سوالات سبق نمبر ۲۵

{۱}… وقف کا لغوی اور اصطلاحی معنی بیان کیجئے ؟

{۲} …محل وقف کے اعتبارسے وقف کی کتنی قسمیں ہیں نام اور تعداد بیان کیجئے ؟

{۳}… وقفِ تام کی تعریف اور حکم بیان کریں ؟

{۴}… وقف کافی کی تعریف اور حکم بیان کیجئے ؟

{۵}… وقفِ حسن کی تعریف اور حکم بیان کیجئے ؟

{۶} …وقفِ قبیح کی تعریف اور حکم بیان کیجئے ؟

{۷}… کیفیت وقف کے اعتبار سے وقف کی کتنی قسمیں ہیں مع امثلہ بیان کیجئے ؟

{۸}… قاری کی ضرورت کے لحاظ سے وقف کی کتنی قسمیں ہیں نام بتاکر ہر ایک کی تعریف بھی کیجئے ؟

{۹}… ابتداء اور اعادہ کی تعریف بیان کیجئے ؟

سبق نمبر۶ ۲ :

قرآنی رُمُوزِ اوقاف کا بیان

٭…o… یہ علامت آیت پوری ہونے کی ہے ۔ اسی وجہ سے اس علامت ہی کو ’’آیت ‘‘ کہتے ہیں ۔

٭۵ … یہ علامت ’’ آیتِ مختلف فیہ ‘‘ کی ہے ۔

٭م… یہ علامت ’’ وقفِ لازم ‘‘ کی ہے ۔ یہاں ٹھہرنا لازم ہے ورنہ مفہومِ عبارت بدلنے کا قوی اندیشہ ہے ۔

٭ط…  یہ علامت’’ وقفِ مُطْلَق ‘‘ کی ہے ۔ یہاں ٹھہرنا چاہیے ۔

٭ج… یہ ’’ وقفِ جائز ‘‘کی علامت ہے ۔ یہاں ٹھہرنا نہ ٹھہرنا دونوں جائز ہیں ۔

٭ز…  یہ ’’ وقفِ مُجَوّز ‘‘ کی علامت ہے ۔ اس پر وقف کرنے کی اجازت ہے ۔

٭ص…  یہ ’ ’ وقفِ مُرَخَّص ‘‘ کی علامت ہے ۔ یہاں عند الضرورت(یعنی ضرورت کے وقت) وقف کرنے کی اجازت ہے ۔ یہ علامت وقفِ ضعیف کی ہے ۔

٭ق…  یہ علامت ’’قِیْلَ عَلَیْہِ الْوَقْفُ ‘‘ کی ہے اس پر وقف کر لیا گیا تو کوئی حرج نہیں ، لیکن یہ وقف ضعیف ہے ۔

٭ک…  یہ علامت ’’ کَذٰلِکَ ‘‘ کی ہے ۔ اگر علامتِ وقف کے بعد واقع ہو تو وقف کے حکم میں ہے اور اگر علامتِ وصل ( لا وغیرہ ) کے بعد واقع ہوتو وصل کے حکم میں ہے ۔

٭قف…  یہ ’’ قَدْ یُوْقَفُ‘‘ کا مُخَفّف ہے ۔ یہ صیغۂ امر نہیں ہے ۔ اس پر اگر وقف ہوگیا تو کوئی حرج نہیں البتّہ ’’ وقفِ اختیاری ‘‘ بہتر نہیں ہے ۔

٭صَلْ…  یہ’’ قَدْ یُوْصَلُ‘‘ کا مُخَفّف ہے ۔ یہ بھی  صیغۂ امر نہیں ہے ۔ یہ ’’قَدْ یُوْقَفُ ‘‘ کا مقا بل ہے ۔

٭صلے … یہ’’ اَ لْوَصلُ اَوْلٰی‘‘ کا مُخَفّف ہے ۔ یہاں بوجہ تعلقِ لفظی کے وصل ہی کرناچاہیے یہ اگرچہ وقفِ حسن کی علامت ہے لیکن وقف کرنے کے بعد یہاں اعادہ ضروری ہے ۔

٭لا…  یہ’’ لاَوَقْفَ عَلَیْہِ ‘‘ کا مُخَفّف ہے ۔ یہ وقف قبیح کی علامت ہے یہاں ملا کر پڑھنا ضروری ہے کیونکہ ایسی جگہ وقف کرنے سے قباحت لازم آئے گی ۔ اسی وجہ سے اس پر وقف ناجائز ہے ۔

٭قلا … یہ’’ وقفِ مختلف فیہ ‘‘ کی علامت ہے ’’ قِیْلَ لَا وَقْفَ عَلَیْہِ‘‘ کا مُخَفّف ہے اس جگہ پر وقف نہ کیاجائے تو بہتر ہے ۔

٭oلا …  اسی کو ’’ آیتِ لا ‘‘ کہتے ہیں یہاں وقف قبیح نہیں ہے بلکہ آیت ہونے کی وجہ سے وقف جائز ہے ۔ البتہ بوجہ محلِ وقف نہ ہونے کے وصل بہتر ہے ۔ لیکن وقف کرنے کے بعد اعادہ نہ کرناچاہیے ۔

٭مع… یہ ’’ وقفِ معانقہ‘‘کی علامت ہے ۔ قرآن مجید کے حاشیہ پر معانقہ کا مخفف ’’ مع ‘‘ لکھا ہوتاہے ۔ اور درمیانِ آ یت میں دو جگہ تین تین نقطے مرسوم ہوتے ہیں جیسے لَا رَیْبَ ﶈ فِیْهِ ۚۛ-هُدًى لِّلْمُتَّقِیْنَۙ(۲) وقفِ معانقہ کا حکم یہ ہے کہ نہ دونوں جگہ وقف کرنا چاہیے اور نہ ہی دونوں جگہ وصل کرنا چاہیے ۔ بلکہ وصلِ اوَّل وقفِ ثانی یا وقفِ اوّل وصلِ ثانی کر ناچاہیے ۔

٭وقف النبی صَلَّی اللہُ تَعَالٰی عَلَیْہِ وَاٰلِہٖ وَسَلَّمَ … یہ کلامِ مجید میں حاشیہ پر لکھا ہوتاہے ۔ ایسے موقع پر وقف کرنا مُستحب ہے ۔

٭وقفِ منزل… اس کو ’’ وقفِ جبرئیل‘‘بھی کہتے ہیں ۔ اس جگہ پر وقف کرنا مستحب ہے ۔