رَحْمت کے شامیانوں میں خُوشبو کے ساتھ ساتھ         ٹھنڈی ہوا چلائے گی اے بھائیو! نماز

باغِ بہشت روضۂ رِضْواں بہارِ خُلد                                           سب کچھ تُمہیں دِکھائے گی اے بھائیو! نماز

پڑھتے رہو نماز کہ دونوں جہان میں                                        سب کچھ تمہیں دِلائے گی اے بھائیو! نماز

فاقے سے مُفْلسی سے جہنّم کی آگ سے               سب سے تمہیں بچائے گی اے بھائیو! نماز

پڑھ کرنماز ساتھ لو سامانِ آخرت                                                   محشر میں کام آئے گی اے بھائیو! نماز

بات اعظمیؔ کی مانو نہ چھوڑو کبھی نماز                                اللہ سے مِلائے گی اے بھائیو! نماز

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد

صاحبِ علم و حکمت

پیارے اسلامی بھائیو! 21 وِیں پارے میں ایک بہت بلند رُتبہ ہستی کا ذِکْر ہوا ہے، ایک پُوری سُورت ہے: سورۂ لقمان۔ حضرت لقمان حکیم رَحمۃُ اللہ عَلَیْہ بہت اُونچے رُتبے والے تھے، آپ نے کئی نبیوں کی زیارت کی، اللہ پاک نے قرآنِ کریم میں آپ کی تعریف فرمائی، اتنے اُونچے رُتبے والے ہیں، سورۂ لقمان میں حضرت لقمان حکیم رَحمۃُ اللہ عَلَیْہ کے 2بہت اہم اَوْصاف بیان ہوئے ہیں: (1):آپ کو حکمت عطا کی گئی:

وَ لَقَدْ اٰتَیْنَا لُقْمٰنَ الْحِكْمَةَ (پارہ:21، لقمان:12)

ترجمہ ٔکنزُالعِرفان: ہم نے لقمان کو حکمت عطا فرمائی

 (2):آپ نیکی کی دعوت دینے والے تھے:

وَ اِذْ قَالَ لُقْمٰنُ لِابْنِهٖ وَ هُوَ یَعِظُهٗ (پارہ:21، لقمان:13)

ترجمہ ٔکنزُالعِرفان: اور یاد کرو جب لقمان نے اپنے بیٹے کو نصیحت کرتے ہوئے فرمایا: اے میرے بیٹے!