سورۃ نازِل ہوتی تو فرماتے اسے فُلاں مضمون کی سورۃ میں رکھ دو ۔ ^([1])یعنی جب کوئی آیت نازِل ہوتی تو آپ صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم فرما دیتے کہ یہ آیت فُلاں سورۃ کی فُلاں آیت کے بعد رکھو ۔ اس طرح قرآنِ کریم کے ایک ایک حرف، آیت، سورۃ کو آپ صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم نے صحیفوں اور سطور میں ترتیب دے کر مَحْفُوظ کر دیا تھا ۔ اس دور میں قرآنِ کریم کاغذوں پر نہیں لکھا جاتا تھا اور باقاعدہ مُصْحَف کی صُورَت میں بھی نہ تھا بلکہ مُتَفَرِّق طور پر پَتّھر کی تختیوں، چمڑے کے ٹکڑوں، دَرَخْت کی چھالوں اور چوڑی ہڈیوں وغیرہ پر لکھا جاتا تھا ۔ ^([2])

میٹھے میٹھے اِسْلَامی بھائیو!کئی صحابۂ کرام عَلَیْہِمُ الرِّضْوَان حضور صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم سے قرآنِ کریم کو سنتے ، یاد کرتے اور لکھ لیا کرتے تھے ۔  علامہ ابنِ جوزی رَحْمَۃُ اللّٰہ ِتَعَالٰی عَلَیْہ فرماتے ہیں : رسولِ پاک، صاحِبِ لولاک صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم کے کئی اصحاب رَضِیَ اللّٰہُ تَعَالٰی عَنْہُمْ کاتِبِ وحی تھے ، جن میں بعض یہ ہیں :(1) اَمِیرُ الْمُومِنِین حضرت سَیِّدُنا ابو بكر صِدِّیق (2)اَمِیرُ الْمُومِنِین حضرت سَیِّدُنا عُمَر فَارُوقِ اَعْظَم (3)اَمِیرُ الْمُومِنِین حضرت سَیِّدُنا عثمانِ غنی (4)اَمِیرُ الْمُومِنِین حضرت سَیِّدُنا علی المرتضیٰ (5)حضرت سَیِّدُنا اُبَی بِن كعب (6)حضرت سَیِّدُنا زید (7)حضرت سَیِّدُنا امِیرِ مُعاویہ (8)حضرت سَیِّدُنا  حَنْظَلہ بن ربیع (9)حضرت سَیِّدُنا خالِد بن سعید بن عاص (10)حضرت سَیِّدُنا اَبَان بن سعید (11)حضرت سَیِّدُنا علا بن حضرمی رِضْوَانُ اللّٰہِ تَعَالٰی عَلَیْہِمْ اَجْمَعِیْن ۔ ^([3])

نمایاں ہے اسلام کے گلستاں میں                                                                     ہر اک گل پہ رنگِ بہارِ صحابہ

کمالِ صحابہ نبی کی تمنا                                                                                     جمالِ نبی ہے قرارِ صحابہ^([4])

صَلُّوا عَلَی الْحَبیب!                       صَلَّی اللّٰہُتَعَالٰی عَلٰی مُحَمَّد

میٹھے میٹھے اِسْلَامی بھائیو!قرآنِ کریم کو لکھ کر مَحْفُوظ کر لینے کے ساتھ ساتھ صحابۂ کرام عَلَیْہِمُ الرِّضْوَان نے اَحادِیْثِ طیبّہ  کو بھی نہ صِرف یاد کیا بلکہ لکھ بھی لیا تاکہ بعد میں آنے والے لوگوں تک عِلْمِ دین کی کَمَا حَقُّہٗ تعلیمات پہنچائی جا سکیں ۔ چونکہ ہمارے بُزُرْگانِ دِیْن نے اِشَاعتِ دِین کے اس پہلو کی اَہَمِیَّت کو  بخوبی جان لیا تھا، لِہٰذا انہوں نے خودعَمَل ہی نہیں کیا، بلکہ دوسروں کو بھی اس کی ترغیب دِلائی ۔  مَثَلًاتابعی بُزرگ حضرت سَیِّدُنا ابو قِلابہ رَحْمَۃُ اللّٰہ ِ تَعَالٰی عَلَیْہ فرماتے ہیں :  بھول جانے سے لکھ لینا کہیں بہتر ہے ۔ ^([5]) اسی طرح عِلْمِ نَحْو کے مَشْہُور امام حضرت خلیل بن احمد تابعی رَحْمَۃُ اللّٰہ ِتَعَالٰی عَلَیْہ کا قول ہے : جو کچھ میں  نے سنا ہے ، لکھ لیا ہے اور جو کچھ لکھا ہے ، یاد کر لیاہے اور جو کچھ یاد کیا ہے ، اس سے فائدہ اٹھایا ہے ۔ ^([6]) حضرت عصام بن یُوسُف رَحْمَۃُ اللّٰہ ِتَعَالٰی عَلَیْہ کے مُتَعَلِّق مَنْقُول ہے کہ انہوں نے مُفِیْد باتیں اور اَہَم نکات(مدنی پھول) لکھنے کیلئے ایک دِینار (یعنی 4.25 گرام سونے )کے بدلے میں قلم خریدا ۔ ^([7])

اَلْحَمْدُ لِلّٰہ!ہمارے بزرگوں نے سینہ بہ سینہ عِلْم سے مُسْتَفِیْض ہونے کے ساتھ ساتھ کتابت کے ذریعے جس عِلْم کو مَحْفُوظ فرمایا تھا، ہم آج صدیاں گزرنے کے بعد بھی اِسْتِفَادَہ کر رہے ہیں اور اِنْ شَآءَ اللہ آئندہ آنے والی نسلیں قِیامَت تک کرتی رہیں گی ۔  

سارے سُنّی عالِموں سے تُوبناکر رکھ سدا                                                            کر ادب ہر ایک کا، ہونا نہ تُو اُن سے جدا

مجھ کو اے عطّارؔ سُنّی عالِموں سے پیار ہے                                                             اِنْ شَآءَ اللہ  دوجہاں میں میرا بیڑا پار ہے  ^([8])