صَلُّوْا عَلَی الْحَبِیْب !                   صَلَّی اللہُ تَعَالٰی عَلٰی مُحَمَّد

حدیث نمبر : 370                                                                                                                                                                                    ہر شخص اپنے مَحبوب کے ساتھ ہوگا

عَنِِ ابْنِ مَسْعُوْدٍ رَضِيَ اللهُ عَنْهُ قَالَ : جَاءَ رَجُلٌ اِلٰی رَسُوْلِ اللہِ صَلَّى اللهُ عَلَيْهِ وَسَلَّمَ فَقَالَ :  يَارَسُوْلَ اللهِ كَيْفَ تَقُوْلُ فِيْ رَجُلٍ اَحَبَّ قَوْمًا وَلَمْ يَلْحَقْ بِهِمْ؟ فَقَالَ رَسُوْلُ اللہِ صَلَّى اللهُ عَلَيْهِ وَسَلَّمَ :  اَلْمَرْءُ مَعَ مَنْ اَحَبَّ. ^{( [1] )}

ترجمہ : حضرتِ سَیِّدُنا عبداللہ بن مسعود رَضِیَ اللہُ تَعَالٰی عَنْہُ سے روایت ہے کہ ایک شخص نے نبی کریم صَلَّی اللہُ تَعَالٰی عَلَیْہِ وَاٰلِہٖ وَسَلَّم کی بارگاہ میں حاضر ہوکر عرض کی : ’’یارسولَ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم !  آپ اس شخص کے بارے میں کیا فرماتے ہیں جو کسی قوم سے محبت کرتا ہے مگر ان سے ملانہیں ۔   ‘‘  رسولُ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم نے فرمایا :  ’’آدمی اسی کے ساتھ ہوگا جس سے وہ محبت کرتا ہے ۔   ‘‘ 

جنت میں نیکوں کی رَفاقت :

مذکورہ حدیث پاک میں بیان ہوا کہ ایک شخص نے حضور عَلَیْہِ السَّلَام کی بارگاہ میں عرض کی :  ’’یارسولَ اللہ صَلَّی اللہُ تَعَالٰی عَلَیْہِ وَاٰلِہٖ وَسَلَّم !  ایک انسان کسی قوم سے محبت کرتا ہے لیکن اس نے نہ تو کبھی اُن سے ملاقات کی ہو ، نہ اُن کے جیسے نیک اَعمال کیے ہوں ، مگر اُن سے دلی محبت رکھتا ہو جیسے آج ہم گندے کمینے بدکار سیاہ کار حضور سید الابرار صَلَّی اللہُ تَعَالٰی عَلَیْہِ وَاٰلِہٖ وَسَلَّم اور ان کے اصحاب اخیار سے محبت کرتے ہیں ۔  ^{( [2] )}  تو ایسے شخص کے بارے میں آپ کا کیا خیال ہے ؟ تو آپ صَلَّی اللہُ تَعَالٰی عَلَیْہِ وَاٰلِہٖ وَسَلَّمنے ارشادفرمایا :  ’’ہر شخص اپنے محبوب کے ساتھ ہوگا ۔  عَلَّامَہ بَدْرُ الدِّیْن عَیْنِی عَلَیْہِ رَحْمَۃُ اللّٰہِ الْغَنِی فرماتے ہیں :  یعنی جنت میں ہر شخص اسی کے ساتھ ہوگا جس سے وہ محبت کرتا ہے اگر چہ اس نے نیک لوگوں کی طرح زیادہ اعمال صالحہ نہ کیے ہوں لیکن اللہتعالیٰ اسے حُسنِ نیت کی وجہ سے جنتیوں میں شامل فرمادے گا ۔  ^{( [3] )}

مُفَسِّرشہِیرمُحَدِّثِ کَبِیْرحَکِیْمُ الْاُمَّت مُفتِی احمد یار خان عَلَیْہِ رَحْمَۃُ الْحَنَّان فرماتے ہیں : ’’خیال رہے کہ ہر نسبت جنسیت چاہتی ہے ، عشق و محبت نہ جنسیت دیکھے نہ برابری ، بندہ کو اللہ سے ، اُمَّتی کو رسولُ اللہسے عشق ہوسکتا ہے ، اللہتعالیٰ نصیب کرے ، خوفِ خدا ، عشقِ جنابِ مصطفے ٰ صَلَّی اللہُ تَعَالٰی عَلَیْہِ وَاٰلِہٖ وَسَلَّم اللہ کی بڑی نعمت ہے ۔ ‘‘ ^{( [4] )}

نوٹ :  مذکورہ حدیث پاک کی تفصیلی شرح کے لیے حدیث نمبر 368 ملاحظہ فرمائیں ۔

مدنی گلدستہ

امام’’حسن  ‘‘  کے 3حروف کی نسبت سے حدیثِ مذکور اور

  اس کی وضاحت سے ملنے والے 3مدنی پھول

(1)   نیک لوگوں سے محبت کرنے والا جنت میں ان کے ساتھ ہوگا ۔

(2)   ہر نسبت جنسیت چاہتی ہے لیکن محبت جنسیت کی محتاج نہیں ۔

(3)   نیک لوگوں سے محبت کرنے کی وجہ سے بندے کو جنتیوں میں شامل کردیا جاتا ہے ۔

اللہ عَزَّوَجَلَّ سے دعا ہے کہ وہ ہمیں دنیا میں صالحین کی محبت و الفت اور جنت میں ان کی رفاقت و معیت عطا فرمائے ۔                            

صَلُّوْا عَلَی الْحَبِیْب !                   صَلَّی اللہُ تَعَالٰی عَلٰی مُحَمَّد

حدیث نمبر : 371                                                                                                                                                                 لوگ سونے ، چاندی کی کانوں کی طرح ہیں

عَنْ اَبِيْ هُرَيْرَةَ رَضِيَ اللهُ عَنْهُ عَنِ النَّبِيِّ صَلَّى اللهُ عَلَيْهِ وَسَلَّمَ قَالَ : النَّاسُ مَعَادِنُ كَمَعَادِنِ الذَّهَبِ وَالفِضَّةِ خِيَارُهُمْ فِي الْجَاهِلِيَّةِ خِيَارُهُمْ فِي الْاِسْلَامِ اِذَا فَقِهُوْا وَالْاَرْوَاحُ جُنُودٌ مُجَنَّدَةٌ فَمَا تَعَارَفَ مِنْهَا ائْتَلَفَ وَمَا تَنَاكَرَ مِنْهَا اخْتَلَفَ. ^{( [5] )} وَرَوَى الْبُخَارِيُّ قَوْلَهُ :  ” اَلْاَرْوَاحُ“…الخ مِنْ رِوَايَةِ عَائِشَةَ رَضِيَ اللهُ عَنْهَا. ^{( [6] )}

ترجمہ :  حضرتِ سَیِّدُنا  ابو ہریرہ رَضِیَ اللہُ تَعَالٰی عَنْہُ سے روایت ہے کہ حضورنبی کریم صَلَّی اللہُ تَعَالٰی عَلَیْہِ وَاٰلِہٖ وَسَلَّم نے ارشادفرمایا :  ’’لوگ سونے اور چاندی کی کانوں کی طرح ہیں ۔  ان میں سے جو زمانہ ٔ جاہلیت میں بہتر تھے ، وہ زمانہ اسلام میں بھی بہتر ہیں جبکہ وہ دِین کی سمجھ رکھتے ہوں اور رُوحیں جمع شدہ لشکر ہیں ان میں سے جو آپس میں متعارف تھیں وہ ( دنیا میں ) مُتَّحِد ہیں اور جو ایک دوسرے سے اجنبی تھیں وہ ( دنیا میں ) الگ رہتی ہیں ۔   ‘‘  بخاری نے یہ حدیث پاک کہ  ” روحیں جمع شدہ لشکر ہیں ۔ “ اُمُّ المؤمنین حضرتِ سَیِّدَتُنا عائشہ صدیقہ رَضِیَ اللہُ تَعَالٰی عَنْہَاسے روایت کی ہے ۔