اورجب کبوتر بازی بیرون مسجد اپنے گھر میں بھی حرام ہے تو مسجد میں کس درجہ اشد سخت تر حرام ہوگی،بادشاہ جبار قہار کی ایك نافرمانی اپنے گھر میں بیٹھ کر کیجئے اور ایك نافرمانی خاص اس کے دربار میں کہ یہ نافرمانی کے علاوہ دربار کی توہین اور بادشاہ کو معاذ اﷲ بے قدر سمجھنے پر دال ہے،اگر واقعی دل میں یہی ہوکہ مسجد کیا محل ادب ہے جس میں گناہ سے رکئے جب تو خالص کفر ہے ورنہ جرم پہلے سے اضعافًا مُّضَاعَفہ ہوجانے میں شك نہیں،وہ مسجد جس میں دنیا کی مباح باتیں کرنے کو بیٹھنا نیکیوں کو کھاتا ہے جیسے آگ لکڑی کو۔فتح القدیر میں ہے:

الکلام المباح فیہ مکروہ یاکل الحسنات^[1]۔

مسجد میں کلام مباح بھی مکروہ ہے اور نیکیوں کو کھاجاتا ہے۔(ت)

اشباہ میں ہے:

انہ یاکل الحسنات کما تاکل النار الحطب^[2]۔

بیشك وہ نیکیوں کو یوں کھاجاتا ہے جیسے آگ لکڑیوں کو کھاجاتی ہے(ت)

امام ابو عبداللہ  نسفی نے مدارك شریف میں حدیث نقل کی کہ:

الحدیث فی المسجد یأکل الحسنات کما تأکل البھیمۃ الحشیش^[3]۔

مسجد میں دنیا کی بات نیکیوں کو اس طرح کھاجاتی ہے جیسے چوپایہ گھاس کو۔(ت)

غمزالعیون میں خزانۃ الفقہ سے ہے:

من تکلم فی المساجد بکلام الدنیا احبط اﷲ تعالٰی  عنہ عمل اربعین سنۃ^[4]۔

جو مسجد میں دنیا کی بات کرے اﷲ تعالٰی  اس کے چالیس برس کے عمل اکارت فرمادے۔

اقول: ومثلہ لایقال بالرائ(میں کہتا ہوں کہ اس قسم کی بات رائے اور اٹکل سے نہیں کہی جاسکتی۔ت)رسول اللہ  صَلَّی اللہُ تعالٰی  عَلَیْہِ وَاٰلِہٖ وَسَلَّمَفرماتے ہیں:

سیکون فی اٰخر الزمان قوم یکون حدیثھم فی مساجد ھم لیس ﷲ فیہم حاجۃ^[5]۔رواہ ابن حبان فی صحیحہ عن ابن مسعود رضی اﷲ تعالٰی  عنہ۔

آخر زمانے میں کچھ لوگ ہوں گے کہ مسجد میں دنیا کی باتیں کریں گے اللہ  عَزَّ وَجَلَّ  کو ان لوگوں سے کچھ کام نہیں(اس کو ابن حبان نے اپنی صحیح میں سیدنا ابن مسعود رَضِیَ اللہُ تَعَالٰی عَنْہسے روایت فرمایا:ت)

حدیقہ ندیہ شرح طریقہ محمدیہ میں ہے:

کلام الدنیا اذاکان مباحا صدقا فی المساجد بلاضرورۃ داعیۃ الٰی ذٰلك کالمعتکف فی حاجتہ اللازمۃ مکروہ کراھۃ تحریم(ثم الحدیث وقال فی شرحہ)لیس ﷲ تعالٰی  فیہم حاجۃ ای لایرید بھم خیراوانماھم اھل الخیبۃ والحرمان والاھانۃ والخسران^[6]۔

یعنی دنیا کی بات جبکہ فی نفسہٖ مباح اور سچی ہو مسجد میں بلاضرورت کرنی حرام ہے ضرورت ایسی جیسے معتکف اپنے حوائج ضروریہ کے لئے بات کرے،پھر حدیث مذکور ذکر کرکے فرمایا معنی حدیث یہ ہیں کہ اﷲ تعالٰی  ان کے ساتھ بھلائی کا ارادہ نہ کریگا اور وہ نامراد محروم وزیاں کار اور اہانت وذلت کے سزاوار ہیں۔

اسی میں ہے:

وروی ان مسجدا من المساجد ارتفع الی السماء شاکیا من اھلہ یتکلمون فیہ بکلام الدنیا فاستقبلتہ الملٰئکۃ وقالوابعثنا بھلاکھم^[7]۔

یعنی مروی ہوا کہ ایك مسجد اپنے رب کے حضور شکایت کرنے چلی کہ لوگ مجھ میں دنیا کی باتیں کرتے ہیں ملائکہ اسے آتے ملے اور بولے ہم ان کے ہلاك کرنے کو بھیجے گئے ہیں۔

اسی میں ہے:

وروی ان الملٰئکۃ یشکون الی اﷲ تعالٰی  من نتن فم المغتابین والقائلین فی المساجد بکلام الدنیا^[8]۔

یعنی روایت کیا گیا کہ جو لوگ غیبت کرتے ہیں(جو سخت حرام اور زنا سے بھی اشد ہے)اور جو لوگ مسجد میں دنیا کی باتیں کرتے ہیں ان کے منہ سے وہ گندی بدبو نکلتی ہے جس سے فرشتے اللہ عَزَّ وَجَلَّ  کے حضور ان کی شکایت کرتے ہیں۔