سنتوں بھرا اجتماع - ڈھاکہ بنگلہ دیش
دعوت اسلامی کی دینی خدمات دیگر ممالک میں بھی دیکھئے

سنتوں بھرا اجتماع - ڈھاکہ بنگلہ دیش

ڈھاکہ، بنگلہ دیش کے تین روزہ اجتماع میں نگرانِ شوریٰ حاجی عمران عطاری کا خصوصی بیان

20 نومبر، بروز جمعۃ المبارک، صبح 9:30 بجے عالمی مبلغِ اسلام، معروف دینی اسکالر اور دعوت اسلامی کی مرکزی مجلس شوریٰ کے نگران مولانا محمد عمران عطاری بنگلہ دیش میں ہونے والے تین روزہ اجتماع کے آخری روز خصوصی بیان فرمائیں گے۔

18 تا 20 نومبر ڈھاکہ، بنگلہ دیش میں دعوتِ اسلامی کے اس تین روزہ سنتوں بھرے اجتماع میں علمِ دین حاصل کرنے کے ساتھ ساتھ اصلاحِ نفس، نیکی کی رغبت، گناہوں سے دوری، برائی سے نفرت اور اعمالِ صالحہ کی توفیق بھی نصیب ہوتی ہے۔ روحانیت سے بھرپور یہ اجتماع اہلِ بنگال کے لیے نہ صرف باعثِ برکت بنتا ہے بلکہ ان اجتماعات کے ذریعے لاکھوں مسلمانوں کو اسلام کے قریب آنے کا موقع بھی ملتا ہے۔

مبلغینِ دعوتِ اسلامی کے پُرسوز بیانات کے ذریعے توحیدِ باری تعالیٰ پر ایمانِ کامل، سنتِ رسول ﷺ پر عمل کا جذبہ اور دلوں میں محبتِ رسول ﷺ کے جام انڈیلے جاتے ہیں۔ فکرِ آخرت اور خوفِ خدا کا درس نفس کی اصلاح کا باعث بنتا ہے۔ لاکھوں کی تعداد میں شرکائے اجتماع دعوتِ اسلامی کے اس اجتماع میں شریک ہو کر دین کے مبلغ بنتے ہیں اور سیرتِ النبی ﷺ کی روشنی میں معاشرے کی اصلاح اور افراد کی تربیت کرتے ہیں۔

18 تا 20 نومبر 2026ء کو دعوتِ اسلامی کے اس تین روزہ اجتماع میں بنگلہ دیش اور اس کی جغرافیائی سرحدوں میں رہنے والے دیگر عاشقانِ رسول بھی شرکت کریں گے۔

20 نومبر کو ڈھاکہ، بنگلہ دیش کا یہ اجتماع اپنا آخری روح پرور منظر پیش کرے گا۔ دلوں میں خوفِ خدا اور عشقِ رسول ﷺ کا سمندر موجزن ہوگا، اور فکرِ آخرت میں رونے والی آنکھیں اجتماع کے اس روحانی منظر کے لیے بے چین نظر آئیں گی۔

20 نومبر کی صبح 9:30 بجے دعوتِ اسلامی کی مرکزی مجلسِ شوریٰ کے نگران اور عالمی سفیرِ دعوتِ اسلامی، مبلغِ اسلام محترم محمد عمران قادری شرکائے اجتماع سے خصوصی بیان کریں گے۔

نگرانِ شوریٰ کے خصوصی بیان کے بعد سنتوں بھرے اجتماع گاہ میں حاجی عمران عطاری کی زبانی "تصورِ مدینہ" کا روحانی و وجدانی منظر عاشقانِ رسول کے دلوں کو مدینہ منورہ کی یاد میں تڑپائے گا اور رُلائے گا۔ تصور ہی تصور میں سوئے مدینہ دلوں کا رختِ سفر باندھا جائے گا؛ کسی کو سبز سبز گنبدِ خضرا کے جلوے نظر آئیں گے تو کوئی بہارِ مدینہ کی مشک بار خوشبو محسوس کرے گا۔ نبی کریم ﷺ کے عشق و محبت میں سرشار بنگلہ دیشی اسلامی بھائی بلک بلک کر روتے ہوئے یادِ مدینہ کے پُرکیف منظر میں مدینہ منورہ کی زیارت کا لطف اٹھائیں گے۔

تصورِ مدینہ کے بعد مبلغِ دعوتِ اسلامی عمران عطاری بارگاہِ الٰہی میں مناجات و دعا کریں گے۔ بعد ازاں یہ تین روزہ سنتوں بھرا اجتماع صلوٰۃ و سلام کے ساتھ اختتام پذیر ہوگا۔