{5}…مدِّ مُتَّصِل کا ہمزہ اگر کلمہ کے آخرمیں ہوتواس پر وقف کرنے کی

 صورت میں مدّ کے دوسبب جمع ہوجائیں گے ہمزہ اور سکون اسے ’’اجتماعِ سببین‘‘ بھی کہتے ہیں ۔ جیسے یَشَآءُ ، قُرُوْ ءَ ا س میں مدِّ عارض کا لحاظ کرکے قصر نہیں کرسکتے طول یا توسط کریں گے اور رَوم کی صورت میں بھی توسط ہی ہو گا ۔

سوالات سبق نمبر۲۰

{۱}… مقدار کا لغوی اور اصطلاحی معنٰی بیان کریں ؟

{۲}… وجہ کا لغوی اور اصطلاحی معنی بیان کیجئے ؟

{۳}… قوی اور ضعیف مد ات کی ترتیب بیان کیجئے ؟

{۴ }… مدّات کی مقداروں کی تفصیل بیان کیجئے ؟

{۵}… وجوہاتِ مدّ نکالنے کا کیا طریقہ ہے ؟

{۶}… وُجُوہاتِ مَدّ بیان کرنے کا مقصد کیاہے ؟

{۷ }… مدِّعار ض اور مدِّ لین عارض میں موقوف علیہ اگر مفتوح ہوتو کتنی وجہیں بنتی ہیں ؟

{۸}… مدِّ عارض اور مدِّلین عارض میں موقوف علیہ اگرمکسور ہوتو کتنی وجہیں جائز نکلتی ہیں اور کتنی ناجائز، ناجائز ہونے کی وجہ بیان کیجئے ؟

{۹}… مدِّ عارض اور مدِّلین عارض میں موقوف علیہ اگرمضموم ہوتو کتنی وجہیں جائز نکلتی ہیں اور کتنی ناجائز، ناجائز ہونے کی وجہ بیان کیجئے ؟

 سبق نمبر۲۱ :

اجتماعِ ساکنین کا بیان

اجتماعِ ساکنین کی تعریف : ایک یا دو کلموں میں دو ساکن حروف کے اکٹھے ہوجانے کو ’’ اجتماعِ سا کنین ‘‘ کہتے ہیں ۔

اجتماعِ ساکنین کی اقسام

اجتماعِ ساکنین کی دو قسمیں ہیں :

            ٭…   اجتماعِ ساکنین علیٰ حدِّہٖ

             ٭…  اجتماعِ ساکنین علیٰ غیرِ حَدِّہٖ

اجتماعِ ساکنین علیٰ حدِّہٖ کی تعریف اور حکم :

            پہلاساکن ، حرف مدّہ ہو اور دونوں ساکن ایک کلمہ میں جمع ہوں تو اسے ’’اجتماعِ ساکنین علیٰ حَدّہٖ ‘‘ کہتے ہیں ۔ یہ اجتماع ساکنین مطلقاً جائز ہے جیسے جَانٌّ ، اٰلْئٰنَ ۔

اجتماعِ ساکنین علیٰ غیرِ حَدِّہ کی تعریف اور حکم :

            پہلاساکن، حرفِ مدّہ نہ ہویادونوں ساکن ایک کلمہ میں نہ ہوں تو اسے ’’اجتماعِ ساکنین علیٰ غیرِ حدّہٖ ‘‘ کہتے ہیں ۔ اگر دونوں ساکن حروف ایک کلمہ میں ہوں تو اجتماع ساکنین علیٰ غیرِ حدّہٖ جائز نہیں ۔ البتّہ وقف میں جائز ہے ۔ جیسے فِکْرْ ، ذِکْرْ ۔

 اور اگر دونوں ساکن ایک کلمہ میں نہ ہوں تو اس کی چھ صورتیں بنتی ہیں :

 (1)…پہلا ساکن ’’ حرفِ مدّہ ‘‘ ہوتو ’’ حرف مدّہ ‘‘ یعنی پہلے ساکن کو گرا دیں گے جیسے قَالُو ادْخُلُوْا ۔ (2)… پہلا ساکن ’’ جمع کا میم‘‘ ہوتو اسے ’’ ضمہ ‘‘ دیں گے جیسے عَلَیْکُمُ الْاَرْضُ  ۔ (3)…پہلا ساکن ’’ مِنْ‘‘ کا نون ہوتو اسے ’’فتحہ ‘‘ دیں گے جیسے مِنَ النَّبِیِّیْنَ ۔ (4)… پہلا ساکن ’’ واؤ لین‘‘ جمع کا ہو تواسے ’’ ضَمّہ‘‘ دیں گے جیسے تَخْشَوُالنَّاسَ ۔ (5)… پہلا ساکن ’’الم ‘‘ کی میم ہوتو فتحہ دیں گے جیسے المَّ اللّٰہ ۔ (6)… اگر پہلا ساکن مذکورہ حروف کے علاوہ کوئی اور حرف ہوتواسے ’’ کسرہ ‘‘ دیں گے جیسے اِنِ ارْتَبْتُمْ ۔

نون قطنی کیا ہے ؟

             تنوین کے بعد ہمزہ وصلی آجائے تو وصل میں ’’ ہمزہ وصلی ‘‘ کو گراتے ہوئے تنوین کے نون ساکن کو زیر دے کر ایک چھوٹاسانون لکھ دیاجاتا ہے ۔ اِسے ’’ نونِ قُطْنی ‘‘ کہتے ہیں ۔ جیسے خَیْرَانِالوَصِیّۃ

سوالات سبق نمبر ۲۱

{۱}… اجتماعِ ساکنین کی تعریف بیان کیجئے ؟

{۲} …اجتماعِ ساکنین کی کتنی قسمیں ہیں ؟

{۳}… اجتماعِ ساکنین علیٰحدّہٖ کی تعریف اور حکم مع مثال بیان کیجئے ؟