پہلا مخرج : ’’ اقصائے حلق‘‘ حلق کا وہ آخری حِصَّہ جو سینے کی طرف ہے ۔ اس سے ’’ء ، ھ‘‘ ادا ہوتے ہیں ۔

دوسرا مخرج : ’’وسطِ حلق‘‘ حلق کا درمیانی حصہ اس سے ’’ع ، ح‘‘ ادا ہوتے ہیں ۔

تیسرا مخرج : ’’ادنائے حلق‘‘حلق کا وہ ابتدائی حِصّہ جو مُنہ کی طرف ہے اس سے ’’غ ، خ‘‘ہوتے ہیں ۔

            ان چھ حُرُوف کو’’ حُرُوفِ حَلقیہ‘‘ کہتے ہیں ۔

حلق کے چھ حرف ہیں اے مہ لقا                                 ہمزہ ہا  و عین حا  و غین خا

لِسانی مخارج : ’’ لسان ‘‘ زبان کو کہتے ہیں ۔ اس میں دس۱۰   مخارج پائے جاتے ہیں جن سے اٹھارہ۱۸   حُرُوف اداہوتے ہیں ۔ زبان سے اداہونے والے حُرُوف کو’’ حروفِ لسانی ‘‘ کہتے ہیں ۔ لسان کے مندرجہ ٔ ذیل حصّے ہیں :

٭…  اصلِ لسان : زبان کی جڑ ۔

٭…  اقصائے حافۂ لسان : زبان کاوہ بغلی کنارہ جو حلق کی طرف ہے ۔

٭…  ادنائے حافۂ لسان : زبان کا وہ بغلی کنار ہ جو مُنہ کی طرف ہے ۔

٭…  وسطِ لسان : زبان کا درمیانی حِصّہ ۔

٭…  بطنِ لسان : زبان کا پیٹ ۔

٭ …  طرفِ لسان : زبان کا کنارہ ۔

٭…  رأ سِ لسان : زبان کی نو ک یا سرا ۔

٭…  ظہرِ لسان : زبا ن کی پُشت ۔

چوتھا مخرج : ’’ اقصائے لسان‘‘ زبان کی جڑ اور مقابل کے تالو کا نرم حِصّہ جو

 کوّے سے ملا ہواہے ۔ اس سے ’’ ق‘‘ادا ہوتا ہے ۔

پانچواں مخرج : اقصائے لسان اور مقابل کے تالو کاسخت حِصّہ جو مُنہ کی جانب ہے ۔ اس سے ’’ک‘‘ادا ہوتا ہے ۔ ’’ق‘‘ اور’’ک‘‘ کو ’’حُرُوفِ لَہَوِیَّہ‘‘ کہتے ہیں ۔

چھٹا مخرج : ’’وسطِ لسان اوراس کے مقابل کا تالو‘‘ اس سے ’’ج ، ش ، ی‘‘ غیر مدّہ اداہوتے ہیں ۔ ان حروف کو ’’ حُرُوفِ شَجْرِِیَّہ‘‘ کہتے ہیں ۔

            اب جن حُرُوف کے مخارج بیان کئے جائیں گے ان کاتعلق زبان کے ساتھ ساتھ دانتوں سے بھی ہے لہٰذا اب دانتوں کے نا م مع اقسام بیان کئے جاتے ہیں ۔

دانتوں کے نام اور اقسام

            کل دانت بتیس32ہیں جن میں 12 دانت اور 20 داڑھیں ہوتی ہیں ۔ جن کی چھ اقسام ہیں :

            ٭… 1… {ثنایا}

            ٭… 2… {رُباعیات}

            ٭… 3… {اَنیاب}

            ٭… 4… {ضَوَاحِک}

            ٭… 5… {طَواحِن}

            ٭… 6… {نَواجذ}

{۱} …ثنایا : سامنے والے دو اوپر اور دو نیچے والے کل چار دانت، اوپر والے دانتوں کو ’’ثنایاعلیا ‘‘ اور نیچے والے دانتوں کو ’’ ثنایا سُفلٰی‘‘ کہتے ہیں ۔

{۲} …رُباعیات : ثنایاکے دائیں بائیں اوپر نیچے ایک ایک کُل چار دانت

{۳}… اَنیاب : رباعیات کے دائیں بائیں اوپر نیچے ایک ایک کُل چار دانت

{۴}…ضواحِک : انیاب کے دائیں بائیں اوپر نیچے ایک ایک کُل چار داڑھیں

{۵}…طواحِن : ضواحک کے دائیں بائیں اوپر نیچے تین تین کل بارہ داڑھیں

{۶}…نواجذ : طواحن کے دائیں بائیں اوپر نیچے ایک ایک کُل چار داڑھیں ہیں

            آسانی سے یاد کرنے کے لئے دانتوں کے نا م اور اقسام اشعار کی صورت میں پیش کئے جاتے ہیں ۔

ہے تعداد دانتوں کی تیس اور دو                               ثنایا ہیں چار اور رباعی ہیں دو دو