- Home
- Al Madina Library
- Aashiq e Akbar
- Siddiq E Akbar Ki Shan
30 سے زائد لینگوئجز میں 5000 سے زائد اسلامی کتب کا خزانہ آن لائن پڑھیں اور ڈاؤن لوڈ کریں
Aashiq e Akbar | عاشق اکبر
Siddiq e Akbar Ki Shan Aur Quran
صدِّیقِ اَکبر کی شان اور قرآن
اعلیٰ حضرت ، عظیم ُالبَرَکت ، مجدِّدِ دین وملّت ، امامِ عشق ومَحَبّت الحاج القاری الحافظ شاہ امام اَحمد رضا خان عَلَیہِ رَحمَۃُ الرَّحمٰن نقْل فرماتے ہیں : ’’حضرتِ سیِّدُنا امام فخر الدّین رازی عَلَیْہِ رَحمَۃُ اللہِ الھَادِی نے’’مَفَاتِیْحُ الغَیْب(تفسیرِکبیر)‘‘ میں فرمایا کہ سُوْرَۂ وَالَّیل (حضرتِ سیِّدُنا) ابوبکر ( رضی اللہ تعالٰی عنہ ) کی سورۃ ہے اور سُوْرَۂ وَالضُّحٰی (حضرتِ سیِّدُنا) محمّد صلَّی اللہ تعالٰی علیہ واٰلہ ٖ وسلَّم کی سورۃہے۔
وصفِ رُخ اُن کا کیا کرتے ہیں شرحِ والشّمس وضُحٰی کرتے ہیں
اُن کی ہم مَدح و ثنا کرتے ہیں جن کو محمود کہا کرتے ہیں
(حدائق بخشِش شریف)
اعلٰی حضرت کی تشریح
میرے آقا اعلیٰ حضرت ، اِمامِ اَہلسنّت ، مولاناشاہ امام اَحمد رضا خان علیہ رحمۃُ الرَّحمٰن حضرتِ سیِّدُناامام فخر الدّین رازی علیہ رَحمَۃُ اللہِ الْھادی کے اِس قولِ مبارَک کی تشریح کرتے ہوئے فرماتے ہیں : حضرتِ سیِّدُنا صِدِّیقِ اَکبر رضی اللہ تعالٰی عنہ کی سور ۃکو ’’وَالَّیل‘‘کا نام دینااور مصطَفٰے جانِ رَحمت صلَّی اللہ تعالٰی علیہ واٰلہ ٖ وسلَّم کی سورۃ کا نام ’’وَالضُّحٰی‘‘ رکھنا گویا اِس بات کی طرف اِشارہ ہے کہ نبی صلَّی اللہ تعالٰی علیہ واٰلہ ٖ وسلَّم صِدِّیق کا نور اور اُن کی ہدایت اور اللہُ عَزَّوَجَلَّ کی طرف اُن کا وسیلہ جن کے ذَرِیعے اللہُ عَزَّوَجَلَّ کا فضل اور اُس کی رضا طلَب کی جاتی ہے اور صِدِّیق رضی اللہ تعالٰی عنہ ، نبی صلَّی اللہ تعالٰی علیہ واٰلہ ٖ وسلَّم کی راحت اور اُن کے اُنس وسُکون اور اِطمینانِ نفس کی وجہ ہیں اور اُن کے مَحرَمِ راز اور اُن کے خاص مُعامَلات سے وابَستہ رہنے والے ، اِس لئے کہ اللہُ تبارَکَ وَتعالیٰ فرماتا ہے: وَّ جَعَلْنَا الَّیْلَ لِبَاسًاۙ(۱۰)’’اور رات کو پردہ پوش کیا ۔ ‘‘ (پ 30 ، النبا : 10)اور اللہ تعالیٰ فرماتا ہے: جَعَلَ لَكُمُ الَّیْلَ وَ النَّهَارَ لِتَسْكُنُوْا فِیْهِ وَ لِتَبْتَغُوْا مِنْ فَضْلِهٖ وَ لَعَلَّكُمْ تَشْكُرُوْنَ(۷۳)’’تمہارے لیے رات اور دن بنائے کہ رات میں آرام کرو اور دن میں اُس کا فضل ڈھونڈو اور اس لیےکہ تم حق مانو۔ ‘‘(پ 20 ، القصص :73)اور یہ اِس بات کی طرف تَلْمِیْح(یعنی اِشارہ) ہے کہ دین کا نظام اِن دونوں (محبوبِ ربِّ اکبر و صِدِّیقِ اکبر صلَّی اللہ تعالٰی علیہ واٰلہ ٖ وسلَّم و رضی اللہ تعالٰی عنہ ) سے قائم ہے جیسے کہ دنیاکا نظام دن رات سے قائم ہے تو اگر دن نہ ہو توکچھ نظر نہ آئے اور رات نہ ہو تو سکون حاصل نہ ہو۔
(ماخوذ ازفتاوٰی رَضَوِیہ ج۲۸ ، ص۶۷۹۔۶۸۱)
خاص اُس سابِقِ سیرِ قربِ خدا اَوحَدِ کامِلِیَّت پہ لاکھوں سلام
سایۂ مصطَفٰے ، مایۂ اِصطَفا عِزّ و نازِ خِلافت پہ لاکھوں سلام
اَصدَقُ الصَّادِقِیں ، سیِّدُ المُتَّقِیں چَشم وگوشِ وزارت پہ لاکھوں سلام
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
طَبَرانی نے اَوسط میں حضرتِ سیِّدُنا ابنِ عمر رضی اللہ تعالٰی عنہما کے حوالے سے بیان کیا ہے کہ تازِیْسْتْ (یعنی زندگی بھر)حضرتِ سیِّدُنا صِدّیق اَکبر رضی اللہ تعالٰی عنہ منبرِ مُنوَّر پر اس جگہ نہیں بیٹھے جہاں حُضور صلَّی اللہ تعالٰی علیہ واٰلہ ٖ وسلَّم تشریف فرما ہوتے تھے ، اِسی طرح حضرتِ سیِّدُنا عُمر فاروقِ اعظم رضی اللہ تعالٰی عنہ ، حضرتِ سیِّدُنا صِدّیق اَکبر رضی اللہ تعالٰی عنہ کی جگہ اور حضرتِ سیِّدُناعثمانِ غنی رضی اللہ تعالٰی عنہ حضرتِ سیِّدُنا عُمر فاروقِ اعظم رضی اللہ تعالٰی عنہ ، کی جگہ پر جب تک زندہ رہے کبھی نہیں بیٹھے۔(تارِیخُ الْخُلَفاء ص۷۲)
سرکارِ نامدار کا یار
میٹھے میٹھے اِسلامی بھائیو! جس طرح مُحِبِّ مہرِ مُنَوَّر ، رَفیقِ رَسولِ اَنور ، عاشقِ اکبر حضر تِ سیِّدُنا صِدِّیقِ اکبر رضی اللہ تعالٰی عنہ کو محبوبِ ربِّ اکبر ، دوعالَم کے تاجْوَر صلَّی اللہ تعالٰی علیہ واٰلہ ٖ وسلَّم سے بے پناہ عشق ومَحَبَّت تھی ، اِسی طرح رسولِ رحمت ، سراپا جُودو سخاوَت صلَّی اللہ تعالٰی علیہ واٰلہ ٖ وسلَّم بھی صِدِّیقِ اکبر رضی اللہ تعالٰی عنہ سے مَحَبّت وشفقت فرماتے۔اعلیٰ حضرت ، اِمامِ اَہلسنّت ، مولاناشاہ امام اَحمد رضا خان علیہ رحمۃُ الرَّحمٰن نے ’’فتاویٰ رضویہ ‘‘ کی جلد نمبر 8 صَفْحَہ610 پر وہ اَحادیث مبارَکہ جمع فرمائیں جن میں رسولُ اللہ صلَّی اللہ تعالٰی علیہ واٰلہ ٖ وسلَّم نے اپنے پیارے صِدِّیق اَکبر رضی اللہ تعالٰی عنہ کی شانِ رفعت نِشان بیان فرمائی ہے چُنانچِہ تین روایات مُلاحظہ فرمایئے:(1) حِبْرُ الْاُ مَّہ( یعنی اُمَّت کے بہُت بڑے عالم) حضرتِ سیِّدُنا عبد اللہ بنِ عبّاس رضی اللہ تعالٰی عنہما سے رِوایَت ہے ، رسو لُ اللہ صلَّی اللہ تعالٰی علیہ واٰلہ ٖ وسلَّم اورحُضُور صلَّی اللہ تعالٰی علیہ واٰلہ ٖ وسلَّم کے صَحابہ(عَلَیْہِمُ الرِّضْوان ) ایک تالاب میں تشریف لے گئے ، حُضُور( صلَّی اللہ تعالٰی علیہ واٰلہ ٖ وسلَّم )نے ارشاد فرمایا:ہر شخص اپنے یار کی طرف پَیرے (یعنی تیرے)۔ سب نے ایسا ہی کیا یہاں تک کہ صرف رسولُ اللہ صلَّی اللہ تعالٰی علیہ واٰلہ ٖ وسلَّم اور ( حضرتِ سیِّدُنا )ابو بکر صِدِّیق( رضی اللہ تعالٰی عنہ ) باقی رہے ، رسولُ اللہ صلَّی اللہ تعالٰی علیہ واٰلہ ٖ وسلَّم صِدِّیق ( رضی اللہ تعالٰی عنہ )کی طرف پَیر (یعنی تَیر) کے تشریف لے گئے اور انہیں گلے لگا کر فرمایا: ’’میں کسی کو خلیل بناتا تو ابوبکر رضی اللہ تعالٰی عنہ کوبناتا لیکن وہ میرا یار ہے۔‘‘ (اَلْمُعْجَمُ الْکبِیر ج۱۱ص۲۰۸)(2)حضرتِ (سیِّدُنا) جابربن عبد اللہ رضی اللہ تعالٰی عنہما سے روایت ہے کہ ہم خدمتِ اقدس حُضُورِ پُر نور صلَّی اللہ تعالٰی علیہ واٰلہ ٖ وسلَّم میں حاضِر تھے ، اِرشاد فرمایا: اِس وَقت تم پر وہ شخص چمکے (یعنی ظاہِرہو)گا کہ اللہ عَزَّوَجَلَّ نے میرے بعد اُس سے بہتر وبُزُرگ تر کسی کو نہ بنایا اور اُس کی شَفاعت ، شَفاعتِ انبیاءِ کرام( عَلَیْہِمُ السَّلام ) کے مانند ہوگی۔ ہم حاضِر ہی تھے کہ (حضرتِ سیِّدُنا) ابو بکر صِدِّیق رضی اللہ تعالٰی عنہ نظر آئے ، سیِّدِ عالم صلَّی اللہ تعالٰی علیہ واٰلہ ٖ وسلَّم نے قِیام فرمایا(یعنی کھڑے ہوگئے) اور( حضرتِ سیِّدُنا ) صِدِّیق رضی اللہ تعالٰی عنہ کو پیار کیا اور گلے لگایا۔(تاریخِ بغدادج ۳ ص۳۴۰)(3) حضرتِ (سیِّدُنا) عبد اللہ بنِ عبّاس رضی اللہ تعالٰی عنہما سے رِوایَت ہے ، میں نے حُضُور اَقدس صلَّی اللہ تعالٰی علیہ واٰلہ ٖ وسلَّم کو امیرُ المؤمنین (حضرتِ سیِّدُنا)علی (المرتضیٰ ) کَرَّمَ اللہُ تعالٰی وَجْہَہُ الْکَرِیْم کے ساتھ کھڑے دیکھا ، اتنے میں ابوبکر صِدِّیق رضی اللہ تعالٰی عنہ حاضِر ہوئے۔ حُضُور پُر نور صلَّی اللہ تعالٰی علیہ واٰلہ ٖ وسلَّم نے اُن سے مُصافَحہ فرمایا (یعنی ہاتھ ملائے)اورگلے لگایااو راُن کے دَہَن (یعنی منہ)پر بوسہ دیا ۔ مولیٰ علی کَرَّمَ اللہُ تعالٰی وَجْہَہُ الْکَرِیْم نے عرض کی:کیا حُضور( صلَّی اللہ تعالٰی علیہ واٰلہ ٖ وسلَّم ) ابوبکر ( رضی اللہ تعالٰی عنہ ) کا مُنہ چومتے ہیں ؟ فرمایا: ’’اے ابوالحسن( ) ( رضی اللہ تعالٰی عنہ )! ابوبکر( رضی اللہ تعالٰی عنہ ) کا مرتبہ میرے یہاں ایسا ہے جیسا میرا مرتَبہ میرے ربّ ( عَزَّوَجَلَّ ) کے حُضُور۔‘‘(فتاوٰی رضویہ مُخَرَّجہ ج۸ ص ۶۱۰۔۶۱۲)
کہیں گرتوں کو سنبھالیں ، کہیں روٹھوں کو منائیں کھودیں اِلحاد کی جڑ بعدِ پیمبر صِدِّیق
تو ہے آزاد سقر سے ترے بندے آزاد ہے یہ سالکؔ بھی ترا بندۂ بے زر صِدِّیق
(دیوانِ سالک از مفتی اَحمد یار خانعلیہ رحمۃ الحنّان)
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
میرے آقا اعلیٰ حضرت ، اِمامِ اَہلسنّت ، مولاناشاہ امام اَحمد رضا خان علیہ رحمۃُ الرَّحمٰن ’’فتاوٰی رَضَوِیہ شریف‘‘ میں فرماتے ہیں :’’اولیاءِ کرام رَحِمَہُمُ اللہُ السّلام فرماتے ہیں کہ پوری کائنات میں مصطَفٰی صلَّی اللہ تعالٰی علیہ واٰلہ ٖ وسلَّم جیسا نہ کوئی پیر ہے اور نہ ابوبکر صِدِّیق رضی اللہ تعالٰی عنہ جیسا کوئی مرید ہے۔‘‘
(فتاوٰی رَضَوِیہ مخرَّجہ ج۱۱ص۳۲۶)
عقل ہے تیری سِپَر ، عشق ہے شَمشیر تری میرے دَرویش!خِلافت ہے جہانگیر تری
مَا سِوَا اللہ کے لئے آگ ہے تکبیر تری تُو مسلماں ہو توتقدیر ہے تدبیر تری
کی محمد سے وفا تو نے تو ہم تیرے ہیں
یہ جہاں چیز ہے کیا ، لوح و قلم تیرے ہیں
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
دعوتِ اسلامی کے اِشاعتی ادارے مکتبۃُ المدینہ کی مطبوعہ 92 صَفحات پر مشتمل کتاب ، ’’ سَوانِحِ کربلا‘‘صَفْحَہ41پر ہے:بخاری ومسلم نے حضرتِ (سیِّدُنا)ابو موسیٰ اَشْعَری رضی اللہ تعالٰی عنہ سے روایت کی ، حُضُورِ اقدس عَلَیْہِ الصَّلٰوۃُ وَالسَّلام مریض ہوئے اور مرض نے غَلَبہ کیا تو فرمایا کہ ابوبکر کو حکم کروکہ نماز پڑھائیں۔ سَیِّدَتُنَا عائِشہ صِدِّیقہ رضی اللہ تعالٰی عنہا نے عرض کی: یارسولَ اللہ! صلَّی اللہ تعالٰی علیہ واٰلہ ٖ وسلَّم وہ نرم دل آدمی ہیں آپ کی جگہ کھڑے ہوکر نَماز نہ پـڑھاسکیں گے۔ فرمایا:حکم دو ابوبکر کو کہ نماز پڑھائیں۔حضرت سَیِّدَتُنَا عائِشہ صِدِّیقہ رضی اللہ تعالٰی عنہا نے پھر وہی عُذر پیش کیا۔ حُضُور ( صلَّی اللہ تعالٰی علیہ واٰلہ ٖ وسلَّم ) نے پھر یہی حکم بَتاکید فرمایا اور حضرتِ سیِّدُنا ابوبکر رضی اللہ تعالٰی عنہ نے حضور صلَّی اللہ تعالٰی علیہ واٰلہ ٖ وسلَّم کی حیاتِ مبارَک میں نماز پڑھائی۔ یہ حدیثِ مُتَوَاتِر ہے (جو کہ)حضرتِ عائشہ و ابنِ مسعود و ابنِ عبّاس وابنِ عُمر و عبداللہ بن زَمْعَہ وابو سعید وعلی بن ابی طالب و حفصہ( رضی اللہ تعالٰی عنہم ) وغیرہم سے مروی ہے۔ علماء فرماتے ہیں کہ اِس حدیث میں اس پربَہُت واضح دلالت ہے کہ حضرتِ صدِّیق رضی اللہ تعالٰی عنہ مطلقاً تمام صَحابہ سے افضل اور خِلافت و اِمامت کے لئے سب سے اَحق واَولیٰ(یعنی زیادہ حقدار اور بہتر) ہیں۔
(تارِیخُ الْخُلَفاء ص ۴۷ ، ۴۸)
عِلْم میں ، زُہْد میں بے شبہ تُو سب سے بڑھ کر کہ امامت سے تِری کھل گئے جَوہَر صِدِّیق
اِس اِمامَت سے کُھلا تم ہو اِمامِ اکبر تھی یہی رَمزِ نبی کہتے ہیں حیدر صِدِّیق
(دیوانِ سالک)
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
میٹھے میٹھے اسلامی بھائیو!عاشقِ صادق کی یہ پہچان ہے کہ وہ ہرآن ، یادِ محبوب کو حِرزِ جاں بنائے رکھتا ہے۔عشقِ رسُول کی لذّت سے ناآشنا لوگوں کوجب عاشقوں کے اَندازسمجھ میں نہیں آتے تو وہ اُن کا مذاق اُڑاتے ، پَھبتیاں کستے اورباتیں بناتے ہیں۔ایک شاعِرنے ایسے نا سمجھوں کو سمجھاتے ہوئے اور حقیقی عُشّاق کے دیوانگی سے بھر پور جذبات کی ترجُمانی کرتے ہوئے کہا:
نہ کسی کے رَقص پہ طنز کر نہ کسی کے غم کا مذاق اڑا
جسے چاہے جیسے نواز دے ، یہ مزاجِ عشقِ رسول ہے
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
خدا کی قسم اگر ہمیں عاشقِ اکبرحضرتِ سیِّدُنا صِدِّیقِ اکبر رضی اللہ تعالٰی عنہ کے عشقِ رسول کے ایک ذرّے کا کروڑواں حصّہ بھی عطا ہو جائے توہمارا بیڑا پار ہو جائے۔
دولتِ عشق سے آقا مِری جھولی بھر دو بس یہی ہو مِرا سامان مدینے والے
آپ کے عشق میں اے کاش! کہ روتے روتے یہ نکل جائے مری جان مدینے والے
مجھ کو دیوانہ مدینے کا بنا لو آقا بس یہی ہے مِرا اَرمان مدینے والے
کاش! عطّارؔ ہو آزاد غمِ دُنیا سے بس تمہارا ہی رہے دِھیان مدینے والے
(وسائلِ بخشش)
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
... اپنے بڑے شہزادے حضرتِ سیِّدُنا امام حَسَن مجتبیٰ رضی اللہ تعالٰی عنہ کی نسبت سے امیرُ المؤمنین حضرتِ سیِّدُناعلی المرتضیٰ کَرَّمَ اللّٰہُ تَعَالٰی وَجْہَہُ الْکَرِیْم کی کُنْیَت ’’ابو الحسن‘‘ ہے۔
کتاب کا موضوع
کتاب کا موضوع
- دُرُودِ پاک کی فضیلت
- بچپن کی حیرت انگیز حکایت
- سیِّدُناصِدِّیقِ اَکبر کا مُخْتَصَر تعارُف
- سب سے پہلے کون ایمان لایا؟
- سب سے افضل کون؟
- تو میں الزام تراشوں والی سزا دوں گا
- مال وجان آقائے دو جہاں پر قربان
- کروں تیرے نام پہ جاں فدا
- راہِ خُدا میں مُشکِلات پر صَبْر
- سات غلام خرید کر آزاد کئے
- تین چیزیں پسند ہیں
- تینوں آرزوئیں بر آئیں
- کاش! ہمارے اندر بھی جذبہ پیدا ہو جائے
- مَحَبَّت کے کھوکھلے دعوے
- یارِ غار کا مالی ایثار
- صدِّیقِ اَکبر کی شان اور قرآن
- اعلٰی حضرت کی تشریح
- مِنبرِ مُنوَّر کے زینے کا اِحتِرام
- سرکارِ نامدار کا یار
- مُریدِ کامِل
- صدِّیقِ اَکبر نے امامت فرمائی
- غارِ ثور کا سانپ
- اللہ ہمارے ساتھ ہے
- واہ ! رے مکڑی تیرا مقدّر!
- غار کے اُس پار سمندر نظر آیا!
- مصیبت میں آقا سے مدد مانگنا صحابہ کا طریقہ ہے
- صِدّیقِ اَکبر کی انوکھی آرزو
- سفَرِآخِرت میں مُوافَقت
- صدِّیقِ اَکبرکا غمِ مصطَفٰے
- کاش ! ہمیں بھی غمِ مصطَفٰے نصیب ہو
- خواب میں دیدارِ مُصطَفٰے
- یومِ وفات اور کفن میں شوقِ مُوافَقَت
- مَریضِ مصطَفٰے
- دل مِرا دنیا پہ شیدا ہو گیا
- سیِّدُناصدِّیق اَکبر کو زَہر دیا گیا
- ہائے ! ذلیل دنیا!!
- یارسولَ اللہ ! ابوبکر حاضِر ہے
- صِدیقِّ اکبرحیاتُ النَّبی کے قائل تھے
- حیاتُ الْانبِیَا
- گستاخِ رسول سے دُور رہو
- گستاخِ صَحابہ سے دُور رہو
- قَبْر میں شیخین کا وسیلہ کام آ گیا
- بروزِ مَحشَر مزاراتِ منوَّر سے باہَر آنے کا حسین منظر
- راہِ خدا میں آنے والی مشکِلات کا سامنا کیجئے
- غمِ دنیا میں نہیں غمِ مصطَفٰے میں روئیں
- یہ کیسا عشق اور کیسی مَحَبّت ہے؟
- تا قِیامت ’’ اُمّتی اُمّتی ‘‘ فرمائیں گے
- مُحدِّثِ اعظم پاکستان نے فرمایا
- بروزِ قِیامت فکرِ امَّت کا انداز
- کاش! ہم پکّے عاشقِ رسول بن جائیں
- صِدِّیقی حَضَرات کے انگوٹھے میں نشان!
- صدّیقِ اَکبر نے مَدَنی آپریشن فرمایا
- ’’گیسورکھنا نبیِّ پاک کی سنَّت ہے ‘‘ کے بائیس حُرُوف کی نسبت سے زُلفوں اور سر کے بالوں وغیرہ کے 22مَدَنی پھول
- مَنقَبت سیِّدُنا صدّیقِ اکبر ) رضی اللہ تعالٰی عنہ (
