واقعہ: ايك صحابی   رَضِیْ اللہ عنہ  نے ایک قبر پر خیمہ لگایا اور اُنہیں  معلوم نہ تھا کہ یہاں  قبر ہے۔ اچانک سے اُنہیں سورۂ  مُلْک پڑھنے کی آواز آئی (تو اُن صحابی  رَضِیْ اللہ عنہ  کو پتا چلا کہ یہاں قبر ہے )اُنہوں نے  پیارے آقا ، مدینے والے مصطفےٰ  صلی اللہ عَلَیْہِ وَ آلِہٖ وَسَلَّم   کی بارگاہ میں حاضر ہو کر عرض کی : یا رسول اللہ  صلی اللہ عَلَیْہِ وَ آلِہٖ وَسَلَّم   !  میں نے ایک قبر پر خیمہ لگایا اور مجھے معلوم نہ تھا کہ یہ قبر ہے ، مجھے اس قبر سے سورۂ  مُلْک  پڑھنے کی آواز آئی، قبر والے نے مکمل   سُوْرت پڑھی۔ تاجدارِ رسالت  صلی اللہ عَلَیْہِ وَ آلِہٖ وَسَلَّم    نے فرمایا: یہ   سُوْرت عذابِ قبر کوروکنے والی اور اِس سے نَجات دینے والی ہے۔^([1])

سور ۂ ملک پڑھنے  کے متعلق احکام

(1): مغرب کا وقت شروع ہونے سے لے کر صبح صادق (فجر کا وقت شروع ہونے)تک  کسی بھی وقت سُورۂ  مُلْک پڑھنے سے بیان کی گئی فضیلت نصیب ہو جائے گی۔ اِنْ شاۤء اللہ الکَرِیْم ! ^([2])(2):نماز میں زبانی سورۂ مُلْک کی تلاوت کیجئے! یہ زیادہ افضل ہے۔^([3]) (3): سورۂ مُلْک یا کوئی بھی    سُوْرت چلنے اور کام کرنے کی حالت میں پڑھ سکتے ہیں  جبکہ توجہ نہ بٹے  ۔   (4): یوہیں لیٹ کر بھی پڑھ سکتے ہیں جبكہ قرآن کریم کا اَدَب اور تعظیم کا لحاظ کرتے ہوئے *پاؤں سمیٹ لیے جائیں  *اور اگر لحاف  وغيره اوڑھا ہو تو منہ باہر نکال لیا جائے  ۔  *ہاں اِس بات کا بھی خیال رکھیں کہ بستر پاک ہو ۔^([4])

نوٹ :  بعض اوقات لیٹ کر کچھ پڑھتے ہوئے نیند کا غلبہ ہو تا ہے، اِس صورت میں سورۂ مُلْک یا جو    سُوْرت پڑھ رہے ہیں اُٹھ کر  مکمل کر لیجئے کہیں ایسا نہ ہو کہ پڑھنا  تو کچھ اور چاہتے ہوں اور زبان سے کچھ اور نکل جائے ۔