Khuda Ne Jis Ke Sar Par Taj Rakha Apni Rehmat Ka

خدا نے جس کے سَر پَر  تاج رکھا اپنی رحمت کا

خدا نے جس کے سَر پَر  تاج رکھا اپنی رحمت کا

دُرُود اس پر وہ حاکم بنا مُلکِ رِسالت کا

وہ ماحی کفر و ظُلمت شرک و بدعات و ضَلالت کا

وہ حافظ اپنی مِلّت کا وہ ناصِر اپنی اُمّت کا

اَثر کیا ہوسکے گا مِہرِ مَحشر کی حَرارَت کا

ہمارے سَر پہ ہوگا شامیانہ اُن کی رحمت کا

ہمیں بھی ساتھ لے لو قافلہ والو ذرا ٹھہرو

بہت مدّت سے اَرماں ہے مدینے کی زیارت کا

مِری آنکھیں مدینے کی زیارت کو تَرَستی ہیں

چمک جائے الٰہی اب تو تارا میری قسمت کا

میں سمجھوں گا ہُوا جنّت میں داخل موت سے پہلے

نظر آئے گا جس دن سبز گنبد اُن کی تُربَت کا

دِکھا دے فیضِ استادِ حسن حُضَّارِ محفل کو

جمیلِؔ قادری پھر ہو بَیاں پُرلُطف مِدحت کا

اَز   مَدَّاحُ الْحَبِیْب مولانا جمیل الرحمن قادری رضوی رحمۃ اللہ علیہ

قبالۂ بخشش ، ص38

عابدِ کِبریا  امام حسین

عابدِ کِبریا امام حسین

زاہدِ بےرِیا امام حسین

دین کے پیشوا امام حسین

رہنما مُقْتَدا امام حسین

دھوم عالَم میں ہے شُجاعت کی

کام ایسا کیا امام حسین

راہِ حق میں کٹایا سب کُنبہ

مَرحبَا مرحبا امام حسین

تیری تلوار کا جہاں میں ہے

آج تک غُلغُلہ امام حسین

آپ سے رکھتے ہیں اُمیدِ کرم

رنج کے مُبتَلا امام حسین

اس نعیمِؔ گناہگار پہ لُطف

اے شہِ اَصفِیاء امام حسین

                                                                                                اَز  صَدْرُ الْاَفاضِل مولانا سیدنعیمُ الدین مرادآبادی رحمۃ اللہ علیہ

حیاتِ صدر الافاضل ، ص223

الفاظ و معانی : ماحی : مٹانے والا۔ مِہرِ مَحشر : قِیامت کے دن کا سورج۔ حُضَّارِ محفل : محفل میں حاضر ہونے والے۔ عابدِ کِبریا  : اللہ پاک کی عبادت کرنے والے۔ زاہدِ بے رِیا : اخلاص کے ساتھ دنیا سے بے رغبتی اختیار کرنے والے۔ مُقْتَدا : جس کی پیروی کی جائے۔ عالَم : زمانہ۔ شُجاعت : بہادری۔ کُنبہ : بال بچے۔ غُلغُلہ : شہرت۔ شہِ اَصفِیاء : چُنے ہوئے لوگوں کے سردار۔