عَنْ عُمَرَ بْنِ الْخَطَّابِ رَضِيَ اﷲُ تَعَالیٰ عَنْہُ قَالَ :

قَالَ : رَسُولُ اﷲِ صَلَّی اﷲُ عَلَیْہِ وَسَلَّمَ  إِنَّمَا الْاَعْمَالُ بِالنِّیَّاتِ وإِنَّمَا لِکُلِّ  إمْرِئٍ مَّا نَوٰی فَمَنْ کَانَتْ ھِجْرَتُہُ اِلَی اﷲِ وَرَسُولِہِ فَھِجْرَتُہٗ اِلَی اﷲِ وَرَسُولِہٖ وَمَنْ کَانَتْ ھِجْرَتُہٗ اَلٰی دُنْیَا  یُصِیْبُھَا اَوِ إمْرَأَۃٍ  یَتَزَوَّجُھَا  ھِجْرَتُہٗ إِلَی مَا ھَاجَرَ إِلَیْہِ‘‘۔  مُتَفِقٌ عَلَیْہِ ^([1])

ترجمہ : - حضرت سیدنا عمر بن الخطاب  رَضِیَ اللہُ تَعَالٰی عَنْہُ  سے روایت ہے کہا انہوں نے ، فرمایا رسول کریم  صَلَّی اللہ تَعَالٰی عَلَیْہِ وَاٰلہٖ وَسَلَّم نے ، سوائے اس کے نہیں اعمال ( کا اعتبار اور خدا کی درگاہ میں قبولیت) نیتوں ^([2])  کے ساتھ ہے ۔ یعنی کوئی عمل بدون نیت معتبر اور مقبول نہیں ۔ اور کسی آدمی کو اس کے کام میں حصہ یا ثواب نہیں مگر وہی جو اس نے نیت کی پس جس شخص کی ہجرت محض خدا  عَزَّ وَجَلَّ اور اس کے رسول صَلَّی اللہ تَعَالٰی عَلَیْہِ وَاٰلہٖ وَسَلَّم کیلئے ہو (یعنی اس کی نیت میں طلب رِضا و امتثال امر شارع^([3])  ہو) تو اس کی ہجرت خدا  عَزَّ وَجَلَّ اور اس کے رسول  صَلَّی اللہ تَعَالٰی عَلَیْہِ وَاٰلہٖ وَسَلَّم  کے لئے ہے۔ (یعنی مقبول ہے اور اس پر ثواب عظیم مترتب ہوتا ہے ) اور جس کی ہجرت محض حصول دنیا کے لئے ہو یا کسی عورت سے نکاح کرنے کے لئے ہجرت کرتا ہو (خدا  عَزَّ وَجَلَّ اور رسول صَلَّی اللہ تَعَالٰی عَلَیْہِ وَاٰلہٖ وَسَلَّم کی رِضا مندی کیلئے نہ ہو) تو اس کی ہجرت اسی چیز کی طرف ہے جس کی طرف اس نے ہجرت کی یعنی حصول دنیا یا نکاح ۔ اس کو بخاری و مسلم نے روایت کیا ہے۔

اس حدیث میں بڑا علم ہے ۔ امام شافعی و احمد رَحِمَھُمَا اللّٰہُ تَعَالیٰ نے اس حدیث کو ثلث اسلام یا ثلث علم فرمایا ہے ۔ بیہقی نے اس کی توجیہ یہ فرمائی ہے کہ علم یا دل سے ہوتا ہے یا زبان سے یا بقیہ اعضاء سے اور نیت عمل دل کا ہے ۔ اس لئے یہ حدیث علم کا تیسرا حصہ ہوئی ۔ مرقاۃ ^([4])

اکثر مصنفین اصلاح نیت کے لئے اپنی کتابوں کو اسی حدیث سے شروع کیا کرتے تھے ۔ اس حدیث میں جناب رسول کریم  صَلَّی اللہ تَعَالٰی عَلَیْہِ وَاٰلہٖ وَسَلَّم نے اخلاص کی ہدایت فرمائی ہے ۔ اور ہر عمل کے ثواب کو نیت پر موقوف فرمایا ہے ۔ اگر اعمال میں نیت نیک ہے تو ثواب ہے ورنہ نہیں ۔ ہجرت ایک عمل ہے اگر اس میں حق سبحانہ و تعالیٰ کی رِضا او ر امتثالِ امر مقصود ہے تو موجبِ برکات ہے ۔ اگر یہ نہیں تو کچھ نہیں ۔ اسی طرح انسان جو عمل کرتا ہے اگر اس میں رضائے حق مقصود ہے تو باعث اجر ہے ورنہ نہیں ۔ اب اس حدیث سے جو فوائد مستنبط ^([5]) ہوسکتے ہیں وہ سنو اور خوب یاد رکھو ۔

۱۔  ایک شخص اپنے قریبی کو کچھ خیرات دیتا ہے ۔ اگر صرف اس کی غریبی کا خیال کرکے دیتا ہے ۔ صلہ رحمی کی نیت نہیں تو صدقہ کا ثواب پائے گا۔ لیکن صلہ رحم نہ ہو گا۔ اگرمحض صلہ رحمی کے لئے دیتا ہے تو صلہ رحم کا ثواب ہوگا۔ صدقہ کا ثواب نہ ہوگا۔ اگر دونوں نیت کرے تو دونوں ثواب پائے گا۔ معلوم ہوا کہ ایک کام میں متعدد نیتیں کرنے سے ہر ایک نیت پر ثواب ملتا ہے ۔

۲۔ مثلاً مسجد میں بیٹھنا ایک عمل ہے اگر اس میں بہ نیت اعتکاف بیٹھے تو اعتکاف کا ثواب پائے گا ۔ اگر نیت اعتکاف کے ساتھ یہ نیت بھی ہوکہ جماعت کا انتظار ہے تو بحکم حدیث (جماعت کا منتظر نماز میں ہے ) اس کو نماز کا ثواب بھی ملے گا^([6])۔ پھر اسکے ساتھ اگر یہ نیت کرے کہ آنکھ کان اور تمام اعضاء کی جملہ منہیات^([7]) سے حفاظت ہو گی تو یہ ثواب بھی حاصل ہوگا۔ پھر اس پر یہ نیت بھی کرے کہ صلوٰۃ وسلام آنحضرت صَلَّی اللہ تَعَالٰی عَلَیْہِ وَاٰلہٖ وَسَلَّم  پر بیٹھ کر پڑھوں گا تو اس کا ثواب بھی پائے  گا۔ اگر یہ نیت بھی کرے کہ حج و عمرہ کا ثواب