اسی واسطے دعا سے پہلے مظلوموں   کے حقوق واپس کرنا اور ان سے اپنے قصور بخشوانا اور خدا کے سامنے توبہ واستغفار اور تَرْکِ معاصی (گناہوں   کے چھوڑنے )پر عزمِ مُصَمَّم (پختہ ارادہ)کرنا لازم ہے ۔

            کعب احبار سے منقول :  زمانۂ حضرت موسیٰ عَلَیْہِ الصَّلَاۃُ وَالسَّلَام  میں   قحط پڑا، آپ بنی اسرائیل کو لے کر تین بار دعا کے واسطے گئے مینہ نہ برسا(یعنی بارش نہ ہوئی)، اللہ عَزَّ وَجَلَّ  نے وحی بھیجی :  ’’اے موسیٰ! میں   تیر ی اور تیرے ساتھ والوں   کی دعا قبول نہ کروں   گا کہ تم میں   ایک نَمَّام (چُغل خور) ہے کہ ایک کا عیب دوسرے سے بیان کرتا ہے ۔‘‘ عرض کی :  اے رب! وہ کون ہے کہ اس کو ہم اپنے گروہ سے نکال دیں  ؟ حکم آیا :  ’’میں   تمہیں   نمیمی(چغل خوری) سے منع کرتا ہوں   اور خود ایسا کروں  ؟‘‘ موسیٰ عَلَیْہِ الصَّلَاۃُ وَالسَّلَام  نے سب کو توبہ کا حکم کیا بعد توبہ دعا مانگتے ہی مینہ برسا۔^([1])

            سفیان ثوری رحمہ اللہ تعالٰی کہتے ہیں  : بنی اسرائیل سا۷ت برس قحط میں   مبتلا رہے یہاں   تک کہ مُردوں   اور بچوں   کو کھانے لگے ہمیشہ پہاڑوں   میں   نکل جاتے اور عاجزی وتضرّع کے ساتھ دعا مانگتے اور روتے مگر رحمتِ الٰہی انکے حال پر اصلاً توجہ نہ فرماتی یہاں   تک کہ ان کے پیغمبر عَلَیْہِ الصَّلَاۃُ وَالسَّلَام  پر وحی ہوئی :  ’’اگر تم میری طرف اس قدر چلو کہ تمہارے گُھٹنے گھس جائیں   اور تمہارے ہاتھ آسمان کو لگ جائیں   اور تمہاری زبانیں   دعا کرتے کرتے گونگی ہو جائیں   جب بھی میں   تم میں   سے کسی دعا مانگنے والے کی دعا قبول نہ کروں   اور کسی رونے والے پر رحم نہ فرماؤں  ، جب تک مظلوموں   کو ان کے حقوق واپس نہ کر دیں  ۔‘‘ پس بنی اسرائیل نے مظلوموں   کو ان کے حق واپس کئے ، اسی دن مینہ برسا۔ ^([2])

            مالک بن دینار رَحِمَہ اللہ تَعَالٰی کہتے ہیں  : بنی اسرائیل ایام قحط میں   مینہ کی دعا کے لئے نکلے ، پیغمبر وقت عَلَیْہِ الصَّلَاۃُ وَالسَّلَام  پر وحی ہوئی :  ’’ان سے کہہ دے کہ تم میری طرف نکلتے ہو  ناپاک بدنوں   کے ساتھ، اور ہتھیلیاں   میری طرف اٹھاتے ہو جن سے تم نے خون ناحق کئے ، اور تم نے اپنے پیٹ حرام مال سے بھرے ہیں   اب تم پر میرا غضب سخت ہو گیا اور تم کو سِوا زیادہ مجھ سے دور ہونے کے دعا سے کچھ فائدہ نہ ملے گا۔‘‘^([3])

            اور ابو صدیق ناجیؔ سے روایت ہے حضر ت سلیمان عَلَیْہِ الصَّلَاۃُ وَالسَّلَام مینہ کی دعا کے واسطے باہر نکلے ایک چیونٹی کو دیکھا اپنے پاؤں   آسمان کی طرف اٹھائے کہتی ہے :  ’’الٰہی! میں   بھی تیری خَلق سے ایک مخلوق ہوں   اور ہم کو تیرے رزق سے بے پرواہی نہیں   ہو سکتی، پس تو ہم کو اوروں   کے گناہوں   کے سبب ہلاک نہ کر۔‘‘ سلیمان عَلَیْہِ الصَّلَاۃُ وَالسَّلَام نے یہ دیکھ کر فرمایا :  لوٹ چلو کہ اس چیونٹی کی دعا سے مینہ برسے گا۔^([4])

            اوزاعیؔ کہتے ہیں  : لوگ مینہ کی دعا کے لیے نکلے بلال بن سعد نے خدا کی تعریف وثنا کر کے کہا :  اے حاضرین! کیا تم اپنے گناہ پر اقرار نہیں   کرتے ہو؟ سب نے کہا :  ہم اقرار کرتے ہیں  ۔ پھر کہا :  الٰہی! تو فرماتا ہے :  { مَا عَلَى الْمُحْسِنِیْنَ مِنْ سَبِیْلٍؕ-}^([5]) اور ہم اپنی گنہگاری پر اقرار کرتے ہیں   پس مغفرت تیری ہماری امثال کے واسطے ہے (ہم جیسے لوگوں   کیلئے ہی ہے ) الٰہی! ہم کوبخش دے اور ہم پر رحم کر اور ہم کو پانی دے ، پھر اپنے ہاتھ اٹھائے اور مینہ برسا۔^([6])

            کسی نے مالک بن دینار سے کہا :  مینہ کے لئے دعا کیجئے ، فرمایا :  ’’تم مینہ برسنے میں   دیر سمجھتے ہو اور میں   پتھر برسنے میں  ‘‘، یعنی :  تم سمجھتے ہو کہ مینہ برسنے میں   دیر ہو گئی اور میں   کہتا ہوں   یہ خدا کی رحمت ہے کہ پتھر نہیں   پڑتے ۔^([7])

          تیسرا سبب :  اِستِغْنائے مولیٰ۔ وہ حاکم ہے محکوم نہیں  ، غالب ہے مغلوب نہیں  ، مالک ہے تابع نہیں  ، اگر تیری دعا قبول نہ فرمائی تجھے ناخوشی اور غصے ، شکایت اور شکوے کی مجال کب ہے ، جب خاصوں   کے ساتھ یہ معاملہ ہے کہ جب چاہتے ہیں   عطا کرتے ہیں   جب چاہتے منع فرماتے ہیں   تو تُو کس شمار میں   ہے کہ اپنی مراد پر اِصرار کرتا ہے !۔ ^([8]) { وَ اللّٰهُ غَالِبٌ عَلٰۤى اَمْرِهٖ وَ لٰكِنَّ اَكْثَرَ النَّاسِ لَا یَعْلَمُوْنَ(۲۱)}^([9])۔

          قال الرضاء :  اس کا اِستغناء حق، اس کا وعدہ حق، اس کی بات تمام، اس کی رحمت عام، دعا کہ شرائط وآداب کی جامع ہو، حصولِ مسؤل ہی کے ساتھ قبول ہونا ضرور نہیں  ، دفعِ بَلاہے ، ثوابِ عقبیٰ ہے ، جیسا کہ آتا ہے اور بایں   ہمہ اس پر کچھ واجب نہیں  ۔^([10])