دوسری حدیث میں اس کی صاف تصریح ہے۔ جس کو نسائی^([1]) نے روایت کیا۔ فَلَمْ اَسْمَعْ اَحَدًا مِّنْھُمْ یَجْھَرُ بِسْمِ اللّٰہِ الرَّحْمٰنِ الرَّحِیْمِکہ میں نے ان میں سے کسی کو نہیں سنا کہبِسْمِ اللّٰہِ جہر سے پڑھتے ہوں ۔ تو معلوم ہوا کہ بِسْمِ اللّٰہِپڑھنے کی نفی نہیں ۔ بلکہ اونچی پڑھنے کی نفی ہے۔

حدیث {۲۰}

عَنْ اَبِیْ مُوْسیٰ قَالَ عَلَّمَنَا رَسُوْلُ اﷲِ صَلَّی اللہ تَعَالٰی عَلَیْہِ وَاٰلہٖ وَسَلَّم قَالَ اِذَا قُمْتُمْ اِلَی الصَّلوٰۃِ فَلْیَؤُمُّکُمْ أحَدُکُمْ وَاِذَا قَرَأَ الْاِمَامُ فَاَنْصِتُوْا۔   رواہ أحمد و مسلم ^([2])

ترجمہ : -حضرت سیدنا ابو موسیٰ اشعری  رَضِیَ اللہُ تَعَالٰی عَنْہُ کہتے ہیں کہ رسول کریم و رؤف رحیم صَلَّی اللہ تَعَالٰی عَلَیْہِ وَاٰلہٖ وَسَلَّم نے ہمیں سکھایا کہ جب تم نماز کے لئے اٹھو تو چاہیئے کہ تم میں سے ایک تمہارا امام بنے اور جب امام پڑھے تو تم چپ رہو ۔

اس کو امام احمدومسلم نے روایت کیا۔

اس حدیث سے معلوم ہوا کہ قرائت امام کا حق ہے اور مقتدی کو خاموش رہنے کا حکم ہے ۔ یہ حدیث قرآن کریم کی تفسیر ہے ۔

اﷲ تعالیٰ فرماتا ہے :

وَ اِذَا قُرِئَ الْقُرْاٰنُ فَاسْتَمِعُوْا لَهٗ وَ اَنْصِتُوْا لَعَلَّكُمْ تُرْحَمُوْنَ(۲۰۴)

ترجمۂ کنزالایمان : اور جب قرآن پڑھا جائے تو اُسے کان لگاکر سنو اور خاموش رہو کہ تم پر رحم ہو۔ (الاعراف۹/۲۰۴)

 اس آیت سے یہ معلوم نہیں ہوتا تھاکہ پڑھنے والا کون ہو۔ حدیث مذکور نے یہ بیان کردیا کہ وہ پڑھنے والا امام ہے۔ جب امام قرآن پڑھے تو تم خاموش رہو۔ معلوم ہوا کہ مقتدی فاتحہ خلف الامام نہ پڑھے^([3])۔ یہی صحیح ہے۔ حضرت سیدناابوہریرہ رَضِیَ اللہُ تَعَالٰی عَنْہُ نے بھی اس حدیث کو روایت کیا۔ فرمایا رسول   کریم صَلَّی اللہ تَعَالٰی عَلَیْہِ وَاٰلہٖ وَسَلَّم نے :

اِنَّمَا جُعِلَ الْاِمَامُِ لِیُؤْتَمََّّ بِہِ فَاِذَا کَبَّرَ فَکَبِِّرُوْا وَاِذَا قَرَئَ فَاَنْصِتُوْا۔

ترجمہ : امام اس لئے بنایا گیا ہے کہ اس کی اقتدا کی جائے۔ جب وہ تکبیر کہے تو تم تکبیر کہو۔ جب وہ پڑھے تو تم چپ رہو۔^([4])

 اس کو ابوداؤد ابن ماجہ نسائی وغیرہم نے روایت کیا۔ یہ حدیث بھی صحیح ہے۔ اس کو مسلم نے بھی صحیح کہا ہے ۔

حدیث{۲۱}

عَنْ جَابِرٍٍ قَالَ قَالَ رَسُوْلُ اﷲِ صَلَّی اللہ تَعَالٰی عَلَیْہِ وَاٰلہٖ وَسَلَّم مَنْ کَانَ لَہ اِمَامٌ فَقِرَأۃُ الْاِمَامِِِ لَہٗ قِرَأْۃٌ۔  رَوَاہٗ الْحَافِظُ اَحْمَدُ بْنُ مُنِیْعٍ فِیْ مُسْندِہِ وَ مُحَمَّدٌ فِی الْمُؤَطَّا وَ الطَّحَاوِیْ وَ الدَّارُقُطْنِیْ ^([5])

ترجمہ : - حضرت سیدنا جابر رَضِیَ اللہُ تَعَالٰی عَنْہُ سے روایت ہے کہ رسول کریم صَلَّی اللہ تَعَالٰی عَلَیْہِ وَاٰلہٖ وَسَلَّم نے فرمایا جس شخص کے لئے امام ہو تو امام کا پڑھنا اسی کا پڑھنا ہے ۔

یعنی امام کی قراء ت مقتدی ہی کی قراء ت ہے ۔ مقتدی کو خود قرآن میں سے کچھ نہ پڑھنا چاہیئے۔ یہ حدیث صحیح ہے ۔ اس کے سب راوی ثقہ ہیں ۔

حدیث لاصلوٰۃ جس کو بخاری و مسلم ^([6])نے روایت کیا وہ امام اور منفرد کیلئے ہے اس حدیث کی ایک روایت میں فَصَاعِدًا  بھی آیا ہے یعنی اَلْحَمْدُ اور کچھ زیادہ کے سوا نماز نہیں ۔ تو اگر یہ حدیث مقتدی کو بھی عام ہو تو لازم آتاہے۔ کہ علاوہ فاتحہ کے مقتدی پر سورۃ بھی واجب ہو او ر اس کا کوئی قائل نہیں ۔ معلوم ہوا کہ یہ حدیث امام اور منفرد کے لئے ہے۔ ابوداؤد میں سفیان جو اس حدیث کے راوی ہیں فرماتے ہیں  لِمَنْ یُّصَلِّیْ وَحْدَہٗ کہ یہ حدیث اس شخص کے لئے ہے جو اکیلا نماز پڑھے یعنی مقتدی کے لئے نہیں ۔

حدیث عبادہ جس میں نماز فجر کا قصہ ہے وہ ضعیف ہے ۔ کسی روایت میں مکحول ہے جو مدلِّس^([7]) ہے ۔ اور معنعن^([8])روایت کرتا ہے ۔ مدلس کی معنعن قابل حجت نہیں ۔ اگرکسی روایت میں اپنے شیخ سے تحدیث بھی کرتا ہے توشیخ الشیخ سے بلفظ عن روایت کرتا ہے اور اصول حدیث میں لکھا ہے کہ مدلس کبھی شیخ الشیخ کوبھی ساقط کرتا ہے ۔ اس لئے حجت نہیں اورکسی روایت میں نافع بن محمود ہے جو مستور الحال^([9])ہے ۔ کسی روایت میں مکحول عن عبادہ ہے جو مرسل^([10]) ہے ۔ الغرض کوئی روایت صحیح نہیں ۔ اس مسئلہ کی اگر زیادہ تفصیل دیکھنا ہو تو