اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہ الرَّحْمٰنِ الرَّ حِیْم ^ط

اَلصَّلٰوۃُ وَ السَّلَامُ عَلَیْكَ یَا رَسُولَ اللہ                                                       وَعَلٰی اٰلِكَ وَ اَصْحٰبِكَ یَا حَبِیْبَ اللہ

اَلصَّلٰوۃُ وَ السَّلَامُ عَلَیْكَ یَا نَبِیَّ اللہ                                                                        وَعَلٰی اٰلِكَ وَ اَصْحٰبِكَ یَا نُوْرَ اللہ

نَوَیْتُ سُنَّتَ الْاِعْتِکَاف                                    ( ترجمہ : میں نے سُنَّت اعتکاف کی نِیَّت کی )

درودِ پاک کی برکت سے دیدارِ مصطفےٰ نصیب ہو گیا

حضرت محمد بن سعید رَحمۃُ اللہ عَلَیْہ  فرماتے ہیں : مَیں نے درودِ پاک کی ایک تعداد مقرر کر رکھی تھی اور روزانہ اُتنی تعداد میں درود شریف پڑھ کر سویا کرتا تھا ، الحمد للہ ! درودِ پاک کی برکت سے ایک روز مجھ پر کرم ہو گیا ، مَیں سویا ہوا تھا کہ قسمت جاگ اُٹھی ، مَیں نے دیکھا کہ میرے پیارے آقا ، حبیبِ خُدا صلی اللہ عَلَیْہِ وَ آلِہٖ وَسَلَّم ہمارے گھر ، میرے کمرے میں تشریف لائے ، اللہ اَکْبَر ! نُورِ مصطفےٰ کی چمک دَمک سے پُورا کمرہ جگمگا اُٹھا۔

بہرِ دیدار جھک آئے ہیں زمیں پر تارے   واہ اے جلوۂ دِلدار ! چمکنا تیرا ^{( [1] )}

واہ ! خوش نصیبی... ! ! میرے کریم آقا ، میرے رَحِیْم آقا ، مِعْراج کے دُولہا ، غریب پَرْوَر ، تمام نبیوں کے سرور صلی اللہ عَلَیْہِ وَ آلِہٖ وَسَلَّم  کَرَم کی بارِش برساتے ہوئے مجھ غُلام کے قریب تشریف لائے اور محبت بھرے لہجے میں فرمایا : اے میرے پیارے اُمَّتی ! جس مُنہ سےتم  مجھ پر درود پڑھتے  ہو ، لاؤ ! میں اُس منہ کو بوسَہ دُوں... ! !

قربان مَیں اُن کی بخشش کے ، مقصد بھی زباں پر آیا نہیں   بِن مانگے دیا اور اتنا دیا ، دامن میں ہمارے سمایا نہیں

اُن کا تو شعار کریمی ہے ، مائل بہ کرم ہی رہتے ہیں        جب یاد کیا اے صَلِّ عَلیٰ ، وہ آ ہی گئے تڑپایا نہیں