وضو کریں تو اگر وقتِ مکروہ نہ ہو تو دو رکعت تَحِیَّۃُ الْوُضُو ادا کریں۔

صَلُّوْا عَلَی الْحَبِیْب!                                           صَلَّی اللہُ  عَلٰی مُحَمَّد

زَبَرجَد اور یاقُوت کے خیمے

جنّت کی حسین وجمیل اور پیاری وادیوں کی سیر فرماتے  ہوئے پیارے آقا صَلَّی اللہُ  عَلَیْہِ وَاٰلِہٖ وَسَلَّمَ ایک نہر پر تشریف لائے جسے بَیْذَخ کہا جاتا ہے۔ اس پر موتیوں ، سبز زَبَرجَد اور سُرخ یَاقُوت کے خیمے تھے۔ اتنے میں ایک آواز آئی : “ اَلسَّلَامُ عَلَیْکَ یَا رَسُوْلَ اللہ “

آپ صَلَّی اللہُ  عَلَیْہِ وَاٰلِہٖ وَسَلَّمَ نے حضرتِ جبرائیل عَلَیْہِ السَّلَام سے دریافت فرمایا کہ اے جبریل! یہ کیسی آواز ہے؟ عرض کیا : یہ خیموں میں پردہ نَشِین حُوریں ہیں ، انہوں نے اپنے ربّ سے آپ صَلَّی اللہُ  عَلَیْہِ وَاٰلِہٖ وَسَلَّمَ کو سَلام کہنے کی اجازت طلب کی تھی اور ربّ تعالیٰ نے انہیں اجازت عطا فرما دی۔ پھر وہ (حوریں) کہنے لگیں : ہم خوش رہنے والیاں ہیں کبھی ناگواری ونفرت کا باعِث نہ ہوں گی اور ہم ہمیشہ رہنے والیاں ہیں کبھی فنا نہ ہوں گی۔ ^([1])

صَلُّوْا عَلَی الْحَبِیْب!                                            صَلَّی اللہُ  عَلٰی مُحَمَّد

                                                پیارے پیارے اسلامی بھائیو! ذرا غور تو کیجئے کہ رَبِّ کریم  نے جنّت کو اپنے بندوں کے لئے کتنا آراستہ  کررکھا ہے اوراس میں کیسی کیسی عُمدہ نعمتیں تیار کررکھی ہیں۔ آیئے ! مختصراً جنّت کے کچھ مزیداوصاف سنتے ہیں تاکہ ہمارے دلوں میں اسے حاصل کرنے کی رَغْبَت پیدا ہو اور نیک اعمال کاجذبہ نصیب ہو۔ چنانچہ ،