گندم بیج کر گندم ہی کاٹو گے ، جَو بیج کر جَو ہی کاٹو گے ، دُنیا میں مَکَافَاتِ عَمَل یعنی Tit For Tate (ادلے کا بدلہ) والا قانون جاری ہے ، اس سے غفلت مت کرو!

معلوم ہوا ہر شخص اپنے اَعْمَال کے عوض گروی ہے ، جو اس نے کیا ، اس کا نتیجہ بھگتے گا ، جو اللہ پاک کے فرائِض اور واجبات ادا نہیں کرے گا ، جو اس دُنیا میں نیکیاں نہیں کمائے گا ، گُناہ پر گُناہ کرتا جائے گا ، جنّت میں لے جانے والے اَعْمَال نہیں کرے گا ، وہ جہنّم کا حقدار قرار پائے گا۔ لہٰذا :

كُلُّ نَفْسٍۭ بِمَا كَسَبَتْ رَهِیْنَةٌۙ(۳۸)    (پارہ29 ، سورۃالمدثر : 38)                                          

ترجمہ کنز الایمان : ہر جان اپنی کرنی میں گروی ہے۔

جو بھی اس دُنیا میں پیدا ہو گیا ، اس نے قبر میں اُترنا اور اپنی کرنی کا پھل بھگتنا ہے۔

بونے والے جو بوئیں وہ کاٹیں                یہ ہوا تو مَرْ مِٹا یارب

آہ جو بو چکا ہوں وقت دِرَوْ                     ہو گا حسرت کا سامنا یارب

مجھے دونوں جہاں کے غم سے بچا                                                                      شاد رکھ شاد دائما یا رب^([1])

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد

سُورہ مُدَّثِّر کی آیت : 39 کا بیان

اے عاشقانِ رسول! ایسے خوش نصیب بھی ہیں جو خود کو جہنّم سے آزاد کروانے میں کامیاب ہو جائیں گے ، وہ کون ہیں؟ سورۂ مُدَّثِّر آیت : 39 میں ارشاد ہوتا ہے :

اِلَّاۤ اَصْحٰبَ الْیَمِیْنِؕۛ(۳۹)  (پارہ29 ، سورۃالمدثر : 39)

ترجمہ کنز الایمان : مگر دہنی طرف والے۔