ،  میں ابھی اپنے بیوی ، بچوں کو لاتا ہوں اور ہم سب اپنے باطِل مَذْھَب کو چھوڑ کر دِیْنِ اِسْلَام میں داخِل ہوتے ہیں۔ ^[1]

تُو نے باطِل کو مٹایا اے امام احمدرضا        دین کا ڈنکا بجایا اے اِمام احمد رضا^[2]

صَلُّوا عَلَی الْحَبیب !           صَلَّی اللّٰہُتَعَالٰی عَلٰی مُحَمَّد

مدنی مذاکرے کی ضرورت و اہمیت

میٹھے میٹھے اِسْلَامی بھائیو ! یاد رکھئے ! عاشِقانِ رسول کی مَدَنی تحریک دَعْوَتِ اِسْلَامی بلاشبہ تَبْلِیغِ قرآن و سنّت کی عالمگیر غیر سیاسی مَسْجِد بناؤ اور مَسْجِد بھرو تحریک ہے اور اپنے نام کے مُطابِق حقیقت میں بھی اس کا ہر ہر مَدَنی کام قرآن و سنّت کی روشنی سے مَاخُوذ ہے ۔ چُنَانْچِہ دیکھا آپ نے کہ 12مدنی کاموں میں سے ہفتہ وار مَدَنی کام مَدَنی مُذاکَرَہ بھی اللہ کے مَـحْبُوب ،  دانائے غُیوب صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم کی سنّت اور اَسلاف( بزرگوں) کے طریقے سے ثابِت ہے ،  کیونکہ ہفتہ وار مَدَنی مذاکرے میں شَیْخِ طَرِیْقَت ،  اَمِیْـرِ اَھْلِسُنّت دَامَتْ بَرَکاتُہُمُ الْعَالِیَہ عاشقانِ رسول کو درپیش سینکڑوں مسائل کا حل اپنے تجربات اور شَریعَت و طَرِیْقَت کی روشنی میں پیش فرماتے ہیں اور بلا شُبہ یہ اس وَقْت کی ایک اَہَم ضَرورت ہے ۔ کیونکہ آج کے اس پر فتن دور میں ہر طرف جَہَالَت ( Illiteracy( کا دَور دورہ ہے ، اگرچہ آج کے مسلمان نے دُنْیَوی مُعَامَلات میں بَہُت ترقّی کرلی ہے مگر عِلْمِ دِین سے دُوری بھی شاید اِسی قَدْر زیادہ نَظَر آتی ہے ،  جی ہاں ! اگر مُعَاشَرے پر ایک طائرانہ نَظَر دوڑائی جائے تو واضح طور پر پتہ چلتا ہے کہ دُنْیَوی تعلیم حاصِل کرنے والوں کے مُقَابَلے میں دِینی تعلیم( حِفْظ و ناظرہ قرآنِ کریم اور دَرْسِ نظامی یعنی عالِم کورس) حاصِل کرنے والوں کی تعداد بَہُت کم ہے ، ڈاکٹرز( Doctors) ، انجینئرز ( Engineers) ، پروفیسرز ( Professors) کے مُقَابَلے میں عُلمائے کرام کی تعدادبہت کم ہے اور مفتیانِ کرام تو شاید گنتی کے ہوں گے ،  دُنْیَوی تعلیم کی شرحِ خواندگی ( Literacy rate)