حضرتِ سَیِّدُنا ابوبکر صدیق رَضِیَ اللّٰہُ  عَنْہُ بارگاہِ رسالت میں عرض کرتے ہیں : یارسولَ اللہ صَلَّی اللّٰہُ عَلَیْہِ وَاٰلِہٖ وَ سَلَّم! میں سارے عرب میں گھوما پھرا ہوں  اور میں نے بڑے بڑے فصحائے عرب یعنی بہت اچھے انداز سے عربی بولنے والوں کو بھی سنا ہے ، لیکن آپ سے زیادہ فصیح  کسی کو نہیں سنا۔ آپ صَلَّی اللّٰہُ عَلَیْہِ وَاٰلِہٖ وَ سَلَّم نے ارشاد فرمایا : ’’مجھے میرے رب نے ادب سکھایا ہے۔ ‘‘^([1]) اعلیٰ حضرت امام احمد رضا خان رَحْمَۃُ اللہِ عَلَیْہ بارگاہِ رسالت میں عرض کرتے ہیں :

میں نثار تیرے کلام پر ، ملی یوں تو کس کو زباں نہیں

وہ سخن ہے جس میں سخن نہ ہو ، وہ بیاں ہے جس کا بیاں نہیں

ترے آگے یوں ہیں دَبے لچے ، فصحا عرب کے بڑے بڑے

                                                                                                                                                                                                            کوئی جانے مُنہ میں زباں نہیں ، نہیں بلکہ جسم میں جاں نہیں                    (حدائقِ  بخشش)

                             شرح کلامِ رضا : یَارسولَ اللہ صَلَّی اللّٰہُ عَلَیْہِ وَاٰلِہٖ وَ سَلَّم! میں آپ کے پیارے پیارے کلام  پر قربان جاؤں ، آپ صَلَّی اللّٰہُ عَلَیْہِ وَاٰلِہٖ وَ سَلَّم جیسی شیریں گفتگو کرنے والی زبان کسی کو بھی نہیں ملی ، آپ کی مبارک گفتگو میں کوئی اعتراض نہیں اور آپ کا بیان تو ایسا ہے کہ اس کا  بیان ہی نہیں ہوسکتا۔ اے  میرے آقا و مولیٰ! آپ  کے سامنے عرب کے بڑے بڑے فصیح و بلیغ عربی بولنے والے ایسے ہیں جیسے گونگے ہوں ، ان کے مُنہ میں زبان تو کیا! آپ صَلَّی اللّٰہُ عَلَیْہِ وَاٰلِہٖ وَ سَلَّم کے سامنے آنے کے لئے ان کے جسموں میں گویا جان ہی نہیں ہے۔

                             حضرتِ سَیِّدُنا عمر فاروق اعظم رَضِیَ اللّٰہُ  عَنْہُ نے عرض کی : یَارسولَ اللہ صَلَّی اللّٰہُ عَلَیْہِ وَاٰلِہٖ وَ سَلَّم! آپ ہم سب سے زیادہ  فصیح ہیں ، جبکہ آپ صَلَّی اللّٰہُ عَلَیْہِ وَاٰلِہٖ وَ سَلَّم کہیں تشریف بھی نہیں لے گئے ، پھر اس میں کیا راز ہے؟ تو شہد سے بھی شیریں بولنے والے پیارے آقا صَلَّی اللّٰہُ عَلَیْہِ وَاٰلِہٖ وَ سَلَّم نے ارشاد فرمایا : ’’اسماعیل عَلَیْہِ السَّلَام کی لغت مِٹ چکی تھی ، جبریل اسے میرے پاس لائے ، میں نے اسے یاد کرلیا۔ ‘‘^([2]) اللہ کریم کے آخری نبی صَلَّی اللّٰہُ عَلَیْہِ وَاٰلِہٖ وَ سَلَّم نے ارشاد فرمایا : “ مجھے ’’جَوَامِعُ الْکَلِم‘‘ کے ساتھ بھیجا گیا ہے۔ ‘‘ ^([3])اے عاشقانِ رسول! میں آپ کو ’’جَوَامِعُ الْکَلِم‘‘ کے خزانے سے ایک فرمانِ عالی شان پیش کرتا ہوں۔

                             بخاری شریف میں ہے : ’’کامل مسلمان وہ ہے  جس کی زبان اور ہاتھ سے دوسرے مسلمان محفوظ رہیں ، اور مہاجر یعنی ہجرت کرنے والا وہ ہے جو اللہ پاک کی منع کی گئی چیزوں کو چھوڑ دے۔ ‘‘^([4]) شارح بخاری مفتی شریف الحق امجدی رَحْمَۃُ اللہِ عَلَیْہ فرماتے ہیں : ’’یہ حدیث بھی ان ’’جَوَامِعُ الْکَلِم‘‘ میں سے ہے جنہیں محدثین نے  ’’اُمُّ الْاَحَادِیْث‘‘ (یعنی حدیثوں کی اصل ، بنیاد) میں شمار کیا ہے۔ غور کیجئے! چند الفاظ ہیں ، مگر ان میں معانی کے سمندر موجزن ہیں۔ پہلا حصّہ بندوں کی تمام حق تلفیوں سے بچنے اور تمام حقوق کی  ادائیگی کی طرف راہ نُمائی کرتا ہے اور دوسرا حصّہ حُقُوقُ اللہ  کی بجا آوری میں ہرقسم کی کوتاہی پر قَدْ غَن (یعنی روک) لگا رہا ہے۔ اب ذرا سا غور کرنے پر اس کی شرح میں ہر ذی علم (یعنی عالم) دفتر پر دفتر تیار کرسکتا ہے۔ اگر مسلمان ان دونوں حصّوں پرعمل پیرا ہوجائیں تو ہمارا سَماج (یعنی سوسائٹی اور معاشرہ ) امن کا گہوارہ بن جائے او ر  انسان کا بھی ظاہر وباطن کُندن (یعنی سونے کی طرح چمکنے والا) ہوجائے۔‘‘^([5])

                             جب کسی کو اُلٹا سیدھا بولنے کا دل کرے ، گالی دینا چاہے ، برا بھلا کہنا چاہے یا طنز کرنے کا دل کرے تو یہ حدیث یاد کرلے۔ یہ سب میں راہ نُمائی کرےگی۔ کسی کو مارنا پیٹنا چاہے ، کچھ  چھیننا چاہے ، لوٹنا چاہے یا چوری کرنا چاہے ، اسی طرح فائرنگ کرنا چاہے ، چھری مارنا چاہے یا اللہ نہ کرے بم پھاڑ نا چاہے تو بھی یہ حدیث راہ نُمائی کرے گی۔ اگر اس حدیث پر سب کا عمل ہوجائے تو سار ا معاشرہ مدینہ مدینہ ہوجائے۔ اعلیٰ حضرت امام احمد رضا خان رَحْمَۃُ اللہِ عَلَیْہ فرماتے ہیں :

اس کی پیاری فصاحت پہ بیحد درود

اس  کی  دلکش  بلاغت  پہ  لاکھوں   سلام

اس کی باتوں کی لذت پہ لاکھوں درود

                                                                                                                                                                                                           اُس کے خطبے کی ہیبت پہ لاکھوں سلام                                 (حدائقِ  بخشش)

جامعۃُ المدینہ کی طالبہ اور خواب میں دیدار مصطفےٰ

سُوال :  مَاشَآءَ اللہ جامعۃُ المدینہ (دعوتِ اسلامی) کی ایک طالبہ رَبِیْعُ الْاَوَّلْ 1442 ہجری کی گیارہویں شب پیارے آقا صَلَّی اللّٰہُ عَلَیْہِ وَاٰلِہٖ وَ سَلَّم کی زیارت سے مشرف ہوئی۔ خواب میں آپ