جواب :فاسق ہے ’’صحیح بخاری شریف‘‘ میں اس کی حدیث  ^([1])ہے ۔

سوال نمبر ۲۸ :بدعتی و فاسق کی امامت مکروہ وممنو ع ہے یا نہیں ۔ اس کی کیا سندیں ہیں  ؟

جواب :ہاں مکروہ ہے ۔ دیکھوطحطاوی درمختار اور طحطاوی مراقی الفلاح اور تبیین الحقائق امام زیلعی اور ردالمحتار اور غنیۃ^([2])اور صغیری اور فتح المبین وغیرہ ۔

سوال نمبر ۲۹:لامذہبی فسق ہے یانہیں  ؟

جواب :لامذہبی ہرفسق سے بدتر فسق ہے کہ یہ بدمذہبی ہے ۔دیکھو ’’غنیۃ‘‘^([3]) ۔   طبع قسطنطنیہ ۔

سوال نمبر ۳۰ :امام بنانا دینی تعظیم ہے کہ نہیں ؟اور مبتدع کی دینی تعظیم حرام ہے یا نہیں  ؟

جواب :ہاں ۔دیکھو رد المحتار اور فتح و طحطاوی ^([4])اور زیلعی وغیرہ اور مشکوٰۃ شریف وغیرہ میں حدیث ہے کہ’’ جوکسی بدعت والے کی تعظیم کرے بے شک اس نے اسلام کے ڈھانے میں مدد  دی‘‘^([5])۔

سوال نمبر ۳۱:کوئی حدیث صحیح پیش کرسکتے ہیں جس سے ظاہر ہوکہ مبتدع فاسق کی امامت مکروہ ونادرست ہے  ؟

جواب :ایک حدیث صحیح جو ابھی گزری اور صحاح ستہ سے سنن ابن ماجہ میں ہے کہ رسول اﷲ صلی اللہ تعالٰی علیہ وسلم نے خطبہ ارشاد فرمایا : لاَ یؤمُّ فاجرٌمومناً إلا أن یقھرہ بسلطان،یخاف سیفہ وسوطہ ^([6])کوئی فاسق کسی مسلمان کی امامت نہ کرے مگر اس حالت میں کہ وہ اپنی سلطنت کے زور سے اسے دبائے کہ یہ اس کی تلوار اور تازیانے کاخوف رکھتاہو۔

سوال نمبر۳۲:جس طرح نمازحنفی کی،شافعی کے پیچھے جائزہے تو اسی طرح غیر مقلّدوں کے پیچھے کیوں نہیں جائز ہے اگر وہ بھی رعایت مذہب مقتدی کرلیویں  ؟

جواب :شافعیہ اہلسنّت ہیں ، ان پر غیر مقلّدوں کا قیاس نہیں ہوسکتا۔یہیں دیکھئے، حضرت مولانا محمد سعید بابصیل سردار علمائے مکہ معظمہ شافعی المذہب ہیں انہوں نے اور دیگر مذاہب اہلسنّت کے مفتیان عرب نے ان غیر مقلّدوں کو بالاتفاق ’’گمراہ‘‘ لکھا ہے، ابھی میں شافعیہ کی نسبت بھی فتاویٰ عالمگیری کا حوالہ دے چکا ہوں کہ حنفی سے تعصب رکھیں تو ان کے پیچھے بھی نماز منع ہے نہ کہ غیر مقلّدین کہ بدمذہب ہیں اور بدمذہب بھی ایسے جن میں بہت کفریہ بدعتیں ہیں اور حنفیہ سے تعصب اتنا کہ ان کو ’’مشرک‘‘ کہتے ہیں ۔

سوال نمبر ۳۳:بعض عبارات فقہا میں ، مثل شامی وغیرہ کے جومذکور ہے کہ نماز، بِرّ وفاجر کی اقتدا میں جائز ہے ۔ علی ھٰذا حدیث ’’صلوا خلف کل بِرّ و فاجر‘‘^([7])اس جواز سے کیامراد ہے  ؟

  جواب : یہ جواز اس معنٰی پر ہے کہ فرض اتر جائے گا، نہ یہ کہ کوئی کراہت نہیں ۔ میں انہیں شامی کے دو اقوال سے بیان کرچکاکہ’’ فاسق و مبتدع کے پیچھے نماز مکروہ ومنع ہے ‘‘۔اصل بات یہ ہے کہ نمازِ عام کی امامتِ سلاطین خود کرتے ہیں یا وہ ،جسے وہ مقرر کریں اور بعض وقت حُکّام بد مذہب یافاسق بھی ہوئے، اُن کے پیچھے نماز پڑھنے سے وہی اندیشہ تھا تلوار اور تازیانہ کا،جوحدیث میں گزرا ۔ اسی بنا پر یہ حدیث آئی ہے کہ ضرورت کے وقت ان کے پیچھے پڑھ لے ۔او ر علماء نے فرمایا ہے کہ’’ یہ

حکم اس صورت میں ہے کہ اس کافسق حدِ کفر تک نہ پہنچا ہو اور کوئی مردصالح موجودنہ ہو ‘‘۔ دیکھو’’ اشعۃ اللمعات شرح مشکوٰۃ‘‘^([8])او ر پھر اس حدیث کے نیچے  صاف لکھ دیا ہے کہ’’ ان کے پیچھے نماز مکروہ‘‘ ہے ۔دیکھو ’’مرقات شرح مشکٰوۃ‘‘^([9])

 علاوہ بریں اس حدیث کی صحت میں بھی علمائے محدثین، مثل دار قطنی وغیرہ کو کلام ہے اور اس حدیث کا شروع کا ٹکڑا یہ ہے ۔ ’’جاھدوا مع کل براً کان

أو فاجر اً‘‘^([10]) یعنی ہر سلطان کے ساتھ جہاد کرو چاہے وہ نیک ہو یابد ۔ اسی سے پتہ چلتاہے کہ یہاں بادشاہوں کاذکر ہے۔مگر غیر مقلّدین اس حدیث پر اپنی خاص غرضوں کیلئے زور دیتے ہیں کہ اگر چہ مبتدع اور فاسق ہیں مگر ان کے پیچھے نماز پڑھنی واجب ہے اور ان کے پیشوا اسمٰعیل دہلوی نے بھی یہی حدیث لوگوں کو وعظ میں سناکر جہاد پر ابھارا تھا۔

سوال نمبر ۳۴:جواز کااطلاق، مکروہ^([11])پر بھی آتاہے یانہیں  ؟

جواب :آتا ہے، دیکھو! ’’رد المحتار‘‘^([12]) ۔