اسی واسطے کہتے ہیں  : بعض وقت دعااور بعض وقت اس کا ترک اولیٰ ہے اور صفت اس کی باشارۂ قلب اسی وقت معلوم ہوتی ہے ۔

          قال الرضاء : مگر انبیاء علیہم الصلاۃ والسلام کے توارُدِ احوال حالات ِ اہل تلوین^([1]) سے پاک ومنزہ ہیں  ، وہ سردارانِ اصحابِ تمکین ہیں   اور احوالِ متعاقبہ ادھر کی تجلیاتِ گونا گون کے آئینہ ہیں  ، وہاں  جو کچھ ہے افضل واکمل واحسن واجمل احوال ہے خصوصاً سید الانبیاءعلیہ وعلیہم أفضل الصلاۃ والثناء۔

          قال تعالٰی :  { وَ لَلْاٰخِرَةُ خَیْرٌ لَّكَ مِنَ الْاُوْلٰىؕ(۴)}

            ’’جو آن آتی ہے تیرے لیے گزشتہ آن سے افضل واعلیٰ ہے ۔‘‘ (پ۳۰، الضحٰی :  ۴) فاحفظ واستقم^([2]))

          تیسری وجہ :  کہ اَصَحّ وافضل وجوہ ہے ^([3])یہ ہے کہ رسول اللہ صَلَّی اللہ تَعَالٰی عَلَیْہِ وَاٰلِہٖ وَسَلَّمَ کو مقامِ بَقاکہ اس مقامِ فنا سے ہزاروں   درجے ارفع واعلیٰ ہے ، حاصل تھا، اس مقام میں   دعا وسوال وتَوَجُّہ بِخَلْق وتَمَیُّز بَیْنَ الصَّلَاح والفَسَاد(یعنی مخلوق کی طرف توجہ اور بھلائی اور برائی کے ما بین فرق کرنا) جائز بلکہ لازم ہے اور شفاعت وعذر خواہی اپنے مُتعلِّقوں   اور متوسِّلوں   کی طرف سے واجب۔

          قال الرضاء :  قال اللّٰہ تعالٰی : { وَ اسْتَغْفِرْ لِذَنْۢبِكَ وَ لِلْمُؤْمِنِیْنَ وَ الْمُؤْمِنٰتِؕ-}^([4])۔

            حضورپُرنورسیدنا غوث اعظم رَضِیَ اللہُ تَعَالٰی عَنْہُ نے اسی طرف اشارہ فرمایا :   

            فالرجل ھو النازع للقدر لا الموافق لہ کما تقدم۔^([5])

            آخر اپنے رب عَزَّ وَجَلَّ  کو نہ سنا، کہ اپنے خلیلِ جلیل علیہ الصلاۃ والتسلیم کی نسبت کیا فرماتا ہے :

            { فَلَمَّا ذَهَبَ عَنْ اِبْرٰهِیْمَ الرَّوْعُ وَ جَآءَتْهُ الْبُشْرٰى یُجَادِلُنَا فِیْ قَوْمِ  لُوْطٍؕ(۷۴) اِنَّ اِبْرٰهِیْمَ لَحَلِیْمٌ اَوَّاهٌ مُّنِیْبٌ(۷۵)})^([6])

          جواب ثانی :  اس بیان سے عدمِ جوازِ دعا وسوال نہیں   سمجھا جاتاا س لئے کہ دعا بھی مراد محبوب ہے سائلین پر تقاضا ہے :  { اُدْعُوْنِیْۤ اَسْتَجِبْ لَكُمْؕ-}^([7]) مولیٰ چاہتاہے ہمارا بندہ ہمارے حضور التجاء لائے اور عِجزوبیچارگی اپنی ظاہر کرے ۔

            حدیث میں   ہے :  خدائے تعالیٰ پچھلی رات کو آسمان دنیا پر تجلّیٔ خاص کرتا اور صبح تک ارشاد فرماتا ہے :  

            ’’کون ہے جو مجھ کو پکارے میں   اسے جواب دوں  ،

            کون ہے جو مجھ سے دعا مانگے میں   قبول کروں  ۔‘‘^([8])  

            حدیث قدسی میں   ہے :  ’’اے میرے بندو! تم سب بھوکے ہو، مگر جسے میں   کھلاؤں  ، مجھ سے کھانا مانگو، میں   کھانا دوں   گا۔ اے میرے بندو! تم سب ننگے ہو مگر جسے میں   پہناؤں  ، مجھ سے کپڑا مانگو، میں   کپڑا دوں   گا۔‘‘^([9])

            سروَرِ عالم صَلَّی اللہ تَعَالٰی عَلَیْہِ وَاٰلِہٖ وَسَلَّمَ فرماتے ہیں  : ’’جس کو دعا کی توفیق دی جائے دروازے بِہِشت کے اس کے لیے کھولے جائیں  ۔‘‘ ^([10])

            دوسری حدیث میں   ہے :  ’’جو مسلمان کسی دعا میں   خدائے تعالیٰ کی طرف اچھی طرح متوجہ ہوتا ہے ، خدائے تعالیٰ اس کی دعا اسے عطا کرتا ہے یا دنیا میں   دیتا ہے یا آخرت کے لیے ذخیرہ فرماتا ہے ۔‘‘ ^([11])