فرمایا :  ’’جتنی چاہے ۔‘‘

            میں   نے عرض کی :  چہارم۔

            فرمایا :  جس قدر چاہے ، اور زیادہ کرے تو تیرے لئے بہتر ہے ۔

            میں   نے عرض کی :  نصف۔

            فرمایا :  ’’جتنی چاہے ، اور زیادہ کرے تو تیرے لیے بہتر ہے ۔‘‘

             میں   نے عرض کی :  اپنی کُل دُعا حضور کے لئے کردوں  ، یعنی اپنی کل دعا کے عوض حضور پر دُرُود بھیجا کروں  ؟

            فرمایا :  ’’ایسا کرے گا تو اللہ تعالیٰ تیرے سب مُہِمَّات (اَہم اورمشکل کاموں   میں  ) کفایت کرے گا اور تیرے گناہ بخش دیگا۔‘‘ ^([1])

            احمد وطبرانی باسناد حسن راوی :   وھذا حدیث الطبراني(یعنی یہ طبرانی کی حدیث کے الفاظ ہیں  ) کہ ایک شخص نے عرض کی :  یا رسول اللہ ! میں   اپنی تہائی دعا حضور کے لیے کروں  ؟

            فرمایا :  ’’اگر تو چاہے ۔‘‘

            عرض کی :  دو تہائی۔

             فرمایا :  ’’ہاں  ‘‘

            عرض کی :  کُل دعا کے عوض دُرُود مقرر کروں  ۔

            فرمایا :  ’’ایسا کرے گا تو خدا تیرے دنیا وآخر ت کے سب کام بنا دے گا۔‘‘^([2])

            اور بیشک دُرُود سرور عالم صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کے لیے دُعا ہے اور جس قدر اس کے فوائد وبرکات مُصلِّی (یعنی درود شریف پڑھنے والے ) پر عائد ہوتے ہیں   ہرگز ہرگز اپنے لیے دعا میں   نہیں   بلکہ ان کے لئے دعا تمام امتِ مرحومہ کے لیے دعا ہے کہ سب انہیں   کے دامنِ دولت سے وابستہ ہیں  ۔   ؎

 سلامتِ ہمہ آفاق در سلامت تُست^([3])

          دُوم(۲) :   ذکر ِاِلٰہی۔

            بیہقی نے ’’شعب الایمان‘‘ میں   بُکَیْربن عتیق انہوں   نے سالم بن عبد اللہ انہوں   نے اپنے باپ عبد اللہ بن عمر انہوں   نے اپنے والد حضرت فاروق اعظم انہوں   نے حضور سید المرسلین صَلَّی اللہُ تَعَالٰی عَلَیْہِ وَاٰلِہٖ وَسَلَّمَ ، حضور نے رَبُّ العزت ذی الجلال تَقَدَّسَتْ أَسْمَاؤُہٗسے روایت کی کہ فرماتا ہے :  

            ((من شغلہ ذکري عن مسألتي أعطیتُہ أفضل ما أعطي السائلین))۔

            ’’جسے میر ی یاد میرے مانگے سے باز رکھے ، میں   اسے بہتر اس عطا کا بخشوں   جو مانگنے والوں   کو دوں  ۔‘‘^([4])

            اسی واسطے حضرت سالم بن عبد اللہ نے تمام مُدّت وقوف میں   ذکرِ الٰہی پر اقتصار کیا اور تا غروبِ آفتاب(یعنی غروبِ آفتاب تک) لَا إِلٰہَ إِلَّا اللّٰہُ وَحْدَہٗ لَا شَرِیْکَ لَہٗ، لَہُ الْمُلْکُ وَلَہُ الْحَمْدُ بِیَدِہِ الْخَیْرُ  وَھُوَ عَلٰی کُلِّ شَيْئٍ قَدِیْرٌ، لَا إِلٰـہَ إِلاَّ اللّٰہُ وَحْدَہٗ وَنَحْنُ لَہٗ مُسْلِمُوْنَ، لَا إِلٰـہَ إِلاَّ اللّٰہُ وَلَوْ کَرِہَ الْمُشْرِکُوْنَ، لَا إِلٰـہَ إِلاَّ اللّٰہُ رَبُّنَا وَرَبُّ آبَائِنَا الْأَوَّلِیْنَ کہتے رہے ۔^([5])

            سِوُم(۳) :   تلاوتِ قرآن مجید۔

            نبی صَلَّی اللہُ تَعَالٰی عَلَیْہِ وَاٰلِہٖ وَسَلَّمَ اپنے رب جلیل  تَبَارَکَ وَتَعَالٰیسے روایت فرماتے ہیں   :

            ((من شغلہ القرآن عن ذکري ومسألتي أعطیتُہ أفضل ما أعطي السائلین وفضل کلام اللّٰہ علی سائر الکلام کفضل اللّٰہ علی خلقہ))۔

            ’’جسے تلاوتِ قرآن مجید میرے ذکر اورمیرے سوال سے روک دے اسے افضل اس کا دوں  ، جو تمام سائلین کو عطا کروں   ۔

            پھر فرمایا :  ’’اور بزرگی کلامِ الٰہی کی تمام کلاموں   پر ایسی ہے جیسے بزرگیٔ رَبُّ العزت جَلَّ جَلَالُہٗ، اس کی تمام مخلوق پر ۔‘‘