تاجِر کو تجارت کے ، خریدار کو خریدنے کے ، نوکری کرنے والے اور نوکر رکھنے والے کو اِجارے کے ، وَعَلٰی ھٰذَا الْقِیَاس(یعنی اور اسی پر قِیاس کرتے ہوئے ) ہر مسلمان عاقِل و بالغ مَرد و عورت پر اُس کی موجودہ حالت کے مُطابِق مسئلے سیکھنا فرضِ عین ہے ۔ اِسی طرح ہر ایک کیلئے مَسائِلِ حلال و حرام بھی سیکھنا فرض ہے ۔ نیز مَسائِلِ قلب (باطِنی مَسائِل) یعنی فرائضِ قلبیہ (باطِنی فرائض) مَثَلًا عاجزی و اِخلاص اور توکُّل وغیرہا اور ان کو حاصِل کرنے کا طریقہ اور باطِنی گناہ مَثَلًا تکبُّر ، رِیاکاری ، حَسَد ، بَدگمانی ، بُغض و کینہ ، شُماتَت (یعنی  کسی کی مصیبت پر خوش ہونا)وغیرہا اور ان کا علاج سیکھنا ہر مسلمان پر فرض ہے ۔  (تفصیلی معلومات کیلئے فتاویٰ رضویہ جلد 23 صفحہ613 تا 624 مُلاحظہ فرمائیے)مہلکات یعنی ہَلاکت میں ڈالنے والی چیزوں جیسا کہ وعدہ خِلافی ، جھوٹ ، غیبت ، چغلی ، بہتان ، بدنِگاہی ، دھوکا ، اِیذاءِ مُسلم وغیرہ وغیرہ تمام صغیرہ و کبیرہ گناہوں کے بارے میں ضَروری اَحکام سیکھنا بھی فرض ہے تاکہ اِن سے بچا جا سکے⁾[1]⁽ ۔ ⁾[2]⁽

تجوید کے ساتھ قراٰن ِ پاک سیکھنا بھی ضَروری ہے ۔ اعلیٰ حضرت عَلَیْہِ رَحْمَۃُرَبِّ الْعِزَّت فرماتے ہیں: بِلاشُبہ اتنی تجوید جس سے تَصْحِیْحِ حُروف ہو (یعنی قواعدِ تجوید کے مُطابِق حُرُوف کو دُرُست مخارِج سے ادا کر سکے)اور غَلَط خوانی (یعنی غَلَط پڑھنے) سے بچے ، فرضِ عین ہے ۔ ⁾[3]⁽اِسی طرح اَذکار ِنماز(یعنی نماز میں تلاوت کے علاوہ جو کچھ پڑھا جاتا ہے ان) کا دُرُست آنا بھی ضَروری ہے ۔ جس نے سُبْحٰنَ رَبِّیَ الْعَظِیْم میں”عَظِیْم“کو عزیم(ظ کے بجائے ز) پڑھ دیا نماز جاتی رہی لہٰذا جس سے”عَظِیْم“ صحیح ادا نہ ہو وہ سُبْحٰنَ رَبِّیَ الْکَرِیْم پڑھے ۔ ⁾[4]⁽یوں ہی جو قراٰنِ پاک یاد ہے اس کا حِفظ باقی رکھنا بھی ضَروری ہے ۔  صَدْرُ الشَّریعہ ، بَدرُ الطَّریقہ حضرتِ علّامہ مولانا مفتی محمد امجد علی اعظمی عَلَیْہِ رَحْمَۃُ اللّٰہِ الْقَوِی  فرماتے ہیں:  قراٰن پڑھ کر بھلا دینا گناہ ہے ۔  جو قراٰنی آیات یاد کرنے کے بعد بھلا دے گا بروزِ قیامت  اَندھا اُٹھایا جائے گا⁾[5]⁽ ۔  ^([6])  

جہاں تک  اولادکو سکھانے کی بات ہے تو قراٰنِ پاک سکھائے ، سات برس کی عمر میں نماز کا حکم دینے کے ساتھ ہی نماز اور طہارت کے ضَروری  مَسائِل بھی سکھائے کہ سات سے نو برس کی عمر بچوں کی تَربیت کے تعلق سے بالخُصُوص  مَدَنی مُنّیوں کے لیے بےحد اَہم ہے کہ مَدَنی مُنّی اس کے بعد کبھی بھی بالغہ ہو سکتی ہے ۔  ان عُلُوم کے سکھانے  کے بعد دُنیوی تعلیم بھی اپنی شَرائط کے ساتھ دی جاسکتی ہے ۔  اعلیٰ حضرت  عَلَیْہِ رَحْمَۃُرَبِّ الْعِزَّت فرماتے ہیں: اہلسنَّت و جماعت کے عقیدے اور طہارت و نماز و روزہ کے مسئلے سیکھنا سب پرفرض ہے ۔  ان ضَروریات اور قراٰنِ عظیم پڑھنے کے بعد پھر اگر اُردو یاگجراتی کی دُنیوی کتاب جس میں کوئی بات نہ دِین کے خِلاف ہو نہ بے شرمی کی ، نہ اَخلاق و عادات پر بُرااَثر ڈالنے کی اور پڑھانے والی عورت سُنّی مسلمان پارسا حیادار ہو تو کوئی حَرج نہیں⁾[7]⁽ ۔ ⁾[8]⁽