دُوُم (۲) :  روزِ عرفہ یعنی نَہُم ذِی الحجہ۔ (یہ عام ہے حاجی وغیرِحاجی کیلئے مگر حاجی کیلئے اس میں   بھی خصوصیت ہے ۔)

          قال الرضاء :  خصوصاً بعدزوال خصوصاًعرفات میں  ۔)

          سِوُم (۳) :  ماہ ِرمضان مُطلقاً۔

          چَہَارُم(۴) :   شبِ جُمُعہ۔

          پَنْجُم(۵) :  روزِ ِ  جُمُعہ۔

          شَشُم(۶) :  ٹھیک آدھی رات کہ اس وقت تَجلِّیٔ خاص ہوتی ہے ۔

          ہَفْتُم(۷) :  سَحَر ۔

          قال الرضاء :  یعنی رات کا چھٹا حصہ رہے ۔ )

          ہَشْتُم(۸) :  ساعتِ  جُمُعہ یعنی قبلِ غروبِ شمس (یعنی جمعہ کے دن مغرب سے ذرا پہلے )کہ اکثر اقوال میں   ساعتِ مَرجُوَّہ وہی ہے (یعنی جمعہ کی وہ ساعت جس میں   قبولیتِ دعا کی اُمید زیادہ ہے )۔

          قال الرضاء : ساعتِ جمعہ کے بارے میں   اگرچہ اَقوالِ علماء چالیس سے مُتَجاوِز ہوئے (یعنی بڑھ گئے ) مگر قَوِی وراجِح ومُختار اَکابر مُحَقِّقین وجماعاتِ کثیرۂ ائمہ دین دو۲   قول ہیں  (یعنی وہ قول جسے اکابر محققین علماء اورکثیر ائمۂ کرام رحمہم اللہ نے اختیار فرمایا دو ہیں  ) :

            ایک وہ جس کی طرف حضرت مُصَنِّف قُدِّسَ سِرُّہٗ ونُوِّرَ قبرُہٗنے اشارہ فرمایا یعنی ساعتِ اَخیرۂ روز جمعہ غروبِ آفتاب سے کچھ ہی پہلے ایک لطیف وقت۔

             ’’اَشباہ‘‘ میں   فرمایا :  ’’ہمارا یہی مذہب ہے عامۂ مشائخ حنفیہ اسی طرف گئے ۔‘‘^([1])

            یوں   ہی ’’تتارخانیہ‘‘ میں   اسے ہمارے مشا ئخ کرام کا مسلک ٹھہرایا۔^([2])

                 اور یہ مذہب ہے عالِمُ الکِتابَین سیدنا عبد اللہ بن سلام وحضرت کعب احباررَضِیَ اللہُ تَعَالٰی عَنْہُما کا۔^([3])

            اور اسی طرف رجوع فرمائی سیدنا ابو ہریرہ رَضِیَ اللہُ تَعَالٰی عَنْہُ نے ۔^([4])

            اور ایسا ہی منقول ہے حضرت بَتُول زَہرا صلوات اللّٰہ وسلامہ علی أبیہا وعلیہاسے ۔^([5])

            اور سعید بن منصور بسند صحیح ابو سلمہ بن عبد الرحمن سے راوی کہ کچھ صحابہ کرام نے جمع ہو کر ساعتِ جمعہ کا تذکرہ فرمایا، پھرسب اس قول پر متفق ہو کر متفرق ہوئے (یعنی سب اس قول پر اتفاق کرنے کے بعد جدا ہوئے )کہ وہ روز جمعہ کی پچھلی ساعت ہے ۔^([6])

            اور یہی مذہب ہے امام شافعی وامام محمد وامام اِسحاق بن رَاہْوَیْہ واِبنُ الزَّمْلَکانی اور ان کے تِلْمِیذ(شاگرد)  عَلائی وغَیرہُم علماء کا۔^([7])

                 امام ابو عمرو بن عبد البر نے فرمایا :  ’’اس باب میں   اس سے ثابت تر کوئی قول نہیں  ۔‘‘^([8])

            فاضل علی قاری نے کہا :  ’’یہ تمام اقوال سے زیادہ لائق اعتبار ہے ۔‘‘

                امام احمد فرماتے ہیں  : ’’اکثر احادیث اسی پر ہیں  ‘‘^([9]) ولہٰذا حضرت مُصَنِّفقُدِّسَ سِرُّہٗنے اسی کو اختیار فرمایا۔

            دوسرا قول جب امام منبر پر بیٹھے اس وقت سے فرضِ جمعہ کے سلام تک ساعتِ مَوعُودَہ ہے (یعنی یہ وہ ساعت ہے جس میں   دعا کی قبولیت کا وعدہ ہے )۔

            یہ حدیث مَرفوع ^([10])ابی موسیٰ اشعری رَضِیَ اللہُ تَعَالٰی عَنْہُ میں   مَنصُوص(یعنی بیان) ہوا۔^([11])