عاشق اکبر

Home
Al Madina Library
Aashiq e Akbar
Abu Bakr Hazir Hay

کتاب میں نتائج:

یارسولَ اللہ ! ابوبکر حاضِر ہے

وِصالِ ظاہِری سے قبْل فیضیابِ فیضانِ نُبُوَّت ، صاحبِ فضیلت وکرامت حضرتِ سیِّدُنا صِدِّیقِ اَکبر رضی اللہ تعالٰی عنہ نے وصیَّت فرمائی کہ میرے جنازے کو شاہِ بحروبر ، مدینے کے تاجور ، حبیبِ داوَر صلَّی اللہ تعالٰی علیہ واٰلہ ٖ وسلَّم کے روضۂ اَنور کے پاک دَر کے سامنے لاکر رکھ دینا اوراَلسَّلَامُ عَلَیْکَ یَا رَسُوْلَ اللہ کہہ کر عرض کرنا: ’’یارسولَ اللہ صلَّی اللہ تعالٰی علیہ واٰلہ ٖ وسلَّم ، ابو بکر آستانۂ عالیہ پر حاضِر ہے۔‘‘ اگردروازہ خود بخود کُھل جائے تو اندر لے جانا ورنہ جنَّتُ البَقِیْع میں دفْن کر دینا۔ جنازۂ مُبارَکہ کو حسبِ وَصِیِّت جب روضۂ اَقدس کے سامنے رکھا گیا اور عرض کیا گیا: اَلسَّلامُ عَلَیْکَ یَا رَسُوْلَ اللہ!ابوبکر حاضِر ہے۔ یہ عرض کرتے ہی دروازے کا تالا خود بخودکُھل گیا اور آواز آنے لگی: اَدْخِلُوا الْحَبِیْبَ اِلَی الْحَبِیْبِ فَاِنَّ الْحَبِیْبَ اِلَی الْحَبِیْبِ مُشْتَاقٌ یعنی محبوب کو محبوب سے مِلادو کہ محبوب کو محبوب کا اِشتِیاق ہے۔

(تفسیر کبیر ج۱۰ص۱۶۷داراحیاء التراث العربی بیروت)

تیرے قدموں میں جو ہیں غیر کامنہ کیا دیکھیں

کون نظروں پہ چڑھے دیکھ کے تلوا تیرا

(حدائقِ بخشش شریف)

صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد

صِدیقِّ اکبرحیاتُ النَّبی کے قائل تھے

میٹھے میٹھے اسلامی بھائیو! غور ! اگرحضرتِ سیِّدُناابوبکر صِدِّیق رضی اللہ تعالٰی عنہ رسول اللہ صلَّی اللہ تعالٰی علیہ واٰلہ ٖ وسلَّم کو زندہ نہ جانتے تو ہرگز ایسی وصیّت نہ فرماتے کہ روضۂ اَقدَس کے سامنے میر ا جنازہ رکھ کرنبیِّ رحمت صلَّی اللہ تعالٰی علیہ واٰلہ ٖ وسلَّم سے اِجازت طلب کی جائے۔ حضرتِ سیِّدُناابوبکرصِدِّیق رضی اللہ تعالٰی عنہ نے وصیَّت کی اور صحابۂ کرام عَلَیْہِمُ الرِّضْوان نے اِسے عَمَلی جامہ پہنایا ، جس سے ثابت ہوتا ہے کہ حضرتِ سیِّدُنا صِدِّیقِ اَکبر رضی اللہ تعالٰی عنہ اور تمام صحابۂ کرام عَلَیْہِمُ الرِّضْوان کایہ عقیدہ تھا کہ محبوب پروَرْدگار ، شاہِ عالَم مدار ، دوعالَم کے مالِک ومُختار صلَّی اللہ تعالٰی علیہ واٰلہ ٖ وسلَّم بعدِ وصال بھی قبر اَنور میں زندہ و حیات اور صاحبِ تَصَرُّفات واِختِیارات ہیں۔ اَلْحَمْدُ لِلّٰہ عَزَّوَجَلَّ !

تُو زِندَہ ہے وَاللہ تُو زِندَہ ہے وَاللہ

مرے چشمِ عالَم سے چُھپ جانے والے

(حدائقِ بخشِش شریف)

حیاتُ الْانبِیَا

اَلْحَمْدُ لِلّٰہ عَزَّوَجَلَّ ! بعطائے ربُّ الانام تمام انبیاءے کرام عَلَیْہِم الصَّلٰوۃُ وَالسَّلام زندہ ہیں۔ چُنانچِہ’’ ابنِ ماجہ ‘‘ کی حدیثِ پاک میں ہے: اِنَّ اللہَ حرَّمَ عَلَی الْاَرْضِ اَنْ تَأْکُلَ اَجْسَادَ الْانبیاءِ ِفَنَبِیُّ اللہِ حَیٌّ یُّرْزَقُ۔

بے شک اللہ ( عَزَّوَجَلَّ )نے حرام کیا ہے زمین پر کہ انبیاء ( عَلَیْہِمُ الصَّلٰوۃُ وَ السّلام) کے جسموں کوخراب کرے تواللہ ( عَزَّوَجَلَّ ) کے نبی زندہ ہیں ، روزی دیئے جاتے ہیں۔

(سُنَنِ اِبن ماجہ ج۲ ص۲۹۱ حدیث ۱۶۳۷)

ایک اور حدیثِ پاک میں ہے: اَلْانبیاء اََحیَاء ٌ فِیْ قُبُوْرِہِمْ یُصَلُّوْن یعنی انبیا حیات ہیں اور اپنی اپنی قبروں میں نماز پڑھتے ہیں۔

(مُسْنَدُ اَبِیْ یَعْلٰی ج۳ ص۲۱۶ حدیث۳۴۱۲ دارالکتب العلمیۃ بیروت )

گستاخِ رسول سے دُور رہو

میٹھے میٹھے اسلامی بھائیو! رسول صلَّی اللہ تعالٰی علیہ واٰلہ ٖ وسلَّم کے مُتَعلِّق ہر مسلمان کا وہی عقیدہ ہونا ضروری ہے جو صحابۂ کرام عَلَیْہِمُ الرِّضْوان اوراسلافِ عُظا م رَحِمَہُمُ اللہُ السّلام کاتھا ، اگر معاذَاللہ شیطان وسوسے پیدا کرنے کی کوشِش کرے اور عَظَمتِ وشانِ مصطَفٰی صلَّی اللہ تعالٰی علیہ واٰلہ ٖ وسلَّم میں طعنہ زَنی کرتے ہوئے عقْلی دَلائل سے قائل کرنے کی ناپاک سَعی (کوشش) کرے تواُس سے الگ تھلگ ہوجائیے جیساکہ دعوتِ اِسلامی کے اِشاعتی اِدارے مکتبۃُ المدینہ کی مَطْبُوعہ 162 صَفَحات پر مُشْتَمِل کتاب ’’ایمان کی پہچان ‘‘ صَفْحَہ58پر اعلٰی حضرت ، اِمامِ اَہلسنّت ، حضرتِ علّامہ مولانا الحاج الحافِظ القاری شاہ امام اَحمد رضا خان عَلَیْہِ رَحمَۃُ الرَّحمٰن عاشقانِ رسول کو تاکید کرتے ہوئے فرماتے ہیں : ’’جب وہ(یعنی گستاخانِ رسول)رسول اللہ صلَّی اللہ تعالٰی علیہ واٰلہ ٖ وسلَّم کی شان میں گستاخی کریں اَصْلاً (یعنی بالکل) تُمہارے قلب میں اُن (گستاخوں )کی عَظَمت ، اُن کی مَحَبَّت کا نام ونِشان نہ رہے فوراً اُن(گستاخوں) سے الگ ہوجاؤ ، اُن(لوگوں ) کو دُودھ سے مکّھی کی طرح نکال کر پھینک دو ، اُن (بدبختوں )کی صُورت ، اُن کے نام سے نَفْرت کھاؤپھرنہ تم اپنے رِشتے ، عِلاقے ، دوستی ، اُلفت کاپاس کرو نہ اُن کی مَوْلَوِیَّت ، مَشَیْخِیَّت ، بُزُرگی ، فضیلت کو خطرے (یعنی خاطِر)میں لاؤ۔ آخِر یہ جو کچھ (رشتہ و تعلُّق )تھا ، محمدٌ رَّسولُ اللہ صلَّی اللہ تعالٰی علیہ واٰلہ ٖ وسلَّم کی غلامی کی بِنا پر تھا ، جب یہ شخص اُن ہی کی شان میں گُستاخ ہوا پھرہمیں اُس سے کیا عِلاقہ (تعلُّق) رہا؟‘‘

(ایمان کی پہچان ، ص۵۸ مکتبۃ المدینہ باب المدینہ کراچی)

اُنہیں جانا اُنہیں مانا نہ رکھا غیر سے کام لِلّٰہِ الْحَمْد !میں دُنیا سے مسلمان گیا

اُف رے مُنکِر یہ بڑھا جوشِ تَعَصُّب آخِر بھیڑ میں ہاتھ سے کم بَخت کے اِیمان گیا

(حدائق بخشِش شریف)

صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد

گستاخِ صَحابہ سے دُور رہو

حضرتِ علّامہ جلالُ الدّین سُیُوطی شافِعی علیہ ر حمۃ اللہِ القوی ’’ شرحُ الصُّدور‘ ‘ میں نقل کرتے ہیں :ایک شخص کی موت کا وَقت قریب آ گیا تو اس سے کلمۂ طیِّبہ پڑھنے کے لئے کہا گیا ۔ اس نے جواب دیا کہ میں اس کے پڑھنے پر قادر نہیں ہوں کیوں کہ میں ایسے لوگوں کے ساتھ نِشَست و برخاست (یعنی اٹھنا بیٹھنا)رکھتا تھا جو مجھے ابو بکر و عمر رضی اللہ تعالٰی عنہما کے بُرا بھلا کہنے کی تلقین کرتے تھے۔

(شَرْحُ الصُّدُورص۳۸مرکز اہلسنت برکات رضا الہند )

قَبْر میں شیخین کا وسیلہ کام آ گیا

میٹھے میٹھے اسلامی بھائیو! اِس حکایت سے شیخین کریمین یعنی سیِّدَینا صدّیق وفاروق رضی اللہ تعالٰی عنہما کی بُلند شانیں معلوم ہوئیں ، جب ان کی توہین کرنے والوں سےدوستی رکھنے کا یہ وَبال کہ مرتے وقت کلمہ نصیب نہیں ہورہا تھا تو پھر جو لوگ خود توہین کرتے ہیں ان کا کیا حال ہو گا! لہٰذا شیخین کریمین رضی اللہ تعالٰی عنہما کے گستاخوں سے دورو نُفُور رہنا ضَروری ہے۔ صِرف عاشقانِ رسول و مُحبّانِ صَحابہ و اولیا کی صحبت اختیار کیجئے ، ان عظیم ہستیوں کی اُلفت کا دِیا(یعنی چراغ) اپنے دل میں روشن کیجئے۔اور دونوں جہاں کی بھلائیوں کے حقدار بنئے۔ اللہُ عَزَّوَجَلَّ کے نیک بندوں کی مَحَبَّت قَبْروحَشْر میں بے حد کار آمدہے چُنانچِہ ایک شخص کابیان ہے: میرے اُستاذ کے ایک ساتھی فوت ہو گئے ۔ استاد صاحِب نے انہیں خواب میں دیکھ کر پوچھا : مافَعَلَ اللہُ بِکَ؟ یعنی اللہُ عَزَّوَجَلَّ نے آپ کے ساتھ کیا مُعامَلہ کیا؟ جواب دیا : اللہُ عَزَّوَجَلَّ نے میری مغفِرت فرما دی ۔ پوچھا : مُنکَر نَکیر کے ساتھ کیسی رہی ؟ جوابدیا: اُنہوں نے مجھے بٹھا کر جب سُوالات شروع کئے ، اللہُ عَزَّوَجَل نے میرے دل میں ڈالا اور میں نے فرِشتوں سے کہدیا:’’ سیِّدَینا ابو بکر و فاروق رضی اللہ تعالٰی عنہما کے واسِطے مجھے چھوڑ دیجئے۔‘‘ یہ سُن کر ایک فرِشتے نے دوسرے سے کہا:’’اس نے بڑی بُزُرگ ہستیوں کا وسیلہ پیش کیا ہے لہٰذا اس کو چھوڑ دو۔‘‘ چُنانچِہ انہوں نے مجھے چھوڑ دیا اور تشریف لے گئے۔

(شَرْحُ الصُّدُورص۱۴۱)

واسِطہ دیا جو آپ کا

میرے سارے کام ہو

صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد

بروزِ مَحشَر مزاراتِ منوَّر سے باہَر آنے کا حسین منظر

دعوتِ اِسلامی کے اِشاعتی اِدارے مکتبۃُ المدینہ کی مَطْبُوعہ561 صَفَحَات پر مُشْتَمِل کتاب ’’ ملفوظاتِ اعلیٰ حضرت ‘‘صَفْحَہ61 پر امامِ اہلسنّت ، مجدِّدِ دین وملّت الحاج الحافظ القاری شاہ امام احمد رضا خان عَلَیْہِ رَحمَۃُ الرَّحمٰن بیان فرماتے ہیں : ایک مرتبہ حضور اَقدس صلَّی اللہ تعالٰی علیہ واٰلہ ٖ وسلَّم نے داہنے (یعنی سیدھے)دستِ اَقدس میں حضرتِ صِدِّیق رضی اللہ تعالٰی عنہ کا ہاتھ لیا اور بائیں (یعنی الٹے) دستِ مُبارَک میں حضرتِ عمر رضی اللہ تعالٰی عنہ کا ہاتھ لیااور فرمایا : ھٰکَذَا نُبْعَثُ یَوْمَ الْقِیَامَۃِیعنی ہم قِیامت کے روز یوں ہی اٹھائے جائیں گے ۔

( تِرمِذی ج۵ ص۳۷۸ حدیث۳۶۸۹ ، تاریخ دمشق ج۲۱ص۲۹۷)

محبوبِ ربِّ عرش ہے اس سَبز قُبّے میں

پہلو میں جلوہ گاہ عتیق و عُمر کی ہے

(حدائقِ بخشِش شریف)

صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد

راہِ خدا میں آنے والی مشکِلات کا سامنا کیجئے

میٹھے میٹھے اسلامی بھائیو!ہمارے رَہبرحضرتِ سیِّدُنا صدِّیقِ اَکبر رضی اللہ تعالٰی عنہ یقینا عاشقِ اَکبر ہیں ، آپ رضی اللہ تعالٰی عنہ نے اپنے عشق کا اِظہار عَمَل و کِردار سے کیا اور جب عشق کی راہ ، پُرخار اورسخت دُشوار گزار ہوئی تب بھی آپ رضی اللہ تعالٰی عنہ جذبۂ عشقِ شَہَنْشاہِ ابرار صلَّی اللہ تعالٰی علیہ واٰلہ ٖ وسلَّم سے سرشار رہے ، خطیبِ اوّل کا شرف پاتے ہوئے دینِ اِسلام کی خاطرشدید مارپڑنے کے باوُجود آپ رضی اللہ تعالٰی عنہ کے پائے اِستِقلال میں ذرّہ بھر بھی لغزش نہ آئی۔راہِ خدا عَزَّوَجَلَّ میں آپ رضی اللہ تعالٰی عنہ کی اِس مُشکِلات بھری حیات میں ہمارے لئے یہ دَرس ہے کہ’’ نیکی کی دعوت ‘‘ کی راہوں میں خواہ کیسے ہی مصائب کا سامنا ہو مگر پیچھے ہٹنا کُجا اس کاخیال بھی دل میں نہ آنے پائے۔

جب آقا آخِری وقت آئے میرا مرا سر ہو ترا بابِ کرَم ہو

سدا کرتا رہوں سنّت کی خدمت مرا جذبہ کسی صورت نہ کم ہو

(وسائلِ بخشش)

غمِ دنیا میں نہیں غمِ مصطَفٰے میں روئیں

میٹھے میٹھے اسلامی بھائیو! عاشقِ اکبر رضی اللہ تعالٰی عنہ کی عشق ومَحَبّت بھری مُبارَک زندَگی سے ہمیں یہ بھی درس ملتا ہے کہ ہماری آہیں اور سسکیاں دُنیا کی خاطر نہ ہوں ، مَحَبّت ِدُنیا میں آنسو نہ بہیں ، دُنیوی جاہ وحشمت (یعنی شان و شوکت)کے لئے سینے میں کَسَک پیدانہ ہو بلکہ ہمارے دل کی حسرت ، حُبِّ نبی ہو ، آنسو یادِ مصطَفٰے میں بہیں ، دُنیا کے دیوانے نہیں بلکہ شمعِرِسالت کے پروانے بنیں ، اُنہی کی پسند پر اپنی پسند قربان کریں اوریہی خواہِش ہو کہ کاش! میرا مال ، میری جان محبوبِ رحمن صلَّی اللہ تعالٰی علیہ واٰلہ ٖ وسلَّم کی آن پر قربان ہو جائے ، اُن سے نسبت رکھنے والی ہر چیز دلعزیز ہو ، جو خوش بخت ایسی زندَگی گزارنے میں کامیاب ہو گیاتو اللہُ تبارَک وتعالیٰ اُس کے لئے دُنیا مسخَّر اور مخلوق کو اُس کے تابع کر دے گا ، آسمانوں میں اُس کے چرچے ہوں گے اور سب سے بڑھ کر یہ کہ وہ خدا و مصطَفٰے کا محبوب بن جائے گا۔

وہ کہ اُس در کاہوا خلقِ خدا اُس کی ہوئی

وہ کہ اُس در سے پھر اللہ اُس سے پِھر گیا

(حدائقِ بخشش شریف)

لیکن اَفسوس! صد اَفسوس! آج کے مسلمانوں کی اکثریت شاہِ اَبرار ، دو عالَم کے مالِک ومُختار صلَّی اللہ تعالٰی علیہ واٰلہ ٖ وسلَّم کے اُسوۂ حَسَنہ کو اپنا مِعیار بنانے کے بجائے اغیار کے شِعاراور فیشن پر نثار ہوکر ذلیل و خوار ہوتی جارہی ہے۔ ؎

کون ہے تارِکِ آئینِ رسولِ مُختار مصلَحت ، وقت کی ہے کس کے عمل کا مِعیار

کس کی آنکھوں میں سمایا ہے شِعارِ اَغیار ہو گئی کس کی نِگہ طرزِ سلَف سے بیزار

قلْب میں سوز نہیں ، رُوح میں اِحساس نہیں

کچھ بھی پیغامِ محمد کا تمہیں پاس نہیں

صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد

تُوْبُوْا اِلَی اللہ اَسْتَغْفِرُاللہ

صَلُّو ا عَلَی الْحَبِیب ! صلَّی اللہُ تَعَالٰی علٰی مُحَمَّد

یہ کیسا عشق اور کیسی مَحَبّت ہے؟

میٹھے میٹھے اِسلامی بھائیو! جولوگ اپنے والدین سے مَحَبَّت کرتے ہیں وہ اُن کا دل نہیں دُکھاتے ، جنہیں اپنے بچے سے مَحَبَّت ہوتی ہے وہ اُسے ناراض نہیں ہونے دیتے ، کوئی بھی اپنے دوست کو غم زدہ دیکھنا گوارا نہیں کرتاکیونکہ جس سے مَحَبَّت ہوتی ہے اُسے رَنجیدہ نہیں کیاجاتا مگر آہ!آج کے اکثر مسلما ن جو کہ عشقِ رسول کے دعویدار ہیں مگر اُن کے کام محبوبِ ر بُّ ا لانام صلَّی اللہ تعالٰی علیہ واٰلہ ٖ وسلَّم کو شاد کرنے والے نہیں ، سنو! سنو! رسولِ ذی وقار ، دو عالَم کے تاجدار ، شَہَنْشاہِ اَبرار صلَّی اللہ تعالٰی علیہ واٰلہ ٖ وسلَّم فرماتے ہیں : ’’جُعِلَتْ قُرَّۃُ عَیْنِیْ فِی الصَّلٰوۃِ یعنی میری آنکھوں کی ٹھنڈک نماز میں ہے۔‘‘(اَلْمُعْجَمُ الْکبِیر ج۲۰ص۴۲۰حدیث۱۰۱۲)وہ کیسے عاشقِ رسول ہیں جو کہ نماز سے جی چُرا کر ، نماز جان بوجھ کرقضا کر کے سرکار صلَّی اللہ تعالٰی علیہ واٰلہ ٖ وسلَّم کے قلبِ پُراَنوار کے لئے تکلیف و آزار کاسبب بنتے ہیں۔یہ کون سی مَحَبَّت اور کیسا عشق ہے کہ رسولِ رفیعُ الشان ، مدینے کے سلطان صلَّی اللہ تعالٰی علیہ واٰلہ ٖ وسلَّم ماہِ رَ مضان کے روزوں کی تاکید فرمائیں مگر خود کو عاشقانِ رسول میں کھپانے والے اِس حُکمِ والا سے رُو گَردانی کر کے ناراضیٔ مصطَفٰے کاسبب بنیں ، حضورِ اکرم صلَّی اللہ تعالٰی علیہ واٰلہ ٖ وسلَّم نمازِ تراویح کی تاکید فرمائیں مگر سُست و غافل اُمّتیوں سے نہ پڑھی جائے ، پڑھیں بھی تو رَسماً ماہِ رَمَضان کے ابتدائی چند دن اور پھر یہ سمجھ بیٹھیں کہ پورے رمَضانُ المبارَک کی نمازِتراویح ادا ہو گئی۔پیارے مصطَفٰے صلَّی اللہ تعالٰی علیہ واٰلہ ٖ وسلَّم فرمائیں : ’’مونچھیں خوب پست (یعنی چھوٹی) کرو اور داڑھیوں کو مُعافی دو (یعنی بڑھاؤ) یہودیوں کی سی صورت نہ بناؤ۔‘‘ (شرح معانی الآثار للطحاوی ج۴ ص۲۸ دارالکتب العلمیۃ بیروت)مگر عشقِ رَسول کے دعوے دار مگر فیشن کے پرستار دُشمنانِ سرکارجیسا چہرہ بنائیں ، کیایہی عشقِ رسول ہے؟

سرکار کا عاشِق بھی کیا داڑھی مُنڈاتا ہے؟

کیوں عِشق کا چہرے سے اِظہار نہیں ہوتا!

فِکرِ مدینہ( ) کیجئے!یہ کیسا عشق اور کیسی محبت ہے؟ کہ محبوبِ خوش خِصال صلَّی اللہ تعالٰی علیہ واٰلہ ٖ وسلَّم کے دُشمنوں جیسی شکل وصورت و چال ڈھال اپنانے میں فخر محسوس کیا جائے!

وَضع میں تم ہو نصاریٰ تو تَمَدُّن میں ہُنُود

یہ مسلماں ہیں جنہیں دیکھ کے شرمائیں یہود

میٹھے میٹھے اسلامی بھائیو! مُحسن وکریم اور شفیق و رحیم آقا صلَّی اللہ تعالٰی علیہ واٰلہ ٖ وسلَّم توہمیں ہمیشہ یاد فرماتے رہے ، بلکہ دنیا میں تشریف لاتے ہی آپ صلَّی اللہ تعالٰی علیہ واٰلہ ٖ وسلَّم نے سجدہ کیا۔ اس وقت ہونٹوں پر یہ دُعاجاری تھی:رَبِّ ہَبْ لِیْ اُمَّتِیْ یعنی پروردگار!میری اُ مّت مجھے ہِبہ کر دے ۔

(فتاوٰی رضویہ ج۳۰ص۷۱۷)

پہلے سجدے پہ روزِ ازَل سے درود

یادگاریٔ اُمّت پہ لاکھوں سلام

(حدائق بخشش شریف)

تا قِیامت ’’ اُمّتی اُمّتی ‘‘ فرمائیں گے

مَدارِجُ النُّبُوۃ میں ہے:حضرتِ سیِّدُنا قُثَم رضی اللہ تعالٰی عنہ وہ شخص تھے جو آپ صلَّی اللہ تعالٰی علیہ واٰلہ ٖ وسلَّم کو قبر انور میں اُتارنے کے بعد سب سے آخِر میں باہَر آئے تھے ، چُنانچِہ ان کا بیان ہے کہ میں ہی آخِری شخص ہوں جس نے حُضُورِ انور صلَّی اللہ تعالٰی علیہ واٰلہ ٖ وسلَّم کا رُوئے مُنوَّر ، قبر اَطہر میں دیکھا تھا ، میں نے دیکھا کہ سلطانِ مدینہ صلَّی اللہ تعالٰی علیہ واٰلہ ٖ وسلَّم قَبْر انور میں اپنے لبہائے مبارَکہ کوجُنبِش فرما رہے تھے(یعنی مبارَک ہونٹ ہل رہے تھے) میں نے اپنے کانوں کو اللہ عَزَّوَجَلَّ کے پیارے حبیب صلَّی اللہ تعالٰی علیہ واٰلہ ٖ وسلَّم کے دَہَن (یعنی منہ)مبارَک کے قریب کیا ، میں نے سنا کہ آپ صلَّی اللہ تعالٰی علیہ واٰلہ ٖ وسلَّم فرماتے تھے ’’ ربِّ اُمَّتِی اُمَّتِی ‘‘ (یعنی پروردگار! میری اُمّت میری اُمّت) (مَدارجُ النُّبُوۃ ج۲ ص۴۴۲)نیزکنزالعُمّال جلد 7 صَفحَہ178 پر ہے: فرمانِ مصطَفٰی صلَّی اللہ تعالٰی علیہ واٰلہ ٖ وسلَّم :’’ جب میری وفات ہو جائے گی تو اپنی قَبْرمیں ہمیشہ پکارتا رہوں گا :یا ربِّ اُمَّتِی اُمَّتِی یعنی اے پروردگار! میری اُمّت میری اُمّت ۔ یہاں تک کہ دوسرا صُور پھونکا جائے۔‘‘(کَنْزُ الْعُمّال) میرے آقا اعلیٰ حضرت اپنے لئے ایمان کی حفاظت کی خیرات طلب کرتے ہوئے بارگاہِ رسالت میں عرض کرتے ہیں : ؎

جنہیں مَرقَد میں تا حشر اُمَّتی کہہ کرپکارو گے

ہمیں بھی یاد کر لو ان میں صدقہ اپنی رحمت کا

(حدائقِ بخشش شریف)

مُحدِّثِ اعظم پاکستان نے فرمایا

مُحدِّثِ اعظم پاکستان حضرت علّامہ مولاناسردار احمد علیہ رحمۃُ اللہِ الاَحَد فرمایا کرتے تھے کہ حُضُورِ پاک صلَّی اللہ تعالٰی علیہ واٰلہ ٖ وسلَّم تو ساری عمر ہمیں اُمَّتی اُمَّتی کہہ کر یادفرماتے رہے ، قبر انور میں بھی اُمَّتی اُمَّتی فرما رہے ہیں اورحشر تک فرماتے رہیں گے یہاں تک کہ محشر کے روز بھی اُمَّتی اُمَّتی فرمائیں گے ۔ حق یہ ہے کہ اگر صِرف ایک بار بھی اُمّتی فرماد یتے اور ہم ساری زندگی یانبی یانبی ، یارسولَ اللہ یا حبیبَ اللہ کہتے رہیں تب بھی اُس ایک بار اُمّتی کہنے کا حق ادا نہیں ہو سکتا۔

جن کے لب پر رہا’’ امَّتی اُمَّتی ‘‘یاد اُن کی نہ بھول اے نیازیؔ کبھی

وہ کہیں اُمَّتی تُو بھی کہہ یا نبی! میں ہوں حاضِر تیری چاکری کے لیے

... دعوتِ اسلامی کے مَدَنی ماحول میں اپنے اعمال کا مُحاسَبہ کرنے کو ’’فکرِ مدینہ‘‘ کہتے ہیں۔