اور سیدی اعلیٰ حضرت رَحمۃُ اللہ عَلَیْہ بھی کیا خُوب  عرض  کرتے ہیں :

قِسْمَت میں لاکھ پیچ ہوں ، سَو  بَل ، ہزار       کَج یہ ساری گتھی اِک تری سیدھی نظر کی ہے  ^{( [1] )}

وضاحت : یَا رسولَ اللہ صَلَّی اللہ عَلَیْہِ وَ آلِہٖ وَسَلَّم ! قسمت میں چاہے کتنی ہی اُلجھنیں اور پریشانیاں لکھی ہوں ، بس آپ  لُطف و کرم کی ایک سیدھی نظر فرما دیجئے  اِنْ شَآءَ اللہ الْکَرِیْم ! تقدیر کی ساری گُتّھیاں یعنی پریشانیاں دورہو  جائیں گی۔

پیارے اسلامی بھائیو ! اَلْحَمْدُ للّٰہ ! درودِ پاک اَنمول نعمت ہے ، اس کی برکت سے مشکلیں حل ہوتی ہیں ، تنگ دستی خوشحالی میں بدلتی ہے ، گُنَاہ دُھلتے ہیں ، رحمتیں چھماچھم برستی ہیں اور ایک اَہَم ترین فائدہ  ( Benefit ) یہ ہےکہ درودِ پاک پڑھنے والے کا درود سرکارِ عالی وقار ، مکی مدنی تاجدار صَلَّی اللہ علیہ وَآلہٖ و َسَلّم کی بارگاہِ عالی شان میں پہنچتا ہے ، مالِک و مختار نبی ، رسولِ ہاشمی صَلَّی اللہ علیہ وَآلہٖ و َسَلّم کی نَظْرِ عنایت بھی نصیب ہوتی ہے اور آقا کریم ، رَءُوف و رحیم صَلَّی اللہ عَلَیْہِ وَ آلِہٖ وَسَلَّم چاہیں تو اپنے غلاموں کو دیدار کا جام بھی عطا فرما دیتے ہیں۔

اللہ پاک ہمیں کثرت سے درودِ پاک پڑھنے کی توفیق عنایت فرمائے اور کاش ! کاش ! صد کروڑ کاش ! کہ درودِ پاک کی برکت سے ہمیں محبوبِ خُدا ، سردارِ اَنْبیا صَلَّی اللہ علیہ وَآلہٖ و َسَلّم کی نظرِ کرم نصیب ہو جائے تو اِنْ شَآءَ اللہ الْکَرِیْم ! دو جہاں میں بیڑا پار ہو جائے۔

پڑ گئی جس پہ محشر میں بخشا گیا             دیکھا جس سمت ابرِ کرم چھا گیا

رُخ جدھر ہو گیا زندگی پا گیا                جس طرف اُٹھ گئی دَم میں دَم آ گیا

اُس نگاہِ عنایت پہ لاکھوں سلام

صَلُّوْا عَلَی الْحَبیب !                                                   صَلَّی اللّٰہُ عَلٰی مُحَمَّد