بھائی وَرَقَہ بِن نَوْفَل نے بھی کھڑے ہو کر ایک شاندار خُطبہ پڑھا جس کا مَضمون یہ ہے:خدا عَزَّ  وَجَلَّ ہی کے لئے حمد ہے جس نے ہم کو ایسا ہی بنایا جیسا کہ اے ابُو طالِب ! آپ نے ذِکْر کیااور ہمیں وہ تمام فضیلتیں عطا فرمائی ہیں جن کو آپ نے شُمار کِیا۔ بِلا شُبہ ہم لوگ عَرَب کے پیشوا اور سَردار ہیں اور آپ لوگ بھی تمام فضائل کے اَہل ہیں۔کوئی قبیلہ آپ لوگوں کے فضائل کا اِنکار نہیں کر سکتااور کوئی شخص آپ لوگوں کے فَخْر و شَرَف کو رَدّ نہیں کر سکتا اور بے شک ہم لوگوں نے نِہایت ہی رَغْبَت کے ساتھ آپ لوگوں کے ساتھ مِلنے اور رِشتے میں شامِل ہونے کو پسند کِیا ہے لہٰذا اے قُرَیْش! تم گواہ رہو کہ میں نے حضرت خَدِیجہ بِنْتِ خُوَیْلَد رَضِیَ اللّٰہُ تَعَالٰی عَنْہا  کو چارسو(400) مِثْقَال مہر کے بدلے محمد بِن عَبْدُاللہ(صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ)کی زَوْجِیَّت میں دیا۔(شرح زرقانی،تزوجہ علیہ السلام من خدیجۃ،۱/ ۳۷۷)

میٹھے میٹھے اسلامی بھائیو!سُنا آپ نے کہ دورِ جوانی میں ہمارے آقا و مَوْلیٰ،اَحمدِ مجتبیٰ،محمدِ مُصْطَفٰے صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کی اَمانت داری،سچّائی اور اچھے اَخلاق کی کِس قَدَر دُھوم دھام تھی کہ آپ صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ اِن عُمدَہ ترین خُوبیوں کے سبب اپنے پرائے،عَوَام و خَوَاص سَبِھی میں صادِق و اَمِیْن (یعنی سچے اورامانت دار)کے لَقَب(Title)سے پہچانے جاتے تھے،آپ صَلَّی اللّٰہُ تَعَالٰی عَلَیْہِ واٰلِہٖ وَسَلَّمَکی دِیانت داری،سچّائی اور اچّھے اَخلاق کا فَیْضان ہی تو تھا کہ حضرت سَیِّدَتُنا خَدِیجۃُ الکُبریٰ رَضِیَ اللہُ تَعَالٰی عَنْہَا بِلا خَوْف و خَطَر آپ صَلَّی اللّٰہُ تَعَالٰی عَلَیْہِ واٰلِہٖ وَسَلَّمَکو اپنا تِجارَتی سامان بیچنے کے لئے دے دِیا کرتی تھیں،آپ صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کی دِلْرُبا مَدَنی اَداؤں نے حضرت سَیِّدَتُنا خَدِیجۃُ الکُبریٰ رَضِیَ اللّٰہُ تَعَالٰی عَنْہا  جیسی پاک دامَن خاتون کے دِل کو موہ لیا حتّٰی کہ آپ رَضِیَ اللّٰہُ تَعَالٰی عَنْہا  حُضورِ اَنْوَر صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ سے نِکاح کرکے اُمُّ الْمُؤمنِیْن کے شاندار شَرَف سے سَرْفَراز ہوگئیں۔

تیری صُورت تیری سِیرت زمانے سے نِرالی ہے                                                                                       تیری ہر ہر ادا پیارے دلیلِ بے مثالی ہے