Book Name:Ghous e Pak Ki Nasihatain
از پئے غوثِ اعظم وِلایت اپنی رحمت سے فرما عنایت
اپنی ، اپنے نبی کی وِلا کی میرے مولیٰ تُو خیرات دے دے ( [1] )
صَلُّوا عَلَی الْحَبیب! صَلَّی اللّٰہُ عَلٰی مُحَمَّد
پیارے اسلامی بھائیو! شہنشاہِ بغداد حُضُورغوثِ پاک رَحمۃُ اللہ عَلَیْہ 91 سال ظاہِری زِندگی کے ساتھ اس دُنیا میں تشریف فرما رہے ، عُلمائے کرام نے غوثِ پاک رَحمۃُ اللہ عَلَیْہ کی اس 91سالہ مبارک زندگی کو 3 حِصَّوں میں تقسیم کیا ہے :
1حضور غوثِ پاک ، شیخ عبد القادِر جیلانی رَحمۃُ اللہ عَلَیْہ کی وِلادت سے لے کر 18 سال تک۔ اس عرصہ میں آپ اپنے آبائی وطن جیلان میں تشریف فرما رہے ، یہیں آپ نے ابتدائی تعلیم حاصِل کی 2 18 سال کی عمر مبارک سے لے کر 51 سال کی عمر مبارک تک ، یہ کُل 33 سال بنتے ہیں ، اس عرصہ میں حضور غوثِ پاک رَحمۃُ اللہ عَلَیْہ بغداد تشریف لائے اور یہاں عِلْمِ دِیْن حاصِل کیا ، اسی دوران آپ نے خوب مُجاہدات بھی کئے ، آپ جنگلوں میں تشریف لے جاتے ، تنہائی میں رِہ کر اللہ پاک کی عِبَادت کرتےاور ذِکْر و فِکْرمیں مَصْرُوف رہاکرتے 3 51 سال کی عمر مبارک سے لے کر 91 سال کی عمر مبارک تک یعنی کُل 40 سال۔ اس عرصہ میں حُضُور غوثِ پاک رَحمۃُ اللہ عَلَیْہ نے باقاعِدَہ دَرْس و بیان کا سلسلہ شُروع فرمایا ، نیکی کی دعوت کو عام کیا ، عِلْمِ دِین کی روشنی پھیلائی ، ہدایت کے چراغ جلائے ، لوگوں کو دِیْنِ حق کی راہ دکھائی ، سُنتوں کو عام کیا اور ہزاروں بھٹکے ہوؤں کو سیدھے رستے کا مُسَافِر بنا دیا۔