Book Name:Nekiyan Chupaye
رحمت والے نبی صَلَّی اللہُ عَلَیْہِ واٰلِہٖ وَسَلَّمَ نےاِرشاد فرمایا : وہ ذِکرجس کو نگہبان فرشتے بھی نہ سُن سکیں ، اُس ذِکر پر جسے وہ سُن سکیں ، ستّر ( 70 ) درجے زیادہ فضیلت رکھتاہے۔
( کنز العمال ، کتاب الاذکار ، باب الاول فی الذکر وفضیلتہ ، ۱/۲۲۷ ، جز : ۱ ، حدیث : ۱۹۲۵۔رسالہ نیکیاں چھپاؤ ، ص۱۲ )
اےکاش ! ہم اپنے نفل روزے ، نفل نماز ، نفل حج اور عُمرہ ، صدقہ و خیرات ، دِینی خدمات کا بِلا وجہ ڈھنڈورا پیٹنے سے بچیں ، تہجد ، اِشرا ق و چاشت اور اوّابین وغیرہ نوافل کو حتی الامکان لوگوں سے چھپائیں اورنفل نمازیں چھپ کر پڑھنےکی عادت بنائیں ۔ آئیے ! میں آپ کو فضیلت بتاتا ہوں ، چنانچہ
اَمیرِ اَہلِ سُنّت حضرت علامہ مولانا محمد الیاس قادری دَامَتْ بَـرَکاتُہُمُ الْعَالِیَہ ” فیضانِ نماز “ کے صفحہ نمبر 79 پر لکھتے ہیں : سرکارِ مدینہ صَلَّی اللہُ عَلَیْہِ واٰلِہٖ وَسَلَّمَ نے اِرشاد فرمایا : جو تنہائی میں دو رکعت نمازپڑھےکہ اللہ پاک اور اُس کےفرشتوں کےسِواکوئی نہ دیکھے ، اُس کے لیے جہنم سے آزادی لکھ دی جاتی ہے۔
( کنزالعمال ، کتاب الصلاۃ ، باب الاول فی فضل الصلوۃ ، ۴ / ۱۲۵ ، جز : ۷ ، حدیث : ۱۹۰۱۵ )
مزید4فرامینِ مصطفےٰ صَلَّی اللہُ عَلَیْہِ واٰلِہٖ وَسَلَّمَ سُنیے اورسمجھئے ، چنانچہ
( 1 ) آدمی کا ایسی جگہ نفل پڑھنا جہاں لوگ اُسے نہ دیکھتے ہوں ، لوگوں کے سامنے ادا کی جانے والی 25 نمازوں کے برابر ہے۔ ( کنزالعمال ، کتاب الاخلاق ، باب الاخلاص ، ۲/۱۲ ، جز : ۳ ، حدیث : ۵۲۶۳ )