Book Name:Ayat e Durood Shareef
کوئی قریبِ ترازو، کوئی لبِ کوثر کوئی صِراط پر اُن کو پُکارتا ہو گا
عزیز بچہ کو ماں جس طرح تلاش کرے خُدا گواہ یہی حال آپ کا ہو گا
ہزار جان فِدا نرم نرم پاؤں سے پُکار سُن کے اَسِیْروں کی دوڑتا ہو گا([1])
اللہ پاک کروڑوں رحمتیں نازِل فرمائے ہمارے آقا ومولیٰ مُحَمَّدِمصطفےٰ صَلَّی اللہُ عَلَیْہِ وَ آلِہٖ وَ سَلَّم پر) جب آدم عَلَیْہِ السَّلام آپ صَلَّی اللہُ عَلَیْہِ وَ آلِہٖ وَ سَلَّم کے ایک اُمَّتی کو جہنّم میں جاتا دیکھ کر پُکاریں گے تو حُضُور جانِ رحمت، شمعِ بزم ہدایت صَلَّی اللہُ عَلَیْہِ وَ آلِہٖ وَ سَلَّم فرماتے ہیں: میں جواباً کہوں گا: لَبَّیْکَ یَا اَبَا الْبَشَر اے تمام انسانوں کے والِد! لبیک...! حضرت آدم عَلَیْہِ السَّلام فرمائیں گے: یہ آپ کا اُمَّتی ہے، فرشتے اسے جہنّم کی طرف لئے جا رہے ہیں۔
بازارِ قیامت میں جنہیں کوئی نہ پوچھے ایسوں کا خریدار ہمیں تُو نظر آیا([2])
ہمارے آقا ومولیٰ، مکی مَدَنی مصطفےٰ صَلَّی اللہُ عَلَیْہِ وَ آلِہٖ وَ سَلَّم حضرت آدم عَلَیْہِ السَّلام کی یہ صَدَا سُن کر جلدی سے فرشتوں کے پاس تشریف لائیں گے اور فرمائیں گے: اے میرے رَبّ کے فرشتو! ٹھہر جاؤ...!! فرشتے عرض کریں گے: یا رسولَ اللہ صَلَّی اللہُ عَلَیْہِ وَ آلِہٖ وَ سَلَّم! ہم فرشتے ہیں اور فرشتے اللہ پاک کی نافرمانی نہیں کرتے، جو حکم ہو، وہ انجام دیتے ہیں، یہ سُن کر غم خوارِ اُمّت،نبیِ رحمت صَلَّی اللہُ عَلَیْہِ وَ آلِہٖ وَ سَلَّم اپنی داڑھی مبارک پکڑ لیں گے اور عرشِ الٰہی کی طرف رُخ کر کے عَرْض کریں گے: اے میرے رَبِّ کریم! کیا مجھ سے وعدہ نہیں تھا کہ اُمّت کے معاملے میں مجھے غمگین نہیں کیا جائے گا...؟ اب فرشتوں کو حکم دیا جائے گا: اَطِیْعُوْا مُحَمَّدًا یعنی اے فرشتو! مُحَمَّد صَلَّی اللہُ عَلَیْہِ وَ آلِہٖ وَ سَلَّم کی فرمانبرداری کرو!