- Home
- Al Madina Library
- Aashiq e Akbar
- Ghaar E Soor Ka Sanp
30 سے زائد لینگوئجز میں 5000 سے زائد اسلامی کتب کا خزانہ آن لائن پڑھیں اور ڈاؤن لوڈ کریں
Aashiq e Akbar | عاشق اکبر
Ghaar e Soor Ka Sanp
غارِ ثور کا سانپ
ہجرت ِ مدینۂ منوَّرہ کے موقع پر سرکارِ نامدار ، مکّے مدینے کے تاجدار صلَّی اللہ تعالٰی علیہ واٰلہٖ وسلَّم کے رازدار وجاں نِثار ، یارِ غار و یارِ مزار حضرتِ سیِّدُنا صِدِّیقِ اَکبر رضی اللہ تعالٰی عنہ نے جاں نِثاری کی جو اعلیٰ مثال قائم فرمائی وہ بھی اپنی جگہ بے مثال ہے ، تھوڑے بَہُت الفاظ کے فرق کے ساتھ مختلف کتابوں میں اِس مضمون کی روایات ملتی ہیں کہ جب اللہ کے حبیب ، حبیب ِ لبیب ، بے چین دلوں کے طبیب صلَّی اللہ تعالٰی علیہ واٰلہ ٖ وسلَّم غارِ ثَور کے قریب پہنچے تو پہلے حضرتِ سیِّدُنا صِدِّیقِ اکبر رضی اللہ تعالٰی عنہ غار میں داخِل ہوئے ، صفائی کی ، تمام سوراخوں کو بند کیا ، آخِری دو سوراخ بند کرنے کے لئے کوئی چیز نہ ملی ، تو آپ رضی اللہ تعالٰی عنہ نے اپنے پاؤں مبارَک سے ان دونوں کوبند کیا ، پھر رسولِ کریم ، رء ُوفٌ رَّحیم عَلَیْہِ اَفْضَلُ الصَّلٰوۃِ وَالتَّسْلِیْم سے تشریف آوَری کی درخواست کی: رسولُ اللہ صلَّی اللہ تعالٰی علیہ واٰلہ ٖ وسلَّم اندر تشریف لے گئے اوراپنے وفادار ، یارِغار و یارِ مزارصِدِّیقِ اَکبر رضی اللہ تعالٰی عنہ کے زانو پر سرِ انور رکھ کر مَحوِ اِستِراحت ہوگئے(یعنی سو گئے)۔ اُس غارمیں ایک سانپ تھا اُس نے پاؤں میں ڈس لیا مگر قربان جائیے اُس پیکرِ عشق ومَحَبَّت پر کہ دَرد کی شدَّت و کُلفت (یعنی تکلیف) کے باوُجود محض اِس خیال سے کہ مصطَفٰے جانِ رَحمت صلَّی اللہ تعالٰی علیہ واٰلہ ٖ وسلَّم کے آرام و راحت میں خلَل واقِع نہ ہو ، بدستور ساکِن وصامِت (یعنی بے حرکت وخاموش) رہے ، مگرشدتِ تکلیف کی وجہ سے غیر اختیاری طور پرچشمانِ مُبارَک (یعنی آنکھوں ) سے آنسو بہ نکلے اور جب اَشکِ عِشق کے چند قطرے محبوب ِکریم عَلَیْہِ اَفْضَلُ الصَّلٰوۃِ وَالتَّسْلِیْم کے وَجہ ِکریم (یعنی کرم والے چِہرے ) پر نچھاور ہوئے توشاہِ عالی وقار ، ہم بے کسوں کے غم گُسار صلَّی اللہ تعالٰی علیہ واٰلہ ٖ وسلَّم بیدار ہو گئے ، اِستِفسارفرمایا: اے ابوبکر( رضی اللہ تعالٰی عنہ )! کیوں روتے ہو؟ حضرتِ سیِّدُنا ابوبکر صِدِّیق رضی اللہ تعالٰی عنہ نے سانپ کے ڈَسنے کاواقِعہ عرض کیا۔ آپ صلَّی اللہ تعالٰی علیہ واٰلہ ٖ وسلَّم نے ڈسے ہوئے حصّے پر اپنا لُعابِ دَہَن (یعنی تھوک شریف )لگایا تو فوراً آرام مل گیا۔
( مِشْکاۃُ الْمَصابِیح ج۴ ص۴۱۷ حدیث ۶۰۳۴وغیرہ)
نہ کیوں کر کہوں یَا حَبِیْبِیْ اَغِثْنِیْ !
اِسی نام سے ہر مصیبت ٹلی ہے
منزلِ صدق و عشق کے رَہبر حضرتِ سیِّدُنا صدّیقِ اَکبر رضی اللہ تعالٰی عنہ کی عَظَمت اور غارِ ثور والی حکایت کی طرف اِشارہ کرتے ہوئے کسی شاعر نے کیا خوب کہا : ؎
یار کے نام پہ مرنے والا سب کچھ صَدَقہ کرنے والا
ایڑی تو رکھدی سانپ کے بِل پر زہر کا صدمہ سَہ لیا دل پر
منزلِ صدق وعشق کا رَہبر یہ سب کچھ ہے خاطرِ دلبَر
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
حضرتِ سیِّدُنا ابوبکر صِدِّیق رضی اللہ تعالٰی عنہ جب رسولِ ذِی وقار ، شَہَنشاہِ اَبرار ، صاحبِ پسینۂ خوشبودار صلَّی اللہ تعالٰی علیہ واٰلہ ٖ وسلَّم کے ہمراہ غارِثور میں تشریف لے گئے تو کفّارِ ناہَنجار تقریباً غار کے قریب پہنچ چکے تھے ، اِن دونوں مُقدَّس ہستیوں کی غار میں موجُودَگی کو اللہُ رَبُّ الْعُلٰی عَزَّوَجَلَّ نے پارہ10سُوْرَۃُ التَّوْبَۃآیت نمبر40 میں یوں بَیان فرمایا: ثَانِیَ اثْنَیْنِ اِذْ هُمَا فِی الْغَارِ ترجَمۂ کنزالایمان:صرف دو جان سے جب وہ دونوں غار میں تھے۔
اعلیٰ حضرت رَحمۃُ اللہ تعالٰی علیہ اِسی واقِعے کی طرف اِشار ہ کرتے ہوئے صِدِّیقِ اکبر رضی اللہ تعالٰی عنہ کی شانِ عَظَمت نشان یوں بیان فرماتے ہیں : ؎
یعنی اُس اَفضلُ الْخَلْقِ بَعْدَ الرُّسُل
ثَانِیَ اثْنَیْنِ ہِجرت پہ لاکھوں سلام
(حدائقِ بخشش شریف)
اللہ عَزَّوَجَلَّ نے ان دونوں مُقدّس ہستیوں کی حِفاظت کے ظاہِری اَسباب بھی پیدا فرما دیئے وہ اِس طرح کہ جونہی جنابِ رسالت مآب صلَّی اللہ تعالٰی علیہ واٰلہ ٖ وسلَّم حضرتِ سیِّدُنا صِدِّیقِ اَکبر رضی اللہ تعالٰی عنہ کی مَعِیَّت(یعنی ہمراہی) میں غارِ ثور میں داخِل ہوئے تو خدائی پہرہ لگا دیا گیا کہ غار کے منہ پر مکڑی نے جالا تَن دیا اور کَنارے پر کبوتری نے انڈے دے دئیے۔دعوتِ اسلامی کے اِشاعتی ادارے مکتبۃُ المدینہ کی مطبوعہ 680 صَفحات پر مشتمل کتاب ، ’’مُکاشَفَۃُ الْقُلُوب‘‘کے صَفْحَہ132پر ہے : یہ سب کچھ کفّارِ مکہ کو غار کی تلاشی سے باز رکھنے کے لئے کیا گیا ، اُن دو کبوتروں کو ربِّ ذُوالْجَلال عَزَّوَجَلَّ نے ایسی بے مثال جزا دی کہ آج تک حَرَمِ مکّہ میں جتنے کبوتر ہیں وہ اُنہی دو کی اَولاد ہیں ، جیسے اُنہوں نے اللہ عَزَّوَجَلَّ کے حکم سے نبیِّ رَحمت صلَّی اللہ تعالٰی علیہ واٰلہ ٖ وسلَّم کی حِفاظت کی تھی ویسے ہی رب عَزَّوَجَلَّ نے بھی حَرَم میں اُنکے شِکار پر پابندی عائِدفرمادی۔
(مُکاشَفۃُ الْقُلوب ج۱ ص۵۷ دارالکتب العلمیۃ بیروت )
فانوس بن کے جس کی حِفاظت ہَوا کرے
وہ شمع کیا بُجھے جسے روشن خدا کرے
جب کُفّارِقریش نے وہاں کبوتروں کا گھونسلا اور اُس میں انڈے دیکھے تو کہنے لگے: اگر اس غارمیں کوئی انسان موجود ہوتا تو نہ مکڑی جالا تنتی نہ کبوتری انڈے دیتی ۔ کُفّار کی آہٹ پا کر عاشقِ اکبر حضرت صِدِّیقِ اَکبر رضی اللہ تعالٰی عنہ کچھ گھبرا گئے اور عرض کی: یا رسولَ اللہ صلَّی اللہ تعالٰی علیہ واٰلہ ٖ وسلَّم ! اب دُشمن ہمارے اس قدَر قریب آگئے ہیں کہ اگر وہ اپنے قدموں پر نظر ڈالیں گے تو ہمیں دیکھ لیں گے۔حُضُورِ اکرم ، نُورِ مُجَسَّم عَلَیْہِ الصَّلٰوۃُ وَالسَّلام نے فرمایا: لَا تَحْزَنْ اِنَّ اللّٰهَ مَعَنَاۚ- (پ۱۰ ، التوبۃ:۴۰) ترجَمۂ کنز الایمان : ’’غم نہ کھا ، بے شک اللہ ہمارے ساتھ ہے۔‘‘
اعلیٰ حضرت ، امام اَحمد رضا خان عَلَیْہِ رَحمۃُالرَّحمٰن مکّے مدینے کے سلطان ، سرورِ ذیشان ، سرکارِ دوجہاں صلَّی اللہ تعالٰی علیہ واٰلہ ٖ وسلَّم کے اِس مُعجزۂ عالی شان اور خواریٔ دُشمنان کوبیان کرتے ہوئے فرماتے ہیں : ؎
جان ہیں ، جان کیا نظر آئے
کیوں عَدو گردِ غار پھرتے ہیں
(حدائقِ بخشش شریف)
پھرعاشقِ اکبر حضرتِ سیِّدُنا صِدِّیقِ اَکبر رضی اللہ تعالٰی عنہ پر سکینہ اُتر پڑا کہ وہ بالکل ہی مطمئن اور بے خوف ہو گئے اور چوتھے دن یکم ربیعُ النُّور بروز دوشَنبہ (یعنی پیرشریف) حضور ِ نامدار صلَّی اللہ تعالٰی علیہ واٰلہ ٖ وسلَّم غار سے باہَر تشریف لائے اورمدینۂ منوَّرہ زادَھَااللہُ شَرَفًاوَّ تَعظِیْماً روانہ ہو گئے۔
( ماخوذ ازعجائب القرآن مع غرائب القرآن ، ص۳۰۳۔۳۰۴ مکتبۃ المدینہ باب المدینہ کراچی)
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
میٹھے میٹھے اسلامی بھائیو!اَلحمدُلِلّٰہ! محبوبِ ربِّ اَکبر صلَّی اللہ تعالٰی علیہ واٰلہ ٖ وسلَّم اورصِدِّیق اَکبر رضی اللہ تعالٰی عنہ کامیاب و بامُرادہوئے اور تلاش کرنے والے کُفّارِ بَداَطوار ناکام ونامُراد ہوئے۔ مکڑی نے جُستجُو کا دروازہ بند کر کے غار کا دَہانہ (منہ) ایسا بنادیا کہ وہاں تک سُراغ رسانوں (یعنی جاسوسوں ) کی سوچ بھی نہ پہنچ سکی اوروہ مایوس ہو کر واپس پلٹے اور مکڑی کو لازَوال سعادَت مُیَسَّرآئی جس کو ’’ مُکاشَفَۃُ القُلُوب‘‘ میں حضرتِ سیِّدُنا ابنِ نَقِیب عَلَیْہِ رَحمَۃُ اللہِ الحسیب نے کچھ یوں بیان کیا:ریشم کے کیڑوں نے ایسا ریشم بُنا جو حُسن میں یکتا(یعنی بے مثال) ہے مگر وہ مکڑی اِن سے لاکھ درَجے بہتر ہے اِس لئے کہ اُس نے غارِ ثور میں سرکارِ عالی وقار صلَّی اللہ تعالٰی علیہ واٰلہ ٖ وسلَّم کے لئے غار کے دَہانے (یعنی منہ) پر جالا بُنا تھا۔(مُکاشَفۃُ الْقُلوب ج۱ ص۵۷)
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
بعض سیرت نِگاروں نے لکھا ہے کہ حضرتِ سیِّدُنا صِدِّیق اکبر رضی اللہ تعالٰی عنہ نے جب دشمن کے دیکھ لینے کا خدشہ ظاہِر کیا تو آپ صلَّی اللہ تعالٰی علیہ واٰلہ ٖ وسلَّم نے فرمایا: اگر یہ لوگ اِدھر سے داخِل ہوئے تو ہم اُدھر سے نکل جائیں گے۔ عاشقِ اکبر سیِّدُناصِدِّیقِ اَکبر رضی اللہ تعالٰی عنہ نے جُوں ہی اُدھر نگاہ کی تو دوسری طرف ایک دروازہ نظر آیا جس کے ساتھ ایک سمُندر ٹھاٹھیں مار رہاتھا اور غار کے دروازے پر ایک کَشتی بندھی ہوئی تھی۔
(مُکاشَفۃُ الْقُلوب ج۱ ص۵۸)
تم ہوحَفیظ و مُغِیث کیا ہے وہ دُشمن خبیث تم ہو تو پھر خوف کیا تم پہ کروڑوں دُرُود
آس ہے کوئی نہ پاس ایک تمہاری ہے آس بس ہے یہی آسرا تم پہ کروڑوں دُرُود
(حدائق بخشش شریف)
مصیبت میں آقا سے مدد مانگنا صحابہ کا طریقہ ہے
میٹھے میٹھے اسلامی بھائیو!آپ نے سرورذِیشان ، رحمتِ عالَمِیان ، شاہ ِ کون و مکان صلَّی اللہ تعالٰی علیہ واٰلہ ٖ وسلَّم کا معجزۂ راحت نِشان مُلاحَظہ فرمایاکہ غارِ ثور کی دوسری طرف آپ صلَّی اللہ تعالٰی علیہ واٰلہ ٖ وسلَّم کی نِگاہ پُراَنوار کی بَرَکت سے یارِ غار و یارِ مزار رضی اللہ تعالٰی عنہ کو کَشتی و سمندر نظر آئے اوریوں فیضانِ رِسالت سے آپ رضی اللہ تعالٰی عنہ چین وراحت محسوس فرمانے لگے ۔اِس واقعے سے مزید یہ بھی پتا چلا کہ محبوبِ ربُّ العِباد ، راحتِ ہرقلْبِ ناشاد صلَّی اللہ تعالٰی علیہ واٰلہ ٖ وسلَّم سے حاجت و مصیبت کے وقت طلبِ اِمداد صحابۂ کِرام عَلَیْہِمُ الرِّضْوان کا طریقہ ہے:
وَاللہ! وہ سُن لیں گے فریاد کو پہنچیں گے
اِتنا بھی تو ہو کوئی جو آہ کرے دل سے
(حدائقِ بخشش شریف)
صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد
کتاب کا موضوع
کتاب کا موضوع
- دُرُودِ پاک کی فضیلت
- بچپن کی حیرت انگیز حکایت
- سیِّدُناصِدِّیقِ اَکبر کا مُخْتَصَر تعارُف
- سب سے پہلے کون ایمان لایا؟
- سب سے افضل کون؟
- تو میں الزام تراشوں والی سزا دوں گا
- مال وجان آقائے دو جہاں پر قربان
- کروں تیرے نام پہ جاں فدا
- راہِ خُدا میں مُشکِلات پر صَبْر
- سات غلام خرید کر آزاد کئے
- تین چیزیں پسند ہیں
- تینوں آرزوئیں بر آئیں
- کاش! ہمارے اندر بھی جذبہ پیدا ہو جائے
- مَحَبَّت کے کھوکھلے دعوے
- یارِ غار کا مالی ایثار
- صدِّیقِ اَکبر کی شان اور قرآن
- اعلٰی حضرت کی تشریح
- مِنبرِ مُنوَّر کے زینے کا اِحتِرام
- سرکارِ نامدار کا یار
- مُریدِ کامِل
- صدِّیقِ اَکبر نے امامت فرمائی
- غارِ ثور کا سانپ
- اللہ ہمارے ساتھ ہے
- واہ ! رے مکڑی تیرا مقدّر!
- غار کے اُس پار سمندر نظر آیا!
- مصیبت میں آقا سے مدد مانگنا صحابہ کا طریقہ ہے
- صِدّیقِ اَکبر کی انوکھی آرزو
- سفَرِآخِرت میں مُوافَقت
- صدِّیقِ اَکبرکا غمِ مصطَفٰے
- کاش ! ہمیں بھی غمِ مصطَفٰے نصیب ہو
- خواب میں دیدارِ مُصطَفٰے
- یومِ وفات اور کفن میں شوقِ مُوافَقَت
- مَریضِ مصطَفٰے
- دل مِرا دنیا پہ شیدا ہو گیا
- سیِّدُناصدِّیق اَکبر کو زَہر دیا گیا
- ہائے ! ذلیل دنیا!!
- یارسولَ اللہ ! ابوبکر حاضِر ہے
- صِدیقِّ اکبرحیاتُ النَّبی کے قائل تھے
- حیاتُ الْانبِیَا
- گستاخِ رسول سے دُور رہو
- گستاخِ صَحابہ سے دُور رہو
- قَبْر میں شیخین کا وسیلہ کام آ گیا
- بروزِ مَحشَر مزاراتِ منوَّر سے باہَر آنے کا حسین منظر
- راہِ خدا میں آنے والی مشکِلات کا سامنا کیجئے
- غمِ دنیا میں نہیں غمِ مصطَفٰے میں روئیں
- یہ کیسا عشق اور کیسی مَحَبّت ہے؟
- تا قِیامت ’’ اُمّتی اُمّتی ‘‘ فرمائیں گے
- مُحدِّثِ اعظم پاکستان نے فرمایا
- بروزِ قِیامت فکرِ امَّت کا انداز
- کاش! ہم پکّے عاشقِ رسول بن جائیں
- صِدِّیقی حَضَرات کے انگوٹھے میں نشان!
- صدّیقِ اَکبر نے مَدَنی آپریشن فرمایا
- ’’گیسورکھنا نبیِّ پاک کی سنَّت ہے ‘‘ کے بائیس حُرُوف کی نسبت سے زُلفوں اور سر کے بالوں وغیرہ کے 22مَدَنی پھول
- مَنقَبت سیِّدُنا صدّیقِ اکبر ) رضی اللہ تعالٰی عنہ (
