قَالَ اللہُ تَبَارَکَ وَ تَعَالٰی فِی الْقُرْآنِ الْکَرِیْم (الله پاڪ قرآنِ ڪريم ۾ فرمائي ٿو):

وَ لِتُكَبِّرُوا اللّٰهَ عَلٰى مَا هَدٰىكُمْ وَ لَعَلَّكُمْ تَشْكُرُوْنَ(۱۸۵) (سيپارو: 2، البقرة: 185)

صَدَقَ اللہُ الْعَظِیْم وَ صَدَقَ رَسُوْلُہُ النَّبِیُّ الْکَرِیْم صلّی اللہ ُ عَلَیْہِ وَ آلِہٖ وَسَلَّم

ترجمو ڪنزالعرفان: ته جيئن توهان هن ڳالھ تي الله جي وڏائي بيان ڪريو جو ان توهان کي هدايت ڏني ۽ ته جيئن توهان شڪر گذار بڻجي وڃو.

صَلُّوْا عَلَی الْحَبیب! صَلَّی اللّٰہُ عَلٰی مُحَمَّد

پيارا اسلامي ڀائرو! رمضان جو مهينو آيو هو ۽ هاءِ...!! هاڻي رمضان ڪريم 11 مهينن جي جدائي ڏئي وڃي چڪو آهي. خوش نصيبن هن مقدس مهيني جا روزا رکيا، پابندي سان تراويح پڙهندا رهيا، قرآنِ ڪريم جي تلاوت ڪندا رهيا، ذِڪر ۽ درود ۾ وقت گذاريو، خوب نيڪيون ڪيون، اعتڪاف جا مزا ماڻيا، شبِ قدر ۾ عبادتون ڪيون، لکين خوش نصيب هوندا جن کي مغفرت جا پروانا نصيب ٿي ويا هوندا ۽ افسوس...!! اسان گنهگارن بس سُستي ۾ ئي ڏينهن گذاري ڇڏيا، اڄ سڀاڻي ڪندي ڪندي پورو مهينو گذري ويو، خبر ناهي ايندڙ سال رمضان ڪريم کي ڏسڻ نصيب ٿيندو يا نه ٿيندو...!!

نیکیاں کچھ نہ ہم کر سکے ہیں                   آہ! عصیاں میں ہی دن کٹے ہیں

ہائے! غفلت میں تجھ کو گُزارا                اَلوَداع اَلوَداع آہ! رَمضاں