’’تمہاری دعا قبول ہوتی ہے جب تک جلدی نہ کرو کہ میں   نے دعا کی تھی، قبول نہ ہوئی۔‘‘

            اورپھر بعض تو اس پر ایسے جامے سے باہر ہو جاتے ہیں   کہ اعمال واَدعیّہ (وظائف ودعاؤں  ) کے اثر سے بے اعتقاد بلکہ اللہ کے وعدہ وکرم سے بے اعتماد^([1])  والعِیاذ باللّٰہ الکریم الجَواد۔

            ایسوں   سے کہا جائے کہ اے بے حیا! بے شرمو! ذرا اپنے گریبان میں   منہ ڈالو، اگر کوئی تمہار ا برابر والا دوست تم سے ہزار بار کچھ کام اپنے کہے اور تم اس کا ایک کام نہ کرو، تو

اپنا کام اس سے کہتے ہوئے اوّل تو آپ لجاؤ (شرماؤ) گے کہ ہم نے تو اس کا کہنا کیا ہی نہیں   اب کس منہ سے اس سے کام کو کہیں   اور اگر ’’غرض دیوانی ہوتی ہے ‘‘ کہہ بھی دیا اوراس نے نہ کیا تو اصلاً محل شکایت نہ جانوگے کہ ہم نے کب کیا تھا جو وہ کرتا۔اب جانچو کہ تم مالک علی الإطلاقعَزَّ جَلَالُہٗکے کتنے احکام بجالاتے ہو۔ اس کا حکم بجا نہ لانا اور اپنی درخواست کا خواہی نخواہی (زبردستی  / ناچار) قبول چاہنا کیسی بے حیائی ہے ، او احمق! پھر فرق دیکھ اپنے سر سے پاؤں   تک نظرِ غور کر، ایک ایک روئیں   میں   ہر وقت ہر آن کتنی کتنی ہزار در ہزار صد ہزار بے شمار نعمتیں   ہیں  ، تو سوتا ہے اور اس کے معصوم بندے (فرشتے ) تیری حفاظت کو پہرا دے رہے ہیں  ، تو گناہ کر رہا ہے اور سر سے پاؤں   تک صحت وعافیت، بلاؤں   سے حفاظت، کھانے کا ہضم، فُضلات کا دفع، خون کی روانی، اعضاء میں   طاقت، آنکھوں   میں   روشنی، بے حساب کرم بے مانگے بے چاہے تجھ پر اتر رہے ہیں  ، پھر اگر تیری بعض خواہشیں   عطا نہ ہوں   کس منہ سے شکایت کرتا ہے ، توکیا جانے کہ۱    ؔتیرے لیے بھلائی کا ہے میں   ہے ، تو کیا جانے کہ۲    ؔ کیسی سخت بلا آنے والی تھی کہ اس دعا نے دفع کی، تو کیا جانے کہ۳    ؔ اس دعا کے عوض کیسا ثواب تیرے لیے ذخیرہ ہورہا ہے ، اس کا وعدہ سچاہے ، اور قبول کی یہ تینوں   صورتیں   ہیں   جن میں   ہر پہلی پچھلی سے اعلیٰ ہے ۔ ہاں   بے اعتقادی آئی تو یقین جان کہ مارا گیا اور ابلیس لعین نے تجھے اپنا سا کر لیا۔  والعیاذ باللّٰہ سبحنہ وتعالٰی۔^([2])

            اے ذلیل خاک! اے آبِ ناپاک! اپنا منہ دیکھ اور اس عظیم شرف کو غور کر کہ اپنی بارگاہ میں   حاضر ہونے ، اپنا پاک متعالی (بلند وبالا) نام لینے ، اپنی طرف منہ کرنے ، اپنے پکارنے کی تجھے اجازت دیتے ہیں  ، لاکھوں   مرادیں   اس فضل عظیم پر نثار۔

                        اوبے صبرے !ذرابھیک مانگنا سیکھ، اس آستانِ رَفیع(بلند بارگاہ) کی خاک پر

لَوٹ جا اورلپٹا رہ اورٹکٹکی بندھی رکھ کہ اب دیتے ہیں   ، اب دیتے ہیں   بلکہ اسے پکارنے ، اس سے مُناجات کرنے کی لذت میں   ایسا ڈوب جا کہ ارادہ ومراد کچھ یا دنہ رہے ، یقین جان کہ اس دروازے سے ہرگز محروم نہ پھرے گا^([3]) کہ؎

من دقّ باب الکریم انفتح^([4])

                                                                                    وباللّٰہ التوفیق )

          ادب ۴۹ :  اپنے گناہ وخطا پر نظر کر کے دعا کو ترک نہ کرے کہ شیطان کی بھی دعا قبول ہوئی اور اسے قیامت تک مہلت ملی{ اِنَّكَ مِنَ الْمُنْظَرِیْنَۙ(۸۰)}^([5])

            کہتے ہیں   فرعون دن بھر خدائی کا دعویٰ کرتا اوررات کو دعا وزاری میں   مشغول رہتا اسی سبب سے جاہ وحشم ومال وملک اس کا مدت تک قائم رہا۔ ^([6])   ؎

روز موسیٰ پیش حق نالاں   شدے

نیم شب فرعون ہم گریاں   شدے

کیں   چہ غل است اے خدابرگرد نم

گرنہ غل باشد کہ گوید من مہم^([7])