اللّٰہُ‘‘ پڑھنا ۔ (3) …حرکت کو حرکت سے بدل دینا جیسے ’’اَرَءَ یْتَ‘‘کو  ’’اَرَءَ یْتُ‘‘ پڑھنا ۔ (4) …کسی حرف کو بڑھا دینا جیسے ’’خَلَقَ‘‘ کو ’’خَلَقاَ ‘‘یا گھٹادینا جیسے ’’ لَمْ یُوْ لَدْ‘‘ کو ’’لَمْ یُلَدْ‘‘پڑھنا ۔

(2) لحنِ خفی کی تعریف و حکم :

            لحنِ خفی چھوٹی اور پو شید ہ غلطی کو کہتے ہیں یعنی ان قواعد کا ترک کر دیناجو تحسینِ حُرُوف سے تعلق رکھتے ہیں ، لحن خفی سے معنی فاسدیعنی بگڑتے نہیں ۔ لحنِ خفی مکروہ ہے شرعاًاس غلطی سے بچنا مستحب ہے ۔

لحنِ خفی کی صورتیں

         لحنِ خفی صفاتِ عارضہ میں غلطیاں کرنے سے پیدا ہوتی ہے مثلاً : اِدغام، اِقلاب، اِخفاء ، مَدّات وغیرہ میں غلطی کرنا ۔

سوالات سبق نمبر ۶

{۱}… لحن کے لغوی اور اصطلاحی معنی بیان کیجئے ؟

 {۲}… لحن کی بنیادی طور پر کتنی اقسام ہیں ؟

{۳}… لحنِ جلی کا لغوی اور اصطلاحی معنی اور حکم بیان کیجئے ؟

 {۴}…لحن جلی کن کن صورتوں میں واقع ہو تی ہیں ؟ مثالیں دے کر وضاحت کیجئے ؟

 {۵}…لحنِ خفی کا لغوی اور اصطلاحی معنی اور حکم بیان کیجئے ؟

{ ۶}… لحن خفی کن کن صورتوں میں ہو تی ہیں ؟ کوئی مثال دے کر وضاحت کیجئے ؟

سبق نمبر ۷ :

تَعَوُّذ و تسمیہ کابیان

 تَعَوُّذکی تعریف :

            ’’ تَعَوُّذْ ‘‘ ان کلمات کو کہتے ہیں جن کلمات کے ذریعے شیطان سے پناہ مانگی جائے جیسے ’’اَعُوْذُ بِاللّٰہِ مِنَ الشَّیْطٰنِ الرَّجِیْم‘‘ ۔ اِ س کو ’’ اِسْتِعَاذَہ ‘‘بھی کہتے ہیں ۔

تَعَوُّذکا محل وحکم :

        قُرآن شریف کی تلاوت شروع کرنے سے پہلے استعاذہ شرعاًمستحب ہے اور اس کے پسندیدہ الفاظ ’’ اَعُوْذُ بِاللّٰہِ مِنَ الشَّیْطٰنِ الرَّجِیْم‘‘ ہیں ۔ تعوذ کا محل یعنی پڑھنے کی جگہ ابتدائے قراء ت ہے ۔ اگر درمیانِ قراء ت میں کوئی کلامِ اجنبی ( وہ کلام جس کا تعلق قراء تِ قرآن سے نہ ہو) ہو گیااگرچہ سلام کا جواب ہی کسی کو دیا ہو تو پھر تَعَوُّذْ دوبارہ پڑھنا چاہیئے ۔

تسمیہ کی تعریف :

         ’’بِسْمِ اللّٰہِ الرَّحْمٰنِ الرَّحِیْم‘‘ پڑھنے کو تسمیہ کہتے ہیں ۔

تسمیہ کا محل وحکم :

         سوائے سورت توبہ کے ہر سورت کے شروع میں تسمیہ ضرورپڑھنا چاہیے کہ مستحب ہے ۔ امام عاصم کوفی عَلَیْہِ رَحْمَۃُاللّٰہِ الْقَوِیْ( جوکہ قُرّاء سَبْعَہ یعنی

سات مشہور قاریوں میں سے ہیں )کے نزدیک سورۂ براء ت کے علاوہ ہر سورت کے شروع میں تسمیہ ضرور پڑھنا چاہیے ۔ ^[1]  (فوائد مکیہ مع حاشیہ لمعاتِ شمسیہ، ص : ۲۷)

 تلاوت کرنے سے پہلے تَعَوُّذ و تسمیہ پڑھنے کی صورتیں :

            جب کلامِ پاک کی تلاوت کا آغاز کیا جائے تو قراء ت کی ابتداء ، شروعِ سورت سے ہو گی یا سورت کے وسط( درمیا ن) سے یا دورانِ قراء ت کسی دوسری سورت کا آغاز ہوگا ۔ اس لحاظ سے ان کی مندرجہ ذیل تین صورتیں ہیں :

٭…  ابتدائے قراء ت ، ابتدائے سورت ۔

٭…  ابتدائے سورت ، درمیانِ قراء ت ۔

٭…  ابتدائے قراء ت ، درمیانِ سورت ۔

پہلی صورت کا حکم :

            تلاوت کی ابتداء شروعِ سورت سے ہو تو تَعَوُّذ و تسمیہ دونوں پڑھنا چاہیے ۔ اس لئے کہ دونوں کا محل ہے ، لہذا دونوں ضروری ہیں اور پڑھنے میں وصل یعنی ملا کر پڑھنا اور فصل یعنی وقف کر کے پڑھنا دونوں جائز ہیں ۔

دوسری صورت کا حکم :

            تلاوت کے درمیان اگرایک سورت ختم کرکے دوسری سورت شروع کی جائے تو صرف بِسْمِ اللّٰہ شریف پڑھی جائے گی ۔

تیسری صورت کاحکم :