تحقیق اس مقام کی یہ ہے کہ قضائے مُعَلَّقْ د ۲و قسم ہے :  

            ایک مُعَلَّقْ مَحْض جس کی تعلیق کا ذکر لوحِ محو واِثبات یا صُحُفِ ملائکہ میں   بھی ہے ، عام اولیاء جن کے علوم اس سے مُتَجاوز نہیں   ہوتے ایسی قضا کے دفع پر دعا کی ہمت فرماتے ہیں   کہ انہیں   بوجہ ذکرِ تعلیق اس کا قابلِ دفع ہونا معلوم ہوتا ہے ۔

            دوسری مُعَلَّقْ شَبِیْہ بِالْمُبْرَمکہ علمِ الٰہی میں   تو مُعَلَّقْ ہے مگر لوحِ محو واِثبات ودفاتر ِملائکہ میں   اس کی تعلیق مذکور نہیں  ، وہ ان ملائکہ اور عام اولیاء کے علم میں   مُبْرَم ہوتی ہے ، مگر خواص عبادُ اللہ جنہیں   امتیازِ خاص ہے ،  باِلہامِ ربانی بلکہ برؤیت مقامِ اَرفع حضرت مخْدَع ^([1])اس کی تعلیقِ واقعی پر مُطَّلِعْ ہوتے ہیں   اور اس کے دفع میں   دعا کا اِذن پاتے ہیں  ، اور یا عام مؤمنین جنہیں   اَلواح وصحائف پر اطلاع نہیں   حسب عادت دعا کرتے ہیں   اور وہ بوجہ اس تعلیق کے جو علم الٰہی میں   تھی مُنْدَفِع ہو جاتی ہے ، یہ وہ قضائے مُبْرَم ہے جو صالحِ رَدّ(یعنی ٹل سکتی) ہے ، اور اسی کی نسبت حضورِ غوثیت کا ارشادِ اَمجد۔

            ولہٰذا فرماتے ہیں  : ’’تمام اولیاء مقامِ قدر پر پہنچ کر رک جاتے ہیں   سوا میرے ، کہ جب میں   وہاں   پہنچا میرے لیے اس میں   ایک رَوزن (روشندان) کھولا گیا جس سے داخل ہو کر ’’نَازَعْتُ أَقْدَارَ الْحَقِّ بِالْحَقِّ لِلْحَقِّ۔ ‘‘   

            ’’میں   نے تقدیرات ِحق سے حق کے ساتھ حق کے لیے منازَعت کی ۔‘‘

مرد وہ ہے جو منازَعت کرے نہ وہ کہ تسلیم۔

            رواہ الإمام الأجل سیدي أبو الحسن علي نور الدین اللخمي قُدِّسَ سِرُّہٗ في ’’البھجۃ‘‘ المبارکۃ بسندین صحیحین ثلاثیین عن الإمام الحافظ عبد الغني المقدسي والإمام الحافظ ابن الأخضر رحمھما اللّٰہ تعالٰی سمعا سیدنا الغوث الأعظم رضي اللّٰہ عنہ وأرضاہ وحشرنا في زمرۃ من تبعہ ووالاہ، آمین۔^([2])

            نظیر اس کی احکام ظاہریہ شرعیہ ہیں   وہ بھی تین۳     طرح آتے ہیں   :

          ایک مُعَلَّقْ ظَاہِرُ التَّعْلِیْقکہ حکم کے ساتھ ہی بیان فرما دیا کہ ہمیشہ کو نہیں  ۔ ایک

مدتِ خاص کے لئے ہے کقولہ تعالی :  {حَتّٰى  یَتَوَفّٰهُنَّ  الْمَوْتُ  اَوْ  یَجْعَلَ  اللّٰهُ  لَهُنَّ  سَبِیْلًا(۱۵)}^([3])

            دوسرے وہ کہ علمِ الٰہی میں   تو ان کے لیے ایک مدت ہے مگر بیان نہ فرمائی گئی جب وہ مدت ختم ہوتی اور دوسرا حکم آتا ہے بظاہر معلوم ہوتا ہے کہ حکم اول بدل گیا حالانکہ ہر گز نہ بدلا { لَا تَبْدِیْلَ لِكَلِمٰتِ اللّٰهِؕ-} ^([4])بلکہ اس کی مدت یہیں   تک تھی، گو ہمیں   خبر نہ تھی، ولہٰذا ہمارے علماء فرماتے ہیں  : نسخ تبدیلِ حکم نہیں   بلکہ بیانِ مدّت کا نام ہے ۔^([5])

            تیسرے وہ کہ علمِ الٰہی میں   ہمیشہ کے لیے ہیں  ، جیسے :  نماز کی فرضیت، زِنا کی حرمت، یہ اصلاً صالحِ نسخ نہیں   یہ قضائیں   بھی بصورت امر ہوتی ہیں  ۔ مثلاً :  فلاں   وقت فلاں   کی روح قبض کرو، فلاں   روز فلاں   کو یہ دو یہ چھین لو، نہ بصیغۂ خبر^([6])، کہ خبرِ الٰہی میں   تَخَلُّف محال بالذات ہے :  { وَ تَمَّتْ كَلِمَتُ رَبِّكَ صِدْقًا وَّ عَدْلًاؕ-لَا مُبَدِّلَ لِكَلِمٰتِهٖۚ-وَ هُوَ السَّمِیْعُ الْعَلِیْمُ(۱۱۵)}^([7]) واللّٰہ تعالٰی أعلم(اللہ تعالیٰ خوب تر جانتاہے )۔)

          سوال چَہارُم (۴) :  دعا مقامِ رِضا وتسلیم کے خلاف ہے ، جب بندہ اپنے مقدر پر راضی ہو گیا تو دعا سے کیا کام رہا؟

      جواب :  دعا خلافِ رضا نہیں  ، ہو سکتا ہے کہ حصولِ مدعا یا نَجات اَز بَلا دعا پر مقدر ہو۔

          قال الرضاء : یہ سوال، سوالِ دُوُم کا غیر ہے ۔ وہاں   بر بنائے تفویض سوال تھا یہاں   بر بنائے رضا وتسلیم اور تفویض ورضا میں   فرق بَیِّن (ظاہر) ہے ، رِضا کا مرتبہ تفویض کے درجہ سے اعلیٰ ہے ۔