بہترین سواری اور سوار
 عَنْ ابْنِ عَبَّاسٍ، قَالَ: كَانَ رَسُوْلُ اللَّهِ صَلَّى اللَّهُ عَلَيْهِ وَسَلَّمَ حَامِلَ الْحَسَنِ بْنِ عَلِيٍّ عَلَى عَاتِقِهِ ،فَقَالَ رَجُلٌ: نِعْمَ المَرْكَبُ رَكِبْتَ يَا غُلَامُ، فَقَالَ النَّبِيُّ صَلَّى اللَّهُ عَلَيْهِ وَسَلَّمَ  :’’ وَنِعْمَ الرَّاكِبُ هُوَ  ‘‘۔ (1)
حضرت سیِّدُنا عبداللہ بن عباس  رَضِیَ اللہُ عَنْھُمَا  فرماتے ہیں : محبوبِ کبریا ، امام الانبیا ﷺ حضرت سیِّدنا حَسن بن علی  رَضِیَ اللہُ عَنْھُمَا  کو اپنے مقدَّس کندھے پر اُٹھائے ہوئے تھے کہ ایک شخص نے کہا: اے صاحبزادے! تم بہت اچھی سواری پر سوار ہو، تو نبیِ اعظم ﷺ نے فرمایا:’’ وہ سوار بھی تو اُچھا ہے۔‘‘
دو حَسین اور بہترین سوار
 عَنْ جَابِرٍ رَضِيَ اللهُ عَنْهُ قَالَ: دَخَلْتُ عَلَى النَّبِيِّ صَلَّى اللهُ عَلَيْهِ وَسَلَّمَ وَهُوَ يَمْشِيْ
عَلَى أَرْبَعَةٍ وَعَلَى ظَهْرِهِ الْحَسَنُ وَالْحُسَيْنُ رَضِيَ اللهُ عَنْهُمَا وَهُوَ يَقُوْلُ  :’’ نِعْمَ الْجَمَلُ جَمَلُكُمَا، وَنِعْمَ الْعِدْلَانِ أَنْتُمَا  ۔‘‘ (2)
حضرت سیِّدُنا جابر بن عبداللہ  رَضِیَ اللہُ عَنْہُمَا  فرماتے ہیں : میں اِس حال میں سیِّدِ اَبرار،جنابِ احمد مختار ﷺ کی بارگاہِ ناز میں حاضر ہوا کہ آپ  ﷺ چار پر(یعنی دونوں مبارَک پاؤں اور دونوں مقدَّس ہاتھوں کے بَل) چل رہے تھے اور آپ ﷺ کی پُشتِ انور پر حضرات حَسن و حُسین رَضِیَ اللہُ عَنْہُمَا   سوار تھےاور سرکارِ اعظم  ﷺ (انہیں یہ محبت بھرا جملہ ) اِرشاد فرمارہے تھے کہ:’’تم دونوں کا اُونٹ کتنا خوب ہے اور تم دونوں سوار بھی کتنے خوب ہو۔‘‘ 
دو عالیشان  سواریاں
 عَنِ الْبَرَاءِ بْنِ عَازِبٍ ،قَالَ: كَانَ النَّبِيُّ صَلَّى اللهُ عَلَيْهِ وَسَلَّمَ يُصَلِّي، فَجَاءَ الْحَسَنُ وَالْحُسَيْنُ، أَوْ أَحَدُهُمَا، فَرَكِبَ عَلَى ظَهْرِهِ، فَكَانَ إِذَا سَجَدَ رَفَعَ رَأْسَهُ، قَالَ بِيَدِهِ، فَأَمْسَكَهُ، أَوْ أَمْسَكَهُمَا، ثُمَّ قَالَ  :’’ نِعْمَ الْمَطِيَّةُ مَطِيَّتُكُمَا  ‘‘۔(3)
حضرت سیِّدُنا بَراء بن عازب  رَضِیَ اللہُ عَنْھ  فرماتے ہیں : امامُ المرسلین،خاتم النبیین ﷺ نماز پڑھاتے تو حضرات حَسن و حَسین رَضِیَ اللہُ عَنْھُمَا  یا ان میں سے کوئی ایک آکر سیِّدالعالَمین ﷺ کی پُشتِ انور پر سوار ہوجاتے۔جب آپ ﷺ سجدہ فرماتے، سجدے سے سر اُٹھاتے ہوئے ان دونوں (نواسوں) کو یا ان میں سے ایک کو تھام لیتے ، پھر فرماتے:’’ تم دونوں کی سواری کتنی اچھی سواری ہے۔‘‘
پُشتِ انور کے دو نورانی سوار
 عَنْ عَبْدِ اللَّهِ، قَالَ: كَانَ النَّبِيُّ صَلَّى اللَّهُ عَلَيْهِ وَسَلَّمَ يُصَلِّي وَالْحَسَنُ وَالْحُسَيْنُ يَثِبَانِ عَلَى ظَهْرِهِ، فَيُبَاعِدُهُمَا النَّاسُ، فَقَالَ صَلَّى اللَّهُ عَلَيْهِ وَسَلَّمَ  : ’’ دَعُوْهُمَا، بِأَبِيْ هُمَا وَأُمِّيْ، مَنْ أَحَبَّنِيْ، فَلْيُحِبَّ هَذَيْنِ  ‘‘۔(4)
  حضرت سیِّدُنا عبد اللہ  رَضِیَ اللہُ عَنْھ  فرماتے ہیں : نبیِ رحمت، شفیعِ اُمّت ﷺ نماز ادا فرما رہےتھے ، حضرت حَسن اور حضرت حُسین  رَضِیَ اللہُ عَنْھُمَا   آپ  ﷺکی پُشتِ اقدس پر بیٹھ گئے ۔ لوگ ان دونوں شہزادوں کو دُور (یعنی منع )کرنے لگےتو سلطانِ کائنات ﷺ نے ارشاد فرمایا:’’ ان دونوں کو چھوڑ دو، ان پر میرے ماں باپ قربان! ، جس نے مجھ سے محبت رکھی اُس پر لازم ہے کہ وہ ان دونوں( حَسن اور حُسین) سے بھی محبت رکھے۔‘‘
دو شاندار  سوار
 عَنْ أَبِي جَعْفَرٍ قَالَ : مَرَّ رَسُوْلُ اللهِ صَلَّى الله عَلَيْهِ وَسَلَّمَ بِالْحَسَنِ وَالْحُسَيْنِ وَهُوَ حَامِلُهُمَا عَلَى مَجْلِسٍ مِنْ مَجَالِسِ الأَنْصَارِ فَقَالُوْا : يَا رَسُوْلَ اللهِ! نَعِمَتِ
الْمَطِيَّةُ قَالَ  :’’ وَنِعْمَ الرَّاكِبَانِ  ۔‘‘ (5)
حضرت سیِّدُنا ابو جعفر رَضِیَ اللہُ عَنْہ  فرماتے ہیں : ایک بار سرورِ دو عالَم، نورِ مجسَّم ﷺ حضراتِ حَسن اور حُسین رَضِیَ اللہُ عَنْہُمَا   کو اُٹھائے ہوئے اَنصار کی ایک مجلس سے گزرے تو اَنصار صحابہ نے عرض کی : یارسول اللہ  ﷺ ! کیا ہی خوب سواری ہے! جانِ عاَلم ﷺ نے اِرشاد فرمایا: ’’ دونوں سوار بھی تو کتنے خوب ہیں۔‘‘
پُشتِ انور کی برکتیں لینے والے شہزادے
 عَنْ عَبْدِ اللَّهِ قَالَ : كَانَ رَسُوْلُ اللَّهِ صَلَّى اللهُ عَلَيْهِ وَسَلَّمَ يُصَلِّيْ فَإِذَا سَجَدَ وَثَبَ الْحَسَنُ وَالْحُسَيْنُ عَلَى ظَهْرِهِ فَإِذَا مَنَعُوْهُمَا أَشَارَ إِلَيْهِمْ أَنْ دَعُوْهُمَا فَلَمَّا قَضَى الصَّلَاةَ وَضَعَهُمَا فِيْ حَجْرِهِ فَقَالَ:  ’’ مَنْ أَحَبَّنِيْ فَلْيُحِبَّ هَذَيْنِ  ۔‘‘(6)
حضرت سیِّدُنا عبداللہ  رَضِیَ اللہُ عَنْہ  فرماتے ہیں : امام المرسلین،خاتم النبیین ﷺ نماز ادا فرما رہےتھے۔جب آپ  ﷺ نے سجدہ فرمایا تو جنابِ حَسن اور حضرت حُسین رَضِیَ اللہُ عَنْہُمَا   آپ  ﷺ کی پُشتِ انور پر سوار ہوگئے۔ جب لوگوں نے ان شہزادوں کو روکا (اس طرح کرنے سے منع کیا) تو نبیِ کریم ﷺ نے لوگوں کو اِشارہ فرما دیا کہ ان دونوں (حسن اور حُسین  رَضِیَ اللہُ عَنْہُمَا  ) کو چھوڑ دو۔ پھر جب رسولِ اکرم ﷺ نے نماز مکمل فرمائی تو ان دونوں کو اپنی آغوش( گود مبارَک) میں لے کر ارشاد فرمایا: ’’ جو شخص مجھ سے محبت رکھتا ہے تو اُسے چاہئے کہ ان دونوں(حسن و حُسین رَضِیَ اللہُ عَنْہُمَا  ) سے بھی محبت رکھے۔‘‘
 

1  سنن ترمذی  ،  ابواب المناقب  ،باب۔۔۔،4/523،حدیث:4137
2  المعجم الکبیر للطبرانی،بقیۃ اخبار الحسن بن علی رضی اللہ عنھما  ، 3/46حدیث:2661
۔۔۔’’ مجمع الزوائد  ‘‘،کتاب المناقب، ٢١- باب:فیما اشترک فیہ الحسن والحسین  ،الخ، 18/515، حدیث:15075
۔۔۔’’ سیر اعلام النبلاء  ‘‘،٤٧ –  الحسن بن علی  بن ابی طالب ، 3/256 
3 المعجم الاوسط للطبرانی، باب العین،من اسمہ علی،4/205،حدیث:3987
4 الاحسان فی تقریب صحیح ابن حبان، کتاب التاریخ،باب اخبارہﷺ عن مناقب الصحابۃ۔۔۔الخ، ذکرالبیان بان محبۃ الحسن والحسین۔۔۔الخ  ،7/563،حدیث:7012
 ۔۔۔۔ المعجم الکبیر للطبرانی  ،بقیۃ اخبار  الحسن بن علی رضی اللہ عنھا  ، 3/40 حدیث:2644
5. المصنّف لابن ابی شیبۃ، کتاب الفضائل  ،٢٣- ما جاء فی الحسن والحسین رضی اللہ عنھما  ،17/171-173،حدیث:32859
6 صحیح ابن خزیمۃ ،کتاب الصلاۃ،جماع ابواب الافعال المباحۃ فی الصلاۃ  ،٣٣٦-باب ذکر الدلیل علی ان الاشارۃ۔۔۔الخ ،2/106،حدیث:887
 ۔۔۔ المصنّف لابن ابی شیبۃ، کتاب الفضائل  ،٢٣- ما جاء فی الحسن والحسین رضی اللہ عنھما  ،17/157-158، حدیث :32838