hain saf ara sab hoor o malak

نہ مجھ کو خدامال و زر چاہیے

نہ مجھ کو خدامال و زر چاہیے

نہ یاقُوت و لعل و گوہر چاہیے

زمانہ کی خوبی زمانے کو دے

مجھے صرف دردِ جگر چاہیے

رہے جس میں عشقِ حبیبِ خدا

وہ دل وہ جگر اور وہ سر چاہیے

کوئی راج چاہے کوئی تخت و تاج

مجھے تیرے پیارے کا دَر چاہیے

بنے جس میں تقدیر بگڑی ہوئی

الٰہی مجھے وہ ہنر چاہیے

ہیں دنیا میں لاکھوں بشر پر وہاں

خبر کے لئے بے خبر چاہیے

خزانےسےرب کے جو چاہو سو لو

نبی کی غلامی مگر چاہیے

دعائیں تو ساؔلک بہت ہیں مگر

اثر کے لئے چشمِ تر چاہیے

دیوانِ سالک از مفتی احمد یار خان رَحْمَۃُ اللّٰہ ِتَعَالٰی عَلَیْہ ص،40

خواجۂ ہند وہ دربار ہے اعلیٰ تیرا

خواجۂ ہند وہ دربار ہے اعلیٰ تیرا

کبھی محروم نہیں مانگنے والا تیرا

خفتگانِ شبِ غفلت کو جگا دیتا ہے

سالہا سال وہ راتوں کا نہ سونا تیرا

ہے تری ذات عجب بحرِ حقیقت پیارے

کسی تیراک نے پایا نہ کنارا تیرا

تیرے ذرّہ پہ معاصی کی گھٹا چھائی ہے

اس طرف بھی کبھی اے مہر ہو جلوہ تیرا!

پھر مجھے اپنا درِ پاک دکھادے پیارے

آنکھیں پُرنور ہوں پھر دیکھ کے جلوہ تیرا

تجھ کو بغداد سے حاصل ہوئی وہ شانِ رفیع

دنگ رہ جاتے ہیں سب دیکھ کے رتبہ تیرا

جب سے تُونے قدمِ غوث لیا ہے سر پر

اولیاء سر پہ قدم لیتے ہیں شاہا تیرا

محی دیں غوث ہیں اور خواجہ معین الدین ہے

اے حسؔن کیوں نہ ہو محفوظ عقیدہ تیرا

ذوقِ نعت، ازبرادرِ اعلیٰ حضرت مولانا حسن رضا خان عَلَیْہِ رَحمَۃُ الرَّحْمٰن،ص12