ہو مُبارَک شہا !                                    صاحبِ  مِعْراج                                یا شفیعَ الوریٰ !                                   صاحبِ  مِعْراج

صَلُّوْا عَلَی الْحَبیب !                                                صَلَّی اللّٰہُ عَلٰی مُحَمَّد

واقعہِ  مِعْراج کا خُلاصہ

اے عاشقانِ رسول ! مِعْراج ہمارے آقا ومولیٰ ، مُحَمَّدِ مصطفےٰ صلی اللہ عَلَیْہِ وَ آلِہٖ وَسَلَّم  کا عَظِیْم اور مُنْفَرِد مُعْجِزَہ ہے ، ہمارے پیارے نبی ، مکی مدنی ، مُحَمَّدِ عَرَبی صلی اللہ عَلَیْہِ وَ آلِہٖ وَسَلَّم  مَکَّہ مُکَرَّمَہ میں اپنی چچا زاد بہن حضرت اُمِّ ہانی  رَضِیَ اللہ عنہا  کے گھر آرام فرما تھے ، اچانک چھت کُھل گئی ، فرشتوں کے سردار حضرت جبریلِ امین عَلَیْہِ السَّلَام   حاضِر ہوئے ، اللہ پاک کا پیغام سُنایا ، مِعْراج کی خوشخبری سُنائی ، سرکارِ عالی وقار ، مکی مدنی تاجدار صلی اللہ عَلَیْہِ وَ آلِہٖ وَسَلَّم  بُراق پر سُوار ہوئے ، مسجدِ اَقْصیٰ میں تشریف لائے ، یہاں اَنبیائے کرام علیہم السلام    کی اِمامت فرمائی ، پھر آسمان کی طرف رُخْ فرمایا ، ساتوں آسمانوں سے اُوپر سِدرۃُ المنتہیٰ پر تشریف لے گئے ، پھر سِدْرۃُ المنتہیٰ  سے لامکاں پہنچے ، عین بیداری میں سَر کی آنکھوں سے اللہ پاک کا دیدار کیا ، اتنے ہزاروں لاکھوں کلومیٹر  سَفَر طَے کر کے واپس بھی تشریف لے آئے اور ابھی رات کا کچھ ہی حِصَّہ گزرا تھا ، عُلَمائے کرام فرماتے ہیں : جب حُضُورِ اکرم ، جانِ عالَم صلی اللہ عَلَیْہِ وَ آلِہٖ وَسَلَّم  واپس تشریف لائے ، بِسْتَر مُبارَک ابھی گرم تھا اور دروازے کی زنجیر بھی ہِل رہی تھی۔ ^{( [1] )}

ہیں عرشِ بَریں پر جَلْوہ فگن محبوبِ  خُدا  سُبْحٰنَ اللہ !

اِک بار ہُوا دِیدار جسے سَو بار کہا سُبْحٰنَ اللہ !

طالِب کا پتہ مَطْلُوب کو ہے مَطْلُوب ہے طالِب سے  واقِف

پَردے میں بُلا کر مِل بھی لئے پَردہ بھی رَہا سُبْحٰنَ اللہ !